चतुष्टय्य आपो भवन्ति । चतुःशफो वा अश्वः प्राजापत्यः समृद्ध्यै । ता दिग्भ्यः समाभृता भवन्ति । दिक्षु वा आपः । अन्नं वा आपः । अद्भ्यो वा अन्नं जायते । यदेवाद्भ्योऽन्नं जायते । तदवरुन्धे । तासु ब्रह्मौदनं पचति । रेत एव तद्दधाति १ चतुःशरावो भवति । दिक्ष्वेव प्रति तिष्ठति । उभयतो रुक्मौ भवतः । उभयत एवास्मिन्रुचं दधाति । उद्धरति शृतत्वाय । सर्पिष्वान्भवति मेध्य-त्वाय । चत्वार आर्षेयाः प्राश्नन्ति । दिशामेव ज्योतिषि जुहोति । चत्वारि हिरण्यानि ददाति । दिशामेव ज्योतीꣳ ष्यवरुन्धे २ यदाज्यमुच्छिष्यते । तस्मिन्रशनां न्युनत्ति । प्रजापतिर्वा ओदनः । रेत आज्यम् । यदाज्ये रशनां न्युनत्ति । प्रजापतिमेव रेतसा समर्धयति । दर्भमयी रशना भवति । बहु वा एष कुचरोऽमेध्यमुपगच्छति । यदश्वः । पवित्रं वै दर्भाः ३ यद्दर्भमयी रशणा भवति । पुनात्येवैनम् । पूतमेनं मेध्यमालभते । अश्वस्य वा आलब्धस्य महिमोदक्रामत् । स महर्त्विजः प्राविशत् । तन्महर्त्विजां महर्त्विक्त्वम् । यन्महर्त्विजः प्राश्नन्ति । महिमानमेवास्मिन्तद्दधति । अश्वस्य वा आलब्धस्य रेत उदक्रामत् । तत्सुवर्णꣳ हिरण्यमभवत् । यत्सुवर्णꣳ हिरण्यं ददाति । रेत एव तद्दधाति । ओदने ददाति । रेतो वा ओदनः । रेतो हिरण्यम् । रेतसैवास्मिन्रेतो दधाति ६
catuṣṭayya āpo bhavanti | catuḥśapho vā aśvaḥ prājāpatyaḥ samṛddhyai | tā digbhyaḥ samābhṛtā bhavanti | dikṣu vā āpaḥ | annaṃ vā āpaḥ | adbhyo vā annaṃ jāyate | yadevādbhyo'nnaṃ jāyate | tadavarundhe | tāsu brahmaudanaṃ pacati | reta eva taddadhāti 1 catuḥśarāvo bhavati | dikṣveva prati tiṣṭhati | ubhayato rukmau bhavataḥ | ubhayata evāsminrucaṃ dadhāti | uddharati śṛtatvāya | sarpiṣvānbhavati medhya-tvāya | catvāra ārṣeyāḥ prāśnanti | diśāmeva jyotiṣi juhoti | catvāri hiraṇyāni dadāti | diśāmeva jyotīm̐ ṣyavarundhe 2 yadājyamucchiṣyate | tasminraśanāṃ nyunatti | prajāpatirvā odanaḥ | reta ājyam | yadājye raśanāṃ nyunatti | prajāpatimeva retasā samardhayati | darbhamayī raśanā bhavati | bahu vā eṣa kucaro'medhyamupagacchati | yadaśvaḥ | pavitraṃ vai darbhāḥ 3 yaddarbhamayī raśaṇā bhavati | punātyevainam | pūtamenaṃ medhyamālabhate | aśvasya vā ālabdhasya mahimodakrāmat | sa mahartvijaḥ prāviśat | tanmahartvijāṃ mahartviktvam | yanmahartvijaḥ prāśnanti | mahimānamevāsmintaddadhati | aśvasya vā ālabdhasya reta udakrāmat | tatsuvarṇam̐ hiraṇyamabhavat | yatsuvarṇam̐ hiraṇyaṃ dadāti | reta eva taddadhāti | odane dadāti | reto vā odanaḥ | reto hiraṇyam | retasaivāsminreto dadhāti 6
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.