यथा वै हविषो गृहीतस्य स्कन्दति । एवं वा एतदश्वस्य स्कन्दति । यन्निक्तमनालब्धमुत्सृजन्ति । यत्स्तोक्या अन्वाह । सर्वहुतमेवैनं करोत्यक्सन्दाय । अस्कन्नꣳ हि तत् । यद्धुतस्य स्कन्दति । सहस्रमन्वाह । सहस्रसंमितः सुवर्गो लोकः । सुवर्गस्य लोकस्याभिजित्यै १ यत्परिमिता अनुब्रूयात् । परिमितमवरुन्धीत । अपरिमिता अन्वाह । अपरिमितः सुवर्गो लोकः । सुवर्गस्य लोकस्य समष्ट्यै । स्तोक्या जुहोति । या एव वर्ष्या आपः । ता अवरुन्धे । अस्यां जुहोति । इयं वा अग्निर्वैश्वानरः २ अस्यामेवैनाः प्रतिष्ठापयति । उवाच ह प्रजापतिः । स्तोक्यासु वा अहमश्वमेधꣳ सꣳ स्थापयामि । तेन ततः सꣳ स्थितेन चरामीति । अग्नये स्वाहेत्याह । अग्नय एवैनं जुहोति । सोमाय स्वाहेत्याह । सोमायैवैनं जुहोति । सवित्रे स्वाहेत्याह । सवित्र एवैनं जुहोति ३ सरस्वत्यै स्वाहेत्याह । सरस्वत्या एवैनं जुहोति । पूष्णे स्वाहेत्याह । पूष्ण एवैनं जुहोति । बृहस्पतये स्वाहेत्याह । बृहस्पतय एवैनं जुहोति । अपां मोदाय स्वाहेत्याह । अद्भ्य एवैनं जुहोति । वायवे स्वाहेत्याह । वायव एवैनं जुहोति ४ मित्राय स्वाहेत्याह । मित्रायैवैनं जुहोति । वरुणाय स्वाहेत्याह । वरुणायैवैनं जुहोति । एताभ्य एवैनं देवताभ्यो जुहोति । दशदश संपादं जुहोति । दशाक्षरा विराट् । अन्नं विराट् । विराजैवान्नाद्यमवरुन्धे । प्र वा एषोऽस्माल्लोकाच्च्यवते । यः पराचीराहुतीर्जुहोति । पुनःपुनरभ्यावर्तं जुहोति । अस्मिन्नेव लोके प्रतितिष्ठति । एताꣳ ह वाव सोऽश्वमेधस्य सꣳ स्थितिमुवाचास्कन्दाय । अस्कन्नꣳ हि तत् । यद्यज्ञस्य सꣳ स्थितस्य स्कन्दति ५
yathā vai haviṣo gṛhītasya skandati | evaṃ vā etadaśvasya skandati | yanniktamanālabdhamutsṛjanti | yatstokyā anvāha | sarvahutamevainaṃ karotyaksandāya | askannam̐ hi tat | yaddhutasya skandati | sahasramanvāha | sahasrasaṃmitaḥ suvargo lokaḥ | suvargasya lokasyābhijityai 1 yatparimitā anubrūyāt | parimitamavarundhīta | aparimitā anvāha | aparimitaḥ suvargo lokaḥ | suvargasya lokasya samaṣṭyai | stokyā juhoti | yā eva varṣyā āpaḥ | tā avarundhe | asyāṃ juhoti | iyaṃ vā agnirvaiśvānaraḥ 2 asyāmevaināḥ pratiṣṭhāpayati | uvāca ha prajāpatiḥ | stokyāsu vā ahamaśvamedham̐ sam̐ sthāpayāmi | tena tataḥ sam̐ sthitena carāmīti | agnaye svāhetyāha | agnaya evainaṃ juhoti | somāya svāhetyāha | somāyaivainaṃ juhoti | savitre svāhetyāha | savitra evainaṃ juhoti 3 sarasvatyai svāhetyāha | sarasvatyā evainaṃ juhoti | pūṣṇe svāhetyāha | pūṣṇa evainaṃ juhoti | bṛhaspataye svāhetyāha | bṛhaspataya evainaṃ juhoti | apāṃ modāya svāhetyāha | adbhya evainaṃ juhoti | vāyave svāhetyāha | vāyava evainaṃ juhoti 4 mitrāya svāhetyāha | mitrāyaivainaṃ juhoti | varuṇāya svāhetyāha | varuṇāyaivainaṃ juhoti | etābhya evainaṃ devatābhyo juhoti | daśadaśa saṃpādaṃ juhoti | daśākṣarā virāṭ | annaṃ virāṭ | virājaivānnādyamavarundhe | pra vā eṣo'smāllokāccyavate | yaḥ parācīrāhutīrjuhoti | punaḥpunarabhyāvartaṃ juhoti | asminneva loke pratitiṣṭhati | etām̐ ha vāva so'śvamedhasya sam̐ sthitimuvācāskandāya | askannam̐ hi tat | yadyajñasya sam̐ sthitasya skandati 5
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.