बार्हस्पत्यꣳ शितिपृष्ठम् आ लभेत ग्रामकामो यः कामयेत पृष्ठꣳ समानानाꣳ स्याम् इति बृहस्पतिम् एव स्वेन भागधेयेनोप धावति स एवैनम् पृष्ठꣳ समानानां करोति ग्राम्य् एव भवति शितिपृष्ठो भवति बार्हस्पत्यो ह्य् एष देवतया समृद्धयै पौष्णꣳ श्यामम् आ लभेतान्नकामः । अन्नं वै पूषा पूषणम् एव स्वेन भागधेयेनोप धावति स एवास्मै अन्नम् प्र यच्छति । अन्नाद एव भवति श्यामो भवति । एतद् वा अन्नस्य रूपम् । समृद्ध्यै मारुतम् पृश्निम् आ लभेतान्नकामः । अन्नं वै मरुतः । मरुत एव स्वेन भागधेयेनोप धावति त एवास्मा अन्नम् प्र यच्छन्ति । अन्नाद एव भवति पृश्निर् भवति । एतद् वा अन्नस्य रूपम् । समृद्ध्यै । ऐन्द्रम् अरुणम् आ लभेतेन्द्रियकामः । इन्द्रम् एव स्वेन भागधेयेनोप धावति स एवास्मिन्न् इन्द्रियं दधाति । इन्द्रियाव्य् एव भवति । अरुणो भ्रूमान् भवति । एतद् वा इन्द्रस्य रूपम् । समृद्ध्यै सावित्रम् उपध्वस्तम् आ लभेत सनिकामः सविता वै प्रसवानाम् ईशे सवितारम् एव स्वेन भागधेयेनोप धावति स एवास्मै सनिम् प्र सुवति दानकामा अस्मै प्रजा भवन्ति । उपध्वस्तो भवति सावित्रो ह्य् एषः देवतया ।समृद्ध्यै। वैश्वदेवम् बहुरूपम् आ लभेतान्नकामः । वैश्वदेवं वा अन्नम् । विश्वान् एव देवान्त् स्वेन भागधेयेनोप धावति त एवास्मा अन्नम् प्र यच्छन्ति । अन्नाद एव भवति बहुरूपो भवति बहुरूपꣳ ह्य् अन्नम् । समृद्ध्यै । वैश्वदेवम् बहुरूपम् आ लभेत ग्रामकामः । वैश्वदेवा वै सजाताः । विश्वान् एव देवान्त् स्वेन भागधेयेनोप धावति त एवास्मै सजातान् प्र यच्छन्ति। ग्राम्य् एव भवति बहुरूपो भवति बहुदेवत्यो ह्य् एषः । समृद्ध्यै प्रजापत्यं तूपरम् आ लभेत यस्यानाज्ञातम् एव ज्योग् आमयेत् प्राजापत्यो वै पुरुषः प्रजापतिः खलु वै तस्य वेद यस्यानाज्ञातम् इव ज्योग् आमयति प्रजापतिम् एव स्वेन भागधेयेनोप धावति स एवैनं तस्मात् स्रामान् मुञ्चति तूपरो भवति प्राजापत्यो ह्य् एष देवतया समृद्ध्यै ॥
bārhaspatyam̐ śitipṛṣṭham ā labheta grāmakāmo yaḥ kāmayeta pṛṣṭham̐ samānānām̐ syām iti bṛhaspatim eva svena bhāgadheyenopa dhāvati sa evainam pṛṣṭham̐ samānānāṃ karoti grāmy eva bhavati śitipṛṣṭho bhavati bārhaspatyo hy eṣa devatayā samṛddhayai pauṣṇam̐ śyāmam ā labhetānnakāmaḥ | annaṃ vai pūṣā pūṣaṇam eva svena bhāgadheyenopa dhāvati sa evāsmai annam pra yacchati | annāda eva bhavati śyāmo bhavati | etad vā annasya rūpam | samṛddhyai mārutam pṛśnim ā labhetānnakāmaḥ | annaṃ vai marutaḥ | maruta eva svena bhāgadheyenopa dhāvati ta evāsmā annam pra yacchanti | annāda eva bhavati pṛśnir bhavati | etad vā annasya rūpam | samṛddhyai | aindram aruṇam ā labhetendriyakāmaḥ | indram eva svena bhāgadheyenopa dhāvati sa evāsminn indriyaṃ dadhāti | indriyāvy eva bhavati | aruṇo bhrūmān bhavati | etad vā indrasya rūpam | samṛddhyai sāvitram upadhvastam ā labheta sanikāmaḥ savitā vai prasavānām īśe savitāram eva svena bhāgadheyenopa dhāvati sa evāsmai sanim pra suvati dānakāmā asmai prajā bhavanti | upadhvasto bhavati sāvitro hy eṣaḥ devatayā |samṛddhyai| vaiśvadevam bahurūpam ā labhetānnakāmaḥ | vaiśvadevaṃ vā annam | viśvān eva devānt svena bhāgadheyenopa dhāvati ta evāsmā annam pra yacchanti | annāda eva bhavati bahurūpo bhavati bahurūpam̐ hy annam | samṛddhyai | vaiśvadevam bahurūpam ā labheta grāmakāmaḥ | vaiśvadevā vai sajātāḥ | viśvān eva devānt svena bhāgadheyenopa dhāvati ta evāsmai sajātān pra yacchanti| grāmy eva bhavati bahurūpo bhavati bahudevatyo hy eṣaḥ | samṛddhyai prajāpatyaṃ tūparam ā labheta yasyānājñātam eva jyog āmayet prājāpatyo vai puruṣaḥ prajāpatiḥ khalu vai tasya veda yasyānājñātam iva jyog āmayati prajāpatim eva svena bhāgadheyenopa dhāvati sa evainaṃ tasmāt srāmān muñcati tūparo bhavati prājāpatyo hy eṣa devatayā samṛddhyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.