धाता रातिः सवितेदं जुषन्ताम् प्रजापतिर् निधिपतिर् नो अग्निः । त्वष्टा विष्णुः प्रजया सꣳरराणो यजमानाय द्रविणं दधातु ॥ सम् इन्द्र णो मनसा नेषि गोभिः सꣳ सूरिभिर् मघवन्त् सꣳ स्वस्त्या । सम् ब्रह्मणा देवकृतं यद् अस्ति सं देवानाꣳ सुमत्या यज्ञियानाम् ॥ सं वर्चसा पयसा सं तनूभिर् अगन्महि मनसा सꣳ शिवेन । त्वष्टा नो अत्र वरिवः कृणोतु अनु मार्ष्टु तनुवो यद् विलिष्टम् ॥ यद् अद्य त्वा प्रयति यज्ञे अस्मिन्न् अग्ने होतारम् अवृणीमहीह । ऋधग् अयाड् ऋधग् उताशमिष्ठाः प्रजानन् यज्ञम् उप याहि विद्वान् ॥ स्वगा वो देवाः सदनम् अकर्म य आजग्म सवनेदं जुषाणाः । जक्षिवाꣳसः पपिवाꣳसश् च विश्वे ऽस्मे धत्त वसवो वसूनि ॥ यान् आवह उशतो देव देवान् तान् प्रेरय स्वे अग्ने सधस्थे । वहमाना भरमाणा हवीꣳषि वसुं घर्मं दिवम् आ तिष्ठतानु ॥ यज्ञ यज्ञं गच्छ यज्ञपतिं गच्छ स्वां योनिं गच्छ स्वाहा । एष ते यज्ञो यज्ञपते सहसूक्तवाकः सुवीरः स्वाहा देवा गातुविदो गातुं वित्त्वा गातुम् इत मनसस् पत इमं नो देव देवेषु यज्ञꣳ स्वाहा वाचि स्वाहा वाते धाः ॥
dhātā rātiḥ savitedaṃ juṣantām prajāpatir nidhipatir no agniḥ | tvaṣṭā viṣṇuḥ prajayā sam̐rarāṇo yajamānāya draviṇaṃ dadhātu || sam indra ṇo manasā neṣi gobhiḥ sam̐ sūribhir maghavant sam̐ svastyā | sam brahmaṇā devakṛtaṃ yad asti saṃ devānām̐ sumatyā yajñiyānām || saṃ varcasā payasā saṃ tanūbhir aganmahi manasā sam̐ śivena | tvaṣṭā no atra varivaḥ kṛṇotu anu mārṣṭu tanuvo yad viliṣṭam || yad adya tvā prayati yajñe asminn agne hotāram avṛṇīmahīha | ṛdhag ayāḍ ṛdhag utāśamiṣṭhāḥ prajānan yajñam upa yāhi vidvān || svagā vo devāḥ sadanam akarma ya ājagma savanedaṃ juṣāṇāḥ | jakṣivām̐saḥ papivām̐saś ca viśve 'sme dhatta vasavo vasūni || yān āvaha uśato deva devān tān preraya sve agne sadhasthe | vahamānā bharamāṇā havīm̐ṣi vasuṃ gharmaṃ divam ā tiṣṭhatānu || yajña yajñaṃ gaccha yajñapatiṃ gaccha svāṃ yoniṃ gaccha svāhā | eṣa te yajño yajñapate sahasūktavākaḥ suvīraḥ svāhā devā gātuvido gātuṃ vittvā gātum ita manasas pata imaṃ no deva deveṣu yajñam̐ svāhā vāci svāhā vāte dhāḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.