सम् पश्यामि प्रजा अहम् इडप्रजसो मानवीः । सर्वा भवन्तु नो गृहे ॥ अम्भ स्थाम्भो वो भक्षीय मह स्थ महो वो भक्षीय सह स्थ सहो वो भक्षीयोर्ज स्थोर्जं वो भक्षीय रेवती रमध्वम् अस्मिम्̐ लोके ऽस्मिन् गोष्ठे ऽस्मिन् क्षये ऽस्मिन् योनाव् इहैव स्तेतो माऽप गात बह्वीर् मे भूयास्त ॥ सꣳहितासि विश्वरूपीर् आ मोर्जा विशा गौपत्येना रायस् पोषेण सहस्रपोषं वः पुष्यासम् मयि वो रायः श्रयन्ताम् उप त्वाग्ने दिवेदिवे दोषावस्तर् धिया वयम् । नमो भरन्त एमसि ॥ राजन्तम् अध्वराणाम् गोपाम् ऋतस्य दीदिविम् । वर्धमानꣳ स्वे दमे ॥ स नः पितेव सूनवे ऽग्ने सूपायनो भव । सचस्वा नः स्वस्तये ॥ अग्ने त्वं नो अन्तमः । उत त्राता शिवो भव वरूथ्यः । तं त्वा शोचिष्ठ दीदिवः । सुम्नाय नूनम् ईमहे सखिभ्यः । वसुर् अग्निर् वसुश्रवाः । अच्छा नक्षि द्युमत्तमो रयिं दाः ॥ ऊर्जा वः पश्याम्य् ऊर्जा मा पश्यत रायस् पोषेण वः पश्यामि रायस् पोषेण मा पश्यत । इडा स्थ मधुकृतः स्योना मा विशतेरा मदः । सहस्रपोषं वः पुष्यासम् ॥ मयि वो रायः श्रयन्ताम् ॥ तत् सवितुर् वरेण्यम् भर्गो देवस्य धीमहि । धियो यो नः प्रचोदयात् ॥ सोमानꣳ स्वरणं कृणुहि ब्रह्मणस् पते । कक्षीवन्तम् य औशिजम् ॥ कदा चन स्तरीर् असि नेन्द्र सश्चसि दाशुषे । उपोपेन् नु मघवन् भूय इन् नु ते दानं देवस्य पृच्यते ॥ परि त्वाग्ने पुरं वयं विप्रꣳ सहस्य धीमहि । धृषद्वर्णं दिवेदिवे भेत्तारम् भङ्गुरावतः ॥ अग्ने गृहपते सुगृहपतिर् अहं त्वया गृहपतिना भूयासꣳ सुगृहपतिर् मया त्वं गृहपतिना भूयाः शतꣳ हिमास् ताम् आशिषम् आ शासे तन्तवे ज्योतिष्मतीं ताम् आशिषम् आ शासे ऽमुष्मै ज्योतिष्मतीम् ॥
sam paśyāmi prajā aham iḍaprajaso mānavīḥ | sarvā bhavantu no gṛhe || ambha sthāmbho vo bhakṣīya maha stha maho vo bhakṣīya saha stha saho vo bhakṣīyorja sthorjaṃ vo bhakṣīya revatī ramadhvam asmim̐ loke 'smin goṣṭhe 'smin kṣaye 'smin yonāv ihaiva steto mā'pa gāta bahvīr me bhūyāsta || sam̐hitāsi viśvarūpīr ā morjā viśā gaupatyenā rāyas poṣeṇa sahasrapoṣaṃ vaḥ puṣyāsam mayi vo rāyaḥ śrayantām upa tvāgne divedive doṣāvastar dhiyā vayam | namo bharanta emasi || rājantam adhvarāṇām gopām ṛtasya dīdivim | vardhamānam̐ sve dame || sa naḥ piteva sūnave 'gne sūpāyano bhava | sacasvā naḥ svastaye || agne tvaṃ no antamaḥ | uta trātā śivo bhava varūthyaḥ | taṃ tvā śociṣṭha dīdivaḥ | sumnāya nūnam īmahe sakhibhyaḥ | vasur agnir vasuśravāḥ | acchā nakṣi dyumattamo rayiṃ dāḥ || ūrjā vaḥ paśyāmy ūrjā mā paśyata rāyas poṣeṇa vaḥ paśyāmi rāyas poṣeṇa mā paśyata | iḍā stha madhukṛtaḥ syonā mā viśaterā madaḥ | sahasrapoṣaṃ vaḥ puṣyāsam || mayi vo rāyaḥ śrayantām || tat savitur vareṇyam bhargo devasya dhīmahi | dhiyo yo naḥ pracodayāt || somānam̐ svaraṇaṃ kṛṇuhi brahmaṇas pate | kakṣīvantam ya auśijam || kadā cana starīr asi nendra saścasi dāśuṣe | upopen nu maghavan bhūya in nu te dānaṃ devasya pṛcyate || pari tvāgne puraṃ vayaṃ vipram̐ sahasya dhīmahi | dhṛṣadvarṇaṃ divedive bhettāram bhaṅgurāvataḥ || agne gṛhapate sugṛhapatir ahaṃ tvayā gṛhapatinā bhūyāsam̐ sugṛhapatir mayā tvaṃ gṛhapatinā bhūyāḥ śatam̐ himās tām āśiṣam ā śāse tantave jyotiṣmatīṃ tām āśiṣam ā śāse 'muṣmai jyotiṣmatīm ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.