आदित्याश्चाङ्गिरसश्च सुवर्गे लोकेऽस्पर्धन्त । तेऽङ्गिरस आदित्येभ्यः । अमुमादित्यमश्वꣳ श्वेतं भूतं दक्षिणामनयन् । तेऽब्रुवन् । यं नोऽनेष्ट । स वर्योऽभूदिति । तस्मादश्वꣳ सवर्येत्याह्वयन्ति । तस्माद्यज्ञे वरो दीयते । यत्प्रजापतिरालब्धोऽश्वोऽभवत् । तस्मादश्वो नाम १ यच्छ्वयदरुरासीत् । तस्मादर्वा नाम । यत्सद्यो वाजान्त्समजयत् । तस्माद्वाजी नाम । यदसुराणां लोकानादत्त । तस्मादादित्यो नाम । अग्निर्वा अश्वमेधस्य योनिरायतनम् । सूर्योऽग्नेर्योनिरायतनम् । यदश्वमेधेऽग्नौ चित्य उत्तरवेदिमुपवपति । योनिमन्तमेवैनमायतनवन्तं करोति २ योनिमानायतनवान्भवति । य एवं वेद । प्राणापानौ वा एतौ देवानाम् । यदर्काश्वमेधौ । प्राणापानावेवावरुन्धे । ओजो बलं वा एतौ देवानाम् । यदर्काश्वमेधौ । ओजो बलमेवावरुन्धे । अग्निर्वा अश्वमेधस्य योनिरायतनम् । सूर्योऽग्नेर्योनिरायतनम् । यदश्वमेधेऽग्नौ चित्य उत्तरवेदिं चिनोति । तावर्काश्वमेधौ । अर्काश्वमेधावेवावरुन्धे । अथो अर्काश्वमेधयोरेव प्रतितिष्ठति ३
ādityāścāṅgirasaśca suvarge loke'spardhanta | te'ṅgirasa ādityebhyaḥ | amumādityamaśvam̐ śvetaṃ bhūtaṃ dakṣiṇāmanayan | te'bruvan | yaṃ no'neṣṭa | sa varyo'bhūditi | tasmādaśvam̐ savaryetyāhvayanti | tasmādyajñe varo dīyate | yatprajāpatirālabdho'śvo'bhavat | tasmādaśvo nāma 1 yacchvayadarurāsīt | tasmādarvā nāma | yatsadyo vājāntsamajayat | tasmādvājī nāma | yadasurāṇāṃ lokānādatta | tasmādādityo nāma | agnirvā aśvamedhasya yonirāyatanam | sūryo'gneryonirāyatanam | yadaśvamedhe'gnau citya uttaravedimupavapati | yonimantamevainamāyatanavantaṃ karoti 2 yonimānāyatanavānbhavati | ya evaṃ veda | prāṇāpānau vā etau devānām | yadarkāśvamedhau | prāṇāpānāvevāvarundhe | ojo balaṃ vā etau devānām | yadarkāśvamedhau | ojo balamevāvarundhe | agnirvā aśvamedhasya yonirāyatanam | sūryo'gneryonirāyatanam | yadaśvamedhe'gnau citya uttaravediṃ cinoti | tāvarkāśvamedhau | arkāśvamedhāvevāvarundhe | atho arkāśvamedhayoreva pratitiṣṭhati 3
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.