आ प्यायतां ध्रुवा घृतेन यज्ञंयज्ञम् प्रति देवयद्भ्यः । सूर्याया ऊधो ऽदित्या उपस्थ उरुधारा पृथिवी यज्ञे अस्मिन् ॥ प्रजापतेर् विभान् नाम लोकस् तस्मिꣳस् त्वा दधामि सह यजमानेन सद् असि सन् मे भूयाः सर्वम् असि सर्वम् मे भूयाः पूर्णम् असि पूर्णम् मे भूया अक्षितम् असि मा मे क्षेष्ठाः । प्राच्यां दिशि देवा ऋत्विजो मार्जयन्तां दक्षिणायाम् दिशि मासाः पितरो मार्जयन्ताम् प्रतीच्यां दिशि गृहाः पशवो मार्जयन्ताम् उदीच्यां दिश्य् आप ओषधयो वनस्पतयो मार्जयन्तामूर्ध्वायां दिशि यज्ञः संवत्सरो यज्ञपतिर् मार्जयन्ताम् । विष्णोः क्रमो ऽस्य् अभिमातिहा गायत्रेण छन्दसा पृथिवीम् अनु वि क्रमे निर्भक्तः स यं द्विष्मः । विष्णोः क्रमो ऽस्य् अभिशस्तिहा त्रैष्टुभेन छन्दसान्तरिक्षम् अनु वि क्रमे निर्भक्तः स यं द्विष्मः । विष्णोः क्रमो ऽस्य् अरातीयतो हन्ता जागतेन छन्दसा दिवम् अनु वि क्रमे निर्भक्तः स यं द्विष्मः । विष्णोः क्रमो ऽसि शत्रूयतो हन्ताऽऽनुष्टुभेन छन्दसा दिशो ऽनु वि क्रमे निर्भक्तः स यं द्विष्मः ॥
ā pyāyatāṃ dhruvā ghṛtena yajñaṃyajñam prati devayadbhyaḥ | sūryāyā ūdho 'dityā upastha urudhārā pṛthivī yajñe asmin || prajāpater vibhān nāma lokas tasmim̐s tvā dadhāmi saha yajamānena sad asi san me bhūyāḥ sarvam asi sarvam me bhūyāḥ pūrṇam asi pūrṇam me bhūyā akṣitam asi mā me kṣeṣṭhāḥ | prācyāṃ diśi devā ṛtvijo mārjayantāṃ dakṣiṇāyām diśi māsāḥ pitaro mārjayantām pratīcyāṃ diśi gṛhāḥ paśavo mārjayantām udīcyāṃ diśy āpa oṣadhayo vanaspatayo mārjayantāmūrdhvāyāṃ diśi yajñaḥ saṃvatsaro yajñapatir mārjayantām | viṣṇoḥ kramo 'sy abhimātihā gāyatreṇa chandasā pṛthivīm anu vi krame nirbhaktaḥ sa yaṃ dviṣmaḥ | viṣṇoḥ kramo 'sy abhiśastihā traiṣṭubhena chandasāntarikṣam anu vi krame nirbhaktaḥ sa yaṃ dviṣmaḥ | viṣṇoḥ kramo 'sy arātīyato hantā jāgatena chandasā divam anu vi krame nirbhaktaḥ sa yaṃ dviṣmaḥ | viṣṇoḥ kramo 'si śatrūyato hantā''nuṣṭubhena chandasā diśo 'nu vi krame nirbhaktaḥ sa yaṃ dviṣmaḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.