यो वा अश्वस्य मेध्यस्य लोमनी वेद । अश्वस्यैव मेध्यस्य लोमꣳ ल्लोमञ्जुहोति । अहोरात्रे वा अश्वस्य मेध्यस्य लोमनी ।यत्सायम्प्रातर्जुहोति । अश्वस्यैव मेध्यस्य लोमꣳ ल्लोमञ्जुहोति । एतदनुकृति ह स्म वै पुरा । अश्वस्य मेध्यस्य लोमꣳ ल्लोमञ्जुह्वति । यो वा अश्वस्य मेध्यस्य पदे वेद । अश्वस्यैव मेध्यस्य पदेपदे जुहोति । दर्शपूर्णमासौ वा अश्वस्य मेध्यस्य पदे १ यद्दर्शपूर्णमासौ यजते । अश्वस्यैव मेध्यस्य पदेपदे जुहोति । एतदनुकृति ह स्म वै पुरा । अश्वस्य मेध्यस्य पदेपदे जुह्वति । यो वा अश्वस्य मेध्यस्य विवर्तनं वेद । अश्वस्यैव मेध्यस्य विवर्तने विवर्तने जुहोति । असौ वा आदित्योऽश्वः । स आहवनीयमागच्छति । तद्विवर्तते । यदग्निहोत्रं जुहोति । अश्वस्यैव मेध्यस्य विवर्तनेविवर्तने जुहोति । एतदनुकृति ह स्म वै पुरा । अश्वस्य मेध्यस्य विवर्तनेविवर्तने जुह्वति २
yo vā aśvasya medhyasya lomanī veda | aśvasyaiva medhyasya lomam̐ llomañjuhoti | ahorātre vā aśvasya medhyasya lomanī |yatsāyamprātarjuhoti | aśvasyaiva medhyasya lomam̐ llomañjuhoti | etadanukṛti ha sma vai purā | aśvasya medhyasya lomam̐ llomañjuhvati | yo vā aśvasya medhyasya pade veda | aśvasyaiva medhyasya padepade juhoti | darśapūrṇamāsau vā aśvasya medhyasya pade 1 yaddarśapūrṇamāsau yajate | aśvasyaiva medhyasya padepade juhoti | etadanukṛti ha sma vai purā | aśvasya medhyasya padepade juhvati | yo vā aśvasya medhyasya vivartanaṃ veda | aśvasyaiva medhyasya vivartane vivartane juhoti | asau vā ādityo'śvaḥ | sa āhavanīyamāgacchati | tadvivartate | yadagnihotraṃ juhoti | aśvasyaiva medhyasya vivartanevivartane juhoti | etadanukṛti ha sma vai purā | aśvasya medhyasya vivartanevivartane juhvati 2
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.