सं ते मनसा मनः सम् प्राणेन प्राणो जुष्टं देवेभ्यो हव्यं घृतवत् स्वाहा । ऐन्द्रः प्राणो अङ्गेअङ्गे नि देध्यद् ऐन्द्रो ऽपानो अङ्गेअङ्गे वि बोभुवत् । देव त्वष्टर् भूरि ते सꣳसम् एतु विषुरूपा यत् सलक्ष्माणो भवथ । देवत्रा यन्तम् अवसे सखायो ऽनु त्वा माता पितरो मदन्तु ॥ श्रीर् असि । अग्निस् त्वा श्रीणातु । आपः सम् अरिणन् वातस्य (१) त्वा ध्रज्यै पूष्णो रꣳह्या अपाम् ओषधीनाꣳ रोहिष्यै घृतं घृतपावानः पिबत वसां वसापावानः पिबत । अन्तरिक्षस्य हविर् असि स्वाहा त्वान्तरिक्षाय दिशः प्रदिश आदिशो विदिश उद्दिशः स्वाहा दिग्भ्यो नमो दिग्भ्यः ॥
saṃ te manasā manaḥ sam prāṇena prāṇo juṣṭaṃ devebhyo havyaṃ ghṛtavat svāhā | aindraḥ prāṇo aṅgeaṅge ni dedhyad aindro 'pāno aṅgeaṅge vi bobhuvat | deva tvaṣṭar bhūri te sam̐sam etu viṣurūpā yat salakṣmāṇo bhavatha | devatrā yantam avase sakhāyo 'nu tvā mātā pitaro madantu || śrīr asi | agnis tvā śrīṇātu | āpaḥ sam ariṇan vātasya (1) tvā dhrajyai pūṣṇo ram̐hyā apām oṣadhīnām̐ rohiṣyai ghṛtaṃ ghṛtapāvānaḥ pibata vasāṃ vasāpāvānaḥ pibata | antarikṣasya havir asi svāhā tvāntarikṣāya diśaḥ pradiśa ādiśo vidiśa uddiśaḥ svāhā digbhyo namo digbhyaḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.