प्रतिपूरुषम् एककपालान् निर् वपत्य् एकम् अतिरिक्तम् । यावन्तो गृह्याः स्मस् तेभ्यः कम् अकरम् पशूनाꣳ शर्मासि शर्म यजमानस्य शर्म मे यच्छ । एक एव रुद्रो न द्वितीयाय तस्थे । आखुस् ते रुद्र पशुस् तं जुषस्व । एष ते रुद्र भागः सह स्वस्राम्बिकया तं जुषस्व भेषजं गवे ऽश्वाय पुरुषाय भेषजम् अथो अस्मभ्यम् भेषजꣳ सुभेषजम् यथाऽसति सुगम् मेषाय मेष्यै अवाम्ब रुद्रम् अदिमह्य् अव देवं त्र्यम्बकम् । यथा नः श्रेयसः करद् यथा नो वस्यसः करद् यथा नः पशुमतः करद् यथा नो व्यवसाययात् ॥ त्र्यम्बकं यजामहे सुगन्धिम् पुष्टिवर्धनम् । उर्वारुकम् इव बन्धनान् मृत्योर् मुक्षीय मामृतात् । एष ते रुद्र भागस् तं जुषस्व तेनावसेन परो मूजवतो ऽतीहि । अवततधन्वा पिनाकहस्तः कृत्तिवासाः ॥ सायणभाष्यम्१
pratipūruṣam ekakapālān nir vapaty ekam atiriktam | yāvanto gṛhyāḥ smas tebhyaḥ kam akaram paśūnām̐ śarmāsi śarma yajamānasya śarma me yaccha | eka eva rudro na dvitīyāya tasthe | ākhus te rudra paśus taṃ juṣasva | eṣa te rudra bhāgaḥ saha svasrāmbikayā taṃ juṣasva bheṣajaṃ gave 'śvāya puruṣāya bheṣajam atho asmabhyam bheṣajam̐ subheṣajam yathā'sati sugam meṣāya meṣyai avāmba rudram adimahy ava devaṃ tryambakam | yathā naḥ śreyasaḥ karad yathā no vasyasaḥ karad yathā naḥ paśumataḥ karad yathā no vyavasāyayāt || tryambakaṃ yajāmahe sugandhim puṣṭivardhanam | urvārukam iva bandhanān mṛtyor mukṣīya māmṛtāt | eṣa te rudra bhāgas taṃ juṣasva tenāvasena paro mūjavato 'tīhi | avatatadhanvā pinākahastaḥ kṛttivāsāḥ || sāyaṇabhāṣyam1
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.