वरुणꣳ सुषुवाणम् अन्नाद्यं नोपानमत् स एतां वारुणीं कृष्णां वशाम् अपश्यत् ताꣳ स्वायै देवताया आलभत ततो वै तम् अन्नाद्यम् उपानमत् । यम् अलम् अन्नाद्याय सन्तम् अन्नाद्यं नोपनमेत् स एतां वारुणीं कृष्णां वशाम् आ लभेत वरुणम् एव स्वेन भागधेयेनोप धावति स एवास्मा अन्नम् प्र यच्छत्य् अन्नादः एव भवति। कृष्णा भवति वारुणी ह्य् एषा देवतया समृद्ध्यै मैत्रꣳ श्वेतम् आ लभेत वारुणं कृष्णम् अपां चौषधीनां च संधाव् अन्नकामः । मैत्रीर् वा ओषधयो वारुणीर् आपः । अपां च खलु वा ओषधीनां च रसम् उप जीवामः । मित्रावरुणाव् एव स्वेन भागधेयेनोप धावति ताव् एवास्मा अन्नम् प्र यच्छतो ऽन्नाद एव भवति ॥ अपां चौषधीनां च संधाव् आ लभत उभयस्यावरुद्ध्यै मैत्रꣳ श्वेतम् आ लभेत वारुणं कृष्णं ज्योगामयावी यन् मैत्रो भवति मित्रेणैवास्मै वरुणꣳ शमयति यद् वारुणः साक्षाद् एवैनं वरुणपाशान् मुञ्चति । उत यदीतासुर् भवति जीवत्य् एव देवा वै पुष्टिं नाविन्दन् । ताम् मिथुने ऽपश्यन् तस्याम् न सम् अराधयन् ताव् अश्विनाव् अब्रूताम् आवयोर् वा एषा मैतस्यां वदध्वम् इति साश्विनोर् एवाभवत् । यः पुष्टिकामः स्यात् स एताम् आश्विनीं यमीं वशाम् आ लभेत । अश्विनाव् एव स्वेन भागधेयेनोप धावति ताव् एवास्मिन् पुष्टिं धत्तः पुष्यति प्रजया पशुभिः ॥
varuṇam̐ suṣuvāṇam annādyaṃ nopānamat sa etāṃ vāruṇīṃ kṛṣṇāṃ vaśām apaśyat tām̐ svāyai devatāyā ālabhata tato vai tam annādyam upānamat | yam alam annādyāya santam annādyaṃ nopanamet sa etāṃ vāruṇīṃ kṛṣṇāṃ vaśām ā labheta varuṇam eva svena bhāgadheyenopa dhāvati sa evāsmā annam pra yacchaty annādaḥ eva bhavati| kṛṣṇā bhavati vāruṇī hy eṣā devatayā samṛddhyai maitram̐ śvetam ā labheta vāruṇaṃ kṛṣṇam apāṃ cauṣadhīnāṃ ca saṃdhāv annakāmaḥ | maitrīr vā oṣadhayo vāruṇīr āpaḥ | apāṃ ca khalu vā oṣadhīnāṃ ca rasam upa jīvāmaḥ | mitrāvaruṇāv eva svena bhāgadheyenopa dhāvati tāv evāsmā annam pra yacchato 'nnāda eva bhavati || apāṃ cauṣadhīnāṃ ca saṃdhāv ā labhata ubhayasyāvaruddhyai maitram̐ śvetam ā labheta vāruṇaṃ kṛṣṇaṃ jyogāmayāvī yan maitro bhavati mitreṇaivāsmai varuṇam̐ śamayati yad vāruṇaḥ sākṣād evainaṃ varuṇapāśān muñcati | uta yadītāsur bhavati jīvaty eva devā vai puṣṭiṃ nāvindan | tām mithune 'paśyan tasyām na sam arādhayan tāv aśvināv abrūtām āvayor vā eṣā maitasyāṃ vadadhvam iti sāśvinor evābhavat | yaḥ puṣṭikāmaḥ syāt sa etām āśvinīṃ yamīṃ vaśām ā labheta | aśvināv eva svena bhāgadheyenopa dhāvati tāv evāsmin puṣṭiṃ dhattaḥ puṣyati prajayā paśubhiḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.