यो वै श्रद्धाम् अनारभ्य यज्ञेन यजते नास्येष्टाय श्रद् दधते । अपः प्र णयति श्रद्धा वा आपः श्रद्धाम् एवारभ्य यज्ञेन यजत उभये ऽस्य देवमनुष्या इष्टाय श्रद् दधते तद् आहुर् अति वा एता वर्त्रं नेदन्त्य् अति वाचं मनो वावैता नाति नेदन्तीति मनसा प्र णयतीयं वै मनः अनयैवैनाः प्र णयत्य् अस्कन्नहविर् भवति य एवं वेद यज्ञायुधानि सम् भवति यज्ञो वै यज्ञायुधानि यज्ञम् एव तत् सम् भरति यद् एकमेकꣳ सम्भरेत् पितृदेवत्यानि स्युर् यत् सह सर्वाणि मानुषाणि द्वेद्वे सम् भरति याज्यानुवाक्ययोर् एव रूपं करोत्य् अथो मिथुनम् एव यो वै दश यज्ञायुधानि वेद मुखतो ऽस्य यज्ञः कल्पते स्फ्यः च कपालानि चाग्निहोत्रहवणी शूर्पं च कृष्णाजिनं च शम्या चोलूखलं च मुसलं च दृषच् चोपला चैतानि वै दश यज्ञायुधानि य एवं वेद मुखतो ऽस्य यज्ञः कल्पते यो वै देवेभ्यः प्रतिप्रोच्य यज्ञेन यजते जुषन्ते ऽस्य देवा हव्यम् हविर् निरुप्यमाणम् अभि मन्त्रयेताग्निꣳ होतारम् इह तꣳ हुव इति ॥ देवेभ्य एव प्रतिप्रोच्य यज्ञेन यजते जुषन्ते ऽस्य देवा हव्यम् एष वै यज्ञस्य ग्रहो गृहीत्वैव यज्ञेन यजते तद् उदित्वा वाचं यच्छति यज्ञस्य धृत्यै । अथो मनसा वै प्रजापतिर् यज्ञम् अतनुत मनसैव तद् यज्ञं तनुते रक्षसाम् अनन्ववचाराय यो वै यज्ञं योग आगते युनक्ति युङ्क्ते युञ्जानेषु कस् त्वा युनक्ति स त्वा युनक्त्व् इत्य् आह प्रजापतिर् वै कः प्रजापतिनैवैनं युनक्ति युङ्क्ते युञ्जानेषु ॥
yo vai śraddhām anārabhya yajñena yajate nāsyeṣṭāya śrad dadhate | apaḥ pra ṇayati śraddhā vā āpaḥ śraddhām evārabhya yajñena yajata ubhaye 'sya devamanuṣyā iṣṭāya śrad dadhate tad āhur ati vā etā vartraṃ nedanty ati vācaṃ mano vāvaitā nāti nedantīti manasā pra ṇayatīyaṃ vai manaḥ anayaivaināḥ pra ṇayaty askannahavir bhavati ya evaṃ veda yajñāyudhāni sam bhavati yajño vai yajñāyudhāni yajñam eva tat sam bharati yad ekamekam̐ sambharet pitṛdevatyāni syur yat saha sarvāṇi mānuṣāṇi dvedve sam bharati yājyānuvākyayor eva rūpaṃ karoty atho mithunam eva yo vai daśa yajñāyudhāni veda mukhato 'sya yajñaḥ kalpate sphyaḥ ca kapālāni cāgnihotrahavaṇī śūrpaṃ ca kṛṣṇājinaṃ ca śamyā colūkhalaṃ ca musalaṃ ca dṛṣac copalā caitāni vai daśa yajñāyudhāni ya evaṃ veda mukhato 'sya yajñaḥ kalpate yo vai devebhyaḥ pratiprocya yajñena yajate juṣante 'sya devā havyam havir nirupyamāṇam abhi mantrayetāgnim̐ hotāram iha tam̐ huva iti || devebhya eva pratiprocya yajñena yajate juṣante 'sya devā havyam eṣa vai yajñasya graho gṛhītvaiva yajñena yajate tad uditvā vācaṃ yacchati yajñasya dhṛtyai | atho manasā vai prajāpatir yajñam atanuta manasaiva tad yajñaṃ tanute rakṣasām ananvavacārāya yo vai yajñaṃ yoga āgate yunakti yuṅkte yuñjāneṣu kas tvā yunakti sa tvā yunaktv ity āha prajāpatir vai kaḥ prajāpatinaivainaṃ yunakti yuṅkte yuñjāneṣu ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.