क्षत्रस्योल्बम् असि क्षत्रस्य योनिर् असि जाय एहि सुवो रोहाव रोहाव हि सुवर् अहं नाव् उभयोः सुवो रोक्ष्यामि वाजश् च प्रसवश् चापिजश् च क्रतुश् च सुवश् च मूर्धा च व्यश्नियश् चाऽऽन्त्यायनश् चान्त्यश् च भौवनश् च भुवनश् चाधिपतिश् च । आयुर् यज्ञेन कल्पताम् प्राणो यज्ञेन कल्पताम् अपानः यज्ञेन कल्पतां व्यानो यज्ञेन कल्पतां चक्षुर् यज्ञेन कल्पताꣳ श्रोत्रं यज्ञेन कल्पताम् मनो यज्ञेन कल्पतां वाग् यज्ञेन कल्पताम् आत्मा यज्ञेन कल्पतां यज्ञो यज्ञेन कल्पताम् । सुवर् देवाꣳ अगन्मामृता अभूम प्रजापतेः प्रजा अभूम सम् अहम् प्रजया सम् मया प्रजा सम् अहꣳ रायस् पोषेण सम् मया रायस् पोषः । अन्नाय त्वान्नाद्याय त्वा वाजाय त्वा वाजजित्यायै त्वा । अमृतम् असि पुष्टिर् असि प्रजननम् असि ॥
kṣatrasyolbam asi kṣatrasya yonir asi jāya ehi suvo rohāva rohāva hi suvar ahaṃ nāv ubhayoḥ suvo rokṣyāmi vājaś ca prasavaś cāpijaś ca kratuś ca suvaś ca mūrdhā ca vyaśniyaś cā''ntyāyanaś cāntyaś ca bhauvanaś ca bhuvanaś cādhipatiś ca | āyur yajñena kalpatām prāṇo yajñena kalpatām apānaḥ yajñena kalpatāṃ vyāno yajñena kalpatāṃ cakṣur yajñena kalpatām̐ śrotraṃ yajñena kalpatām mano yajñena kalpatāṃ vāg yajñena kalpatām ātmā yajñena kalpatāṃ yajño yajñena kalpatām | suvar devām̐ aganmāmṛtā abhūma prajāpateḥ prajā abhūma sam aham prajayā sam mayā prajā sam aham̐ rāyas poṣeṇa sam mayā rāyas poṣaḥ | annāya tvānnādyāya tvā vājāya tvā vājajityāyai tvā | amṛtam asi puṣṭir asi prajananam asi ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.