यथा वै हविषो गृहीतस्य स्कन्दति । एवं वा एतदश्वस्य स्कन्दति । यत्प्रोक्षितमनालब्धमुत्सृजन्ति । यदश्वचरितानि जुहोति । सर्वहुतमेवैनं करोत्यस्कन्दाय । अस्कन्नꣳ हि तत् । यद्धुतस्य स्कन्दति । ईंकाराय स्वाहेंकृताय स्वाहेत्याह । एतानि वा अश्वचरितानि । चरितैरेवैनꣳ समर्धयति १ तदाहुः । अनाहुतयो वा अश्वचरितानि । नैता होतव्या इति । अथो खल्वाहुः । होतव्या एव । अत्र वावैवं विद्वानश्वमेधꣳ सꣳ स्थापयति । यदश्वचरितानि जुहोति । तस्माद्धोतव्या इति । बहिर्धा वा एनमेतदायतनाद्दधाति । भ्रातृव्यमस्मै जनयति २ यस्यानायतनेऽन्यत्राग्नेराहुतीर्जुहोति । सावित्रिया इष्ट्याः पुरस्तात्स्विष्टकृतः । आहवनीयेऽश्वचरितानि जुहोति । आयतन एवास्याहुतीर्जुहोति । नास्मै भ्रातृव्यं जनयति । तदाहुः । यज्ञमुखेयज्ञमुखे होतव्याः । यज्ञस्य क्ळ्प्त्यै । सुवर्गस्य लोकस्यानुख्यात्या इति । अथो खल्वाहुः ३ यद्यज्ञमुखेयज्ञमुखे जुहुयात् । पशुभिर्यजमानं व्यर्धयेत् । अव सुवर्गाल्लोकात्पद्येत । पापीयान्त्स्यादिति । सकृदेव होतव्याः । न यजमानं पशुभिर्व्यर्धयति । अभि सुवर्गं लोकं जयति । न पापीयान्भवति । अष्टाचत्वारिꣳ शतमश्वरूपाणि जुहोति । अष्टाचत्वारिꣳ शदक्षरा जगती ।जागतोऽश्वः प्राजापत्यः समृद्ध्यै । एकमतिरिक्तं जुहोति । तस्मादेकः प्रजास्वर्धुकः ४
yathā vai haviṣo gṛhītasya skandati | evaṃ vā etadaśvasya skandati | yatprokṣitamanālabdhamutsṛjanti | yadaśvacaritāni juhoti | sarvahutamevainaṃ karotyaskandāya | askannam̐ hi tat | yaddhutasya skandati | īṃkārāya svāheṃkṛtāya svāhetyāha | etāni vā aśvacaritāni | caritairevainam̐ samardhayati 1 tadāhuḥ | anāhutayo vā aśvacaritāni | naitā hotavyā iti | atho khalvāhuḥ | hotavyā eva | atra vāvaivaṃ vidvānaśvamedham̐ sam̐ sthāpayati | yadaśvacaritāni juhoti | tasmāddhotavyā iti | bahirdhā vā enametadāyatanāddadhāti | bhrātṛvyamasmai janayati 2 yasyānāyatane'nyatrāgnerāhutīrjuhoti | sāvitriyā iṣṭyāḥ purastātsviṣṭakṛtaḥ | āhavanīye'śvacaritāni juhoti | āyatana evāsyāhutīrjuhoti | nāsmai bhrātṛvyaṃ janayati | tadāhuḥ | yajñamukheyajñamukhe hotavyāḥ | yajñasya kl̤ptyai | suvargasya lokasyānukhyātyā iti | atho khalvāhuḥ 3 yadyajñamukheyajñamukhe juhuyāt | paśubhiryajamānaṃ vyardhayet | ava suvargāllokātpadyeta | pāpīyāntsyāditi | sakṛdeva hotavyāḥ | na yajamānaṃ paśubhirvyardhayati | abhi suvargaṃ lokaṃ jayati | na pāpīyānbhavati | aṣṭācatvārim̐ śatamaśvarūpāṇi juhoti | aṣṭācatvārim̐ śadakṣarā jagatī |jāgato'śvaḥ prājāpatyaḥ samṛddhyai | ekamatiriktaṃ juhoti | tasmādekaḥ prajāsvardhukaḥ 4
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.