देवासुराः संयत्ता आसन् ते देवा विजयम् उपयन्तो ऽग्नौ वामं वसु सं न्य् अदधत । इदम् उ नो भविष्यति यदि नो जेष्यन्तीति तद् अग्निर् न्य् अकामयत तेनापाक्रामत् तद् देवा विजित्यावरुरुत्समाना अन्व् आयन् तद् अस्य सहसादित्सन्त सो ऽरोदीद् यद् अरोदीत् तद् रुद्रस्य रुद्रत्वम् । यद् अश्र्व् अशीयत तत् रजतꣳ हिरण्यम् अभवत् तस्माद् रजतꣳ हिरण्यम् अदक्षिण्यम् अश्रुजꣳ हि यो बर्हिषि ददाति पुरास्य संवत्सराद् गृहे रुदन्ति तस्माद् बर्हिषि न देयम् । सो ऽग्निर् अब्रवीद् भाग्य् असान्य् अथ व इदम् इति पुनराधेयं ते केवलम् इत्य् अब्रुवन्न् ऋध्नवत् खलु स इत्य् अब्रवीद् यो मद्देवत्यम् अग्निम् आदधाता इति तम् पूषाधत्त तेन पूषार्ध्नोत् तस्मात् पौष्णाः पशव उच्यन्ते तम् त्वष्टाऽऽधत्त तेन त्वष्टाऽऽर्ध्नोत् तस्मात् त्वाष्ट्राः पशव उच्यन्ते तम् मनुर् आधत्त तेन मनुर् आर्ध्नोत् तस्मान् मानव्यः प्रजा उच्यन्ते तम् धाताऽऽधत्त तेन धाताऽऽर्ध्नोत् संवत्सरो वै धाता तस्मात् संवत्सरम् प्रजाः पशवोनु प्र जायन्ते । य एवम् पुनराधेयस्यर्द्धिं वेद ऋध्नोत्य् एव यो ऽस्यैवं बन्धुतां वेद बन्धुमान् भवति । भागधेयं वा अग्निर् आहित इच्छमानः प्रजाम् पशून् यजमानस्योप दोद्राव । उद्वास्य पुनर् आ दधीत भागधेयेनैवैनꣳ सम् अर्धयत्य् अथो शान्तिर् एवास्यैषा पुनर्वस्वोर् आ दधीतैतद् वै पुनराधेयस्य नक्षत्रं यत् पुनर्वसू स्वायाम् एवैनं देवतायाम् आधाय ब्रह्मवर्चसी भवति दर्भैर् आ दधात्य् अयातयामत्वाय दर्भैर् आ दधात्य् अद्भ्य एवैनम् ओषधीभ्यो ऽवरुध्याऽऽधत्ते पञ्चकपालः पुरोडाशो भवति पञ्च वा ऋतव ऋतुभ्य एवैनम् अवरुध्याऽऽधत्ते ॥
devāsurāḥ saṃyattā āsan te devā vijayam upayanto 'gnau vāmaṃ vasu saṃ ny adadhata | idam u no bhaviṣyati yadi no jeṣyantīti tad agnir ny akāmayata tenāpākrāmat tad devā vijityāvarurutsamānā anv āyan tad asya sahasāditsanta so 'rodīd yad arodīt tad rudrasya rudratvam | yad aśrv aśīyata tat rajatam̐ hiraṇyam abhavat tasmād rajatam̐ hiraṇyam adakṣiṇyam aśrujam̐ hi yo barhiṣi dadāti purāsya saṃvatsarād gṛhe rudanti tasmād barhiṣi na deyam | so 'gnir abravīd bhāgy asāny atha va idam iti punarādheyaṃ te kevalam ity abruvann ṛdhnavat khalu sa ity abravīd yo maddevatyam agnim ādadhātā iti tam pūṣādhatta tena pūṣārdhnot tasmāt pauṣṇāḥ paśava ucyante tam tvaṣṭā''dhatta tena tvaṣṭā''rdhnot tasmāt tvāṣṭrāḥ paśava ucyante tam manur ādhatta tena manur ārdhnot tasmān mānavyaḥ prajā ucyante tam dhātā''dhatta tena dhātā''rdhnot saṃvatsaro vai dhātā tasmāt saṃvatsaram prajāḥ paśavonu pra jāyante | ya evam punarādheyasyarddhiṃ veda ṛdhnoty eva yo 'syaivaṃ bandhutāṃ veda bandhumān bhavati | bhāgadheyaṃ vā agnir āhita icchamānaḥ prajām paśūn yajamānasyopa dodrāva | udvāsya punar ā dadhīta bhāgadheyenaivainam̐ sam ardhayaty atho śāntir evāsyaiṣā punarvasvor ā dadhītaitad vai punarādheyasya nakṣatraṃ yat punarvasū svāyām evainaṃ devatāyām ādhāya brahmavarcasī bhavati darbhair ā dadhāty ayātayāmatvāya darbhair ā dadhāty adbhya evainam oṣadhībhyo 'varudhyā''dhatte pañcakapālaḥ puroḍāśo bhavati pañca vā ṛtava ṛtubhya evainam avarudhyā''dhatte ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.