अयज्ञो वा एष यो ऽसामोपप्रयन्तो अध्वरम् इत्य् आह स्तोमम् एवास्मै युनक्त्य् उपेत्य् आह प्रजा वै पशव उपेमं लोकम् प्रजाम् एव पशून् इमं लोकम् उपैति । अस्य प्रत्नाम् अनु द्युतम् इत्य् आह सुवर्गो वै लोकः प्रत्नः सुवर्गम् एव लोकꣳ समारोहति । अग्निर् मूर्धा दिवः ककुद् इत्य् आह मूर्धानम् एवैनꣳ समानानां करोत्य् अथो देवलोकाद् एव मनुष्यलोके प्रति तिष्ठति । अयम् इह प्रथमो धायि धातृभिर् इत्य् आह मुख्यम् एवैनं करोति । उभा वाम् इन्द्राग्नी आहुवध्या इत्य् आहौजो बलम् एवाव रुन्द्धे । अयं ते योनिर् ऋत्विय इत्य् आह पशवो वै रयिः पशून् एवाव रुन्द्धे षड्भिर् उप तिष्ठते षड् वै ऋतव ऋतुष्व् एव प्रति तिष्ठति षड्भिर् उत्तराभिर् उप तिष्ठते द्वादश सम् पद्यन्ते द्वादश मासाः संवत्सरः संवत्सर एव प्रति तिष्ठति यथा वै पुरुषो ऽश्वो गौर् जीर्यत्य् एवम् अग्निर् आहितो जीर्यति संवत्सरस्य परस्ताद् आग्निपावमानीभिर् उप तिष्ठते पुनर्नवम् एवैनम् अजरं करोत्य् अथो पुनात्य् एव । उप तिष्ठते योग एवास्यैष उप तिष्ठते ॥ दम एवास्यैष उप तिष्ठते याच्ञैवास्यैषोप तिष्ठते यथा पापीयाञ् छ्रेयस आहृत्य नमस्यति तादृग् एव तत् । आयुर्दा अग्ने ऽस्य् आयुर् मे देहीत्य् आहायुर्दा ह्य् एष वर्चोदा अग्ने ऽसि वर्चो मे देहीत्य् आह वर्चोदा ह्य् एष तनूपा अग्ने ऽसि तनुवम् मे पाहीत्य् आह ॥ तनूपा ह्य् एषः । अग्ने यन् मे तनुवा ऊनं तन् म आ पृणेत्य् आह यन् मे प्रजायै पशूनामूनं तन् म आ पूरयेति वावैतद् आह चित्रावसो स्वस्ति ते पारम् अशीयेत्य् आह रात्रिर् वै चित्रावसुर् अव्युष्ट्यै वा एतस्यै पुरा ब्राह्मणा अभैषुर् व्युष्टिम् एवाव रुन्द्धे । इन्धानास् त्वा शतम् हिमा इत्य् आह शतायुः पुरुषः शतेन्द्रिय आयुष्य् एवेन्द्रिये प्रति तिष्ठति । एषा वै सूर्मी कर्णकावत्य् एतया ह स्म वै देवा असुराणाꣳ शततर्हाꣳस् तृꣳहन्ति यद् एतया समिधम् आदधाति वज्रम् एवैतच् छतघ्नीं यजमानो भ्रातृव्याय प्र हरति स्तृत्या अच्छम्बट्कारम् । सं त्वम् अग्ने सूर्यस्य वर्चसागथा इत्य् आहैतत् त्वम् असीदम् अहम् भूयासम् इति वावैतद् आह त्वम् अग्ने सूर्यवर्चा असीत्य् आहाशिषम् एवैताम् आ शास्ते ॥
ayajño vā eṣa yo 'sāmopaprayanto adhvaram ity āha stomam evāsmai yunakty upety āha prajā vai paśava upemaṃ lokam prajām eva paśūn imaṃ lokam upaiti | asya pratnām anu dyutam ity āha suvargo vai lokaḥ pratnaḥ suvargam eva lokam̐ samārohati | agnir mūrdhā divaḥ kakud ity āha mūrdhānam evainam̐ samānānāṃ karoty atho devalokād eva manuṣyaloke prati tiṣṭhati | ayam iha prathamo dhāyi dhātṛbhir ity āha mukhyam evainaṃ karoti | ubhā vām indrāgnī āhuvadhyā ity āhaujo balam evāva runddhe | ayaṃ te yonir ṛtviya ity āha paśavo vai rayiḥ paśūn evāva runddhe ṣaḍbhir upa tiṣṭhate ṣaḍ vai ṛtava ṛtuṣv eva prati tiṣṭhati ṣaḍbhir uttarābhir upa tiṣṭhate dvādaśa sam padyante dvādaśa māsāḥ saṃvatsaraḥ saṃvatsara eva prati tiṣṭhati yathā vai puruṣo 'śvo gaur jīryaty evam agnir āhito jīryati saṃvatsarasya parastād āgnipāvamānībhir upa tiṣṭhate punarnavam evainam ajaraṃ karoty atho punāty eva | upa tiṣṭhate yoga evāsyaiṣa upa tiṣṭhate || dama evāsyaiṣa upa tiṣṭhate yācñaivāsyaiṣopa tiṣṭhate yathā pāpīyāñ chreyasa āhṛtya namasyati tādṛg eva tat | āyurdā agne 'sy āyur me dehīty āhāyurdā hy eṣa varcodā agne 'si varco me dehīty āha varcodā hy eṣa tanūpā agne 'si tanuvam me pāhīty āha || tanūpā hy eṣaḥ | agne yan me tanuvā ūnaṃ tan ma ā pṛṇety āha yan me prajāyai paśūnāmūnaṃ tan ma ā pūrayeti vāvaitad āha citrāvaso svasti te pāram aśīyety āha rātrir vai citrāvasur avyuṣṭyai vā etasyai purā brāhmaṇā abhaiṣur vyuṣṭim evāva runddhe | indhānās tvā śatam himā ity āha śatāyuḥ puruṣaḥ śatendriya āyuṣy evendriye prati tiṣṭhati | eṣā vai sūrmī karṇakāvaty etayā ha sma vai devā asurāṇām̐ śatatarhām̐s tṛm̐hanti yad etayā samidham ādadhāti vajram evaitac chataghnīṃ yajamāno bhrātṛvyāya pra harati stṛtyā acchambaṭkāram | saṃ tvam agne sūryasya varcasāgathā ity āhaitat tvam asīdam aham bhūyāsam iti vāvaitad āha tvam agne sūryavarcā asīty āhāśiṣam evaitām ā śāste ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.