अग्नये गृहपतये पुरोडाशम् अष्टाकपालं निर् वपति कृष्णानां व्रीहीणाꣳ सोमाय वनस्पतये श्यामाकं चरुꣳ सवित्रे सत्यप्रसवाय पुरोडाशं द्वादशकपालम् आशूनां व्रीहीणाꣳ रुद्राय पशुपतये गावीधुकं चरुम् बृहस्पतये वाचस्पतये नैवारं चरुम् इन्द्राय ज्येष्ठाय पुरोडाशम् एकादशकपालम् महाव्रीहीणाम् मित्राय सत्यायाम्बानां चरुं वरुणाय धर्मपतये यवमयं चरुम् । सविता त्वा प्रसवानाꣳ सुवताम् अग्निर् गृहपतीनाꣳ सोमो वनस्पतीनाꣳ रुद्रः पशूनाम् बृहस्पतिर् वाचाम् इन्द्रो ज्येष्ठानाम् मित्रः सत्यानां वरुणो धर्मपतीनाम् । ये देवा देवसुव स्थ त इमम् आमुष्यायणम् अनमित्राय सुवध्वम् महते क्षत्राय महत आधिपत्याय महते जानराज्याय । एष वो भरता राजा सोमो ऽस्माकम् ब्राह्मणानाꣳ राजा प्रति त्यन् नाम राज्यम् अधायि स्वां तनुवं वरुणो अशिश्रेच् छुचेर् मित्रस्य व्रत्या अभूमामन्महि महत ऋतस्य नाम सर्वे व्राता वरुणस्याभूवन् वि मित्र एवैर् अरातिम् अतारीद् असूषुदन्त यज्ञिया ऋतेन व्य् उ त्रितो जरिमाणं न आनड् विष्णोः क्रमो ऽसि विष्णोः क्रान्तम् असि विष्णोर् विक्रान्तम् असि
agnaye gṛhapataye puroḍāśam aṣṭākapālaṃ nir vapati kṛṣṇānāṃ vrīhīṇām̐ somāya vanaspataye śyāmākaṃ carum̐ savitre satyaprasavāya puroḍāśaṃ dvādaśakapālam āśūnāṃ vrīhīṇām̐ rudrāya paśupataye gāvīdhukaṃ carum bṛhaspataye vācaspataye naivāraṃ carum indrāya jyeṣṭhāya puroḍāśam ekādaśakapālam mahāvrīhīṇām mitrāya satyāyāmbānāṃ caruṃ varuṇāya dharmapataye yavamayaṃ carum | savitā tvā prasavānām̐ suvatām agnir gṛhapatīnām̐ somo vanaspatīnām̐ rudraḥ paśūnām bṛhaspatir vācām indro jyeṣṭhānām mitraḥ satyānāṃ varuṇo dharmapatīnām | ye devā devasuva stha ta imam āmuṣyāyaṇam anamitrāya suvadhvam mahate kṣatrāya mahata ādhipatyāya mahate jānarājyāya | eṣa vo bharatā rājā somo 'smākam brāhmaṇānām̐ rājā prati tyan nāma rājyam adhāyi svāṃ tanuvaṃ varuṇo aśiśrec chucer mitrasya vratyā abhūmāmanmahi mahata ṛtasya nāma sarve vrātā varuṇasyābhūvan vi mitra evair arātim atārīd asūṣudanta yajñiyā ṛtena vy u trito jarimāṇaṃ na ānaḍ viṣṇoḥ kramo 'si viṣṇoḥ krāntam asi viṣṇor vikrāntam asi
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.