सांग्रहण्येष्ट्या यजते । इमां जनताꣳ संगृह्णानीति । द्वादशारत्नी रशना भवति । द्वादश मासाः संवत्सरः । संवत्सरमेवावरुन्धे । मौञ्जी भवति । ऊर्ग्वै मुञ्जाः । ऊर्जमेवावरुन्धे । चित्रा नक्षत्रं भवति । चित्रं वा एतत्कर्म १ यदश्वमेधः समृद्ध्यै । पुण्यनाम देवयजनमध्यवस्यति । पुण्यामेव तेन कीर्तिमभिजयति । अपदातीनृत्विजः समावहन्त्या सुब्रह्मण्यायाः । सुवर्गस्य लोकस्य समष्ट्यै । केशश्मश्रु वपते । नखानि निकृन्तते । दतो धावते । स्नाति । अहतं वासः परिधत्ते । पाप्मनोऽपहत्यै । वाचं यत्वोपवसति । सुवर्गस्य लोकस्य गुप्त्यै । रात्रिं जागरयन्त आसते । सुवर्गस्य लोकस्य समष्ट्यै २
sāṃgrahaṇyeṣṭyā yajate | imāṃ janatām̐ saṃgṛhṇānīti | dvādaśāratnī raśanā bhavati | dvādaśa māsāḥ saṃvatsaraḥ | saṃvatsaramevāvarundhe | mauñjī bhavati | ūrgvai muñjāḥ | ūrjamevāvarundhe | citrā nakṣatraṃ bhavati | citraṃ vā etatkarma 1 yadaśvamedhaḥ samṛddhyai | puṇyanāma devayajanamadhyavasyati | puṇyāmeva tena kīrtimabhijayati | apadātīnṛtvijaḥ samāvahantyā subrahmaṇyāyāḥ | suvargasya lokasya samaṣṭyai | keśaśmaśru vapate | nakhāni nikṛntate | dato dhāvate | snāti | ahataṃ vāsaḥ paridhatte | pāpmano'pahatyai | vācaṃ yatvopavasati | suvargasya lokasya guptyai | rātriṃ jāgarayanta āsate | suvargasya lokasya samaṣṭyai 2
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.