आश्विनं धूम्रललामम् आ लभेत यो दुर्ब्राह्मणः सोमम् पिपासेत् । अश्विनौ वै देवानाम् असोमपाव् आस्ताम् । तौ पश्चा सोमपीथम् प्राप्नुताम् अश्विनाव् एतस्य देवता यो दुर्ब्राह्मणः सोमम् पिपासति । अश्विनाव् एव स्वेन भागधेयेनोप धावति तव् एवास्मै सोमपीथम् प्र यच्छत उपैनꣳ सोमपीथो नमति यद् धूम्रो भवति धूम्रिमाणम् एवास्माद् अप हन्ति ललामः भवति मुखत एवास्मिन् तेजो दधाति। वायव्यं गोमृगम् आ लभेत यम् अजघ्निवाꣳसम् अभिशꣳसेयुः । अपूता वा एतं वाग् ऋच्छति यम् अजघ्निवाꣳसम् अभिशꣳसन्ति नैष ग्राम्यः पशुर् नारण्यो यद् गोमृगः । नेवैष ग्रामे नारण्ये यम् अजघ्निवाꣳसम् अभिशꣳसन्ति वायुर् वै देवानाम् पवित्रम् । वायुम् एव स्वेन भागधेयेनोप धावति स एव एनम् पवयति पराची वा एतस्मै व्युच्छन्ती व्य् उच्छति तमः पाप्मानम् प्र विशति यस्याश्विने शस्यमाने सूर्यो नाविर् भवति सौर्यम् बहुरूपम् आ लभेत । अमुम् एवादित्यꣳ स्वेन भागधेयेनोप धावति स एवास्मात् तमः पाप्मानम् अप हन्ति प्रतीच्य् अस्मै व्युच्छन्ती व्य् उच्छत्य् अप तमः पाप्मानꣳ हते ॥
āśvinaṃ dhūmralalāmam ā labheta yo durbrāhmaṇaḥ somam pipāset | aśvinau vai devānām asomapāv āstām | tau paścā somapītham prāpnutām aśvināv etasya devatā yo durbrāhmaṇaḥ somam pipāsati | aśvināv eva svena bhāgadheyenopa dhāvati tav evāsmai somapītham pra yacchata upainam̐ somapītho namati yad dhūmro bhavati dhūmrimāṇam evāsmād apa hanti lalāmaḥ bhavati mukhata evāsmin tejo dadhāti| vāyavyaṃ gomṛgam ā labheta yam ajaghnivām̐sam abhiśam̐seyuḥ | apūtā vā etaṃ vāg ṛcchati yam ajaghnivām̐sam abhiśam̐santi naiṣa grāmyaḥ paśur nāraṇyo yad gomṛgaḥ | nevaiṣa grāme nāraṇye yam ajaghnivām̐sam abhiśam̐santi vāyur vai devānām pavitram | vāyum eva svena bhāgadheyenopa dhāvati sa eva enam pavayati parācī vā etasmai vyucchantī vy ucchati tamaḥ pāpmānam pra viśati yasyāśvine śasyamāne sūryo nāvir bhavati sauryam bahurūpam ā labheta | amum evādityam̐ svena bhāgadheyenopa dhāvati sa evāsmāt tamaḥ pāpmānam apa hanti pratīcy asmai vyucchantī vy ucchaty apa tamaḥ pāpmānam̐ hate ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.