उरुꣳ हि राजा वरुणश् चकार सूर्याय पन्थाम् अन्वेतवा उ । अपदे पादा प्रतिधातवे ऽकर् उतापवक्ता हृदयाविधश् चित् ॥ शतं ते राजन् भिषजः सहस्रम् उर्वी गम्भीरा सुमतिष् टे अस्तु । बाधस्व द्वेषो निर्ऋतिम् पराचैः कृतं चिद् एनः प्र मुमुग्ध्य् अस्मत् अभिष्ठितो वरुणस्य पाशः । अग्नेर् अनीकम् अप आ विवेश । अपां नपात् प्रतिरक्षन्न् असुर्यं दमेदमे समिधं यक्ष्य् अग्ने । प्रति ते जिह्वा घृतम् उच् चरण्येत् समुद्रे ते हृदयम् अप्स्व् अन्तः । सं त्वा विशन्त्व् ओषधीर् उतापो यज्ञस्य त्वा यज्ञपते हविर्भिः । सूक्तवाके नमोवाके विधेम । अवभृथ निचंकुण निचेरुर् असि निचंकुणाव देवैर् देवकृतम् एनो ऽयाड् अव मर्त्यैर् मर्त्यकृतम् उरोर् आ नो देव रिषस् पाहि सुमित्रा न आप ओषधयः सन्तु दुर्मित्रास् तस्मै भूयासुर् यो ऽस्मान् द्वेष्टि यं च वयं द्विष्मः । देवीर् आप एष वो गर्भस् तं वः सुप्रीतꣳ सुभृतम् अकर्म देवेषु नः सुकृतो ब्रूतात् प्रतियुतो वरुणस्य पाशः प्रत्यस्तो वरुणस्य पाशः । एधो ऽस्य् एधिषीमहि समिद् असि तेजो ऽसि तेजो मयि धेहि । अपो अन्व् अचारिषꣳ रसेन सम् असृक्ष्महि पयस्वाꣳ अग्न आगमं तम् मा सꣳ सृज वर्चसा ॥
urum̐ hi rājā varuṇaś cakāra sūryāya panthām anvetavā u | apade pādā pratidhātave 'kar utāpavaktā hṛdayāvidhaś cit || śataṃ te rājan bhiṣajaḥ sahasram urvī gambhīrā sumatiṣ ṭe astu | bādhasva dveṣo nirṛtim parācaiḥ kṛtaṃ cid enaḥ pra mumugdhy asmat abhiṣṭhito varuṇasya pāśaḥ | agner anīkam apa ā viveśa | apāṃ napāt pratirakṣann asuryaṃ damedame samidhaṃ yakṣy agne | prati te jihvā ghṛtam uc caraṇyet samudre te hṛdayam apsv antaḥ | saṃ tvā viśantv oṣadhīr utāpo yajñasya tvā yajñapate havirbhiḥ | sūktavāke namovāke vidhema | avabhṛtha nicaṃkuṇa nicerur asi nicaṃkuṇāva devair devakṛtam eno 'yāḍ ava martyair martyakṛtam uror ā no deva riṣas pāhi sumitrā na āpa oṣadhayaḥ santu durmitrās tasmai bhūyāsur yo 'smān dveṣṭi yaṃ ca vayaṃ dviṣmaḥ | devīr āpa eṣa vo garbhas taṃ vaḥ suprītam̐ subhṛtam akarma deveṣu naḥ sukṛto brūtāt pratiyuto varuṇasya pāśaḥ pratyasto varuṇasya pāśaḥ | edho 'sy edhiṣīmahi samid asi tejo 'si tejo mayi dhehi | apo anv acāriṣam̐ rasena sam asṛkṣmahi payasvām̐ agna āgamaṃ tam mā sam̐ sṛja varcasā ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.