त्वꣳ सोम तनूकृद्भ्यो द्वेषोभ्यो ऽन्यकृतेभ्य उरु यन्तासि वरूथꣳ स्वाहा जुषाणो अप्तुर् आज्यस्य वेतु स्वाहा । अयं नो अग्निर् वरिवः कृणोत्व् अयम् मृधः पुर एतु प्रभिन्दन् । अयं शत्रूञ् जयतु जर्हृषाणो ऽयं वाजं जयतु वाजसातौ ॥ उरु विष्णो वि क्रमस्वोरु क्षयाय नः कृधि । घृतं घृतयोने पिब प्रप्र यज्ञपतिं तिर ॥ सोमो जिगाति गातुवित् देवानाम् एति निष्कृतम् ऋतस्य योनिम् आसदम् अदित्याः सदो ऽसि । अदित्याः सद आ सीद । एष वो देव सवितः सोमस् तꣳ रक्षध्वम् मा वो दभत् । एतत् त्वꣳ सोम देवो देवान् उपागा इदम् अहम् मनुष्यो मनुष्यान्त् सह प्रजया सह रायस् पोषेण नमो देवेभ्यः स्वधा पितृभ्यः । इदम् अहं निर् वरुणस्य पाशात् सुवर् अभि वि ख्येषं वैश्वानरं ज्योतिः । अग्ने व्रतपते त्वं व्रतानां व्रतपतिर् असि या मम तनूस् त्वय्य् अभूद् इयꣳ सा मयि या तव तनूर् मय्य् अभूद् एषा सा त्वयि यथायथं नौ व्रतपते व्रतिनोर् व्रतानि ॥
tvam̐ soma tanūkṛdbhyo dveṣobhyo 'nyakṛtebhya uru yantāsi varūtham̐ svāhā juṣāṇo aptur ājyasya vetu svāhā | ayaṃ no agnir varivaḥ kṛṇotv ayam mṛdhaḥ pura etu prabhindan | ayaṃ śatrūñ jayatu jarhṛṣāṇo 'yaṃ vājaṃ jayatu vājasātau || uru viṣṇo vi kramasvoru kṣayāya naḥ kṛdhi | ghṛtaṃ ghṛtayone piba prapra yajñapatiṃ tira || somo jigāti gātuvit devānām eti niṣkṛtam ṛtasya yonim āsadam adityāḥ sado 'si | adityāḥ sada ā sīda | eṣa vo deva savitaḥ somas tam̐ rakṣadhvam mā vo dabhat | etat tvam̐ soma devo devān upāgā idam aham manuṣyo manuṣyānt saha prajayā saha rāyas poṣeṇa namo devebhyaḥ svadhā pitṛbhyaḥ | idam ahaṃ nir varuṇasya pāśāt suvar abhi vi khyeṣaṃ vaiśvānaraṃ jyotiḥ | agne vratapate tvaṃ vratānāṃ vratapatir asi yā mama tanūs tvayy abhūd iyam̐ sā mayi yā tava tanūr mayy abhūd eṣā sā tvayi yathāyathaṃ nau vratapate vratinor vratāni ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.