इन्द्रायान्वृजवे पुरोडाशम् एकादशकपालं निर् वपेद् ग्रामकामः । इन्द्रम् एवान्वृजुꣳ स्वेन भागधेयेनोप धावति स एवास्मै सजातान् अनुकान् करोति ग्राम्य् एव भवति । इन्द्राण्यै चरुं निर् वपेद् यस्य सेनाऽसꣳशितेव स्यात् । इन्द्राणी वै सेनायै देवता । इन्द्राणीं एव स्वेन भागधेयेनोप धावति सैवास्य सेनाꣳ सꣳ श्यति बल्बजान् अपि इध्मे सं नह्येत् । गौर् यत्राधिष्कन्ना न्यमेहत् ततो बल्बजा उद् अतिष्ठन् गवाम् एवैनं न्यायम् अपिनीय गा वेदयति । इन्द्राय मन्युमते मनस्वते पुरोडाशम् एकादशकपालं निर् वपेत् संग्रामे संयत्ते । इन्द्रियेण वै मन्युना मनसा संग्रामं जयति । इन्द्रम् एव मन्युमन्तम् मनस्वन्तꣳ स्वेन भागधेयेनोप धावति स एवास्मिन्न् इन्द्रियम् मन्युम् मनो दधाति जयति तम् संग्रामम् एताम् एव निर् वपेद् यो हतमनाः स्वयम्पाप इव स्यात् । एतानि हि वा एतस्माद् अपक्रान्तानि । अथैष हतमनाः स्वयम्पाप इन्द्रम् एव मन्युमन्तम् मनस्वन्तꣳ स्वेन भागधेयेनोप धावति स एवास्मिन्न् इन्द्रियम् मन्युम् मनो दधाति न हतमनाः स्वयम्पापो भवति । इन्द्राय दात्रे पुरोडाशम् एकादशकपालं निर् वपेद् यः कामयेत दानकामा मे प्रजाः स्युः इति । इन्द्रम् एव दातारꣳ स्वेन भागधेयेनोप धावति स एवास्मै दानकामाः प्रजाः करोति दानकामा अस्मै प्रजा भवन्ति । इन्द्राय प्रदात्रे पुरोडाशम् एकादशकपालं निर् वपेद् यस्मै प्रत्तम् इव सन् न प्रदीयेत । इन्द्रम् एव प्रदातारꣳ स्वेन भागधेयेनोप धावति स एवास्मै प्र दापयति । इन्द्राय सुत्राम्णे पुरोडाशम् एकादशकपालं निर् वपेद् अपरुद्धो वा ॥ अपरुध्यमानो वा । इन्द्रम् एव सुत्रामाणꣳ स्वेन भागधेयेनोप धावति स एवैनं त्रायते । अनपरुध्यो भवति । इन्द्रो वै सदृङ् देवताभिर् आसीत् स न व्यावृतम् अगच्छत् स प्रजापतिम् उपाधावत् तस्मा एतम् ऐन्द्रम् एकादशकपालं निर् अवपत् तेनैवास्मिन्न् इन्द्रियम् अदधात् । शक्वरी याज्यानुवाक्ये अकरोत् । वज्रो वै शक्वरी स एनं वज्रो भूत्या ऐन्द्ध । सो ऽभवत् सो ऽबिभेद् भूतः प्र मा धक्ष्यतीति स प्रजापतिम् पुनर् उपाधावत् स प्रजापतिः शक्वर्या अधि रेवतीं निर् अमिमीत शान्त्या अप्रदाहाय यो ऽलꣳ श्रियै सन्त् सदृङ्क् समानैः स्यात् तस्मा एतमैन्द्रम् एकादशकपालं निर् वपेत् । इन्द्रम् एव स्वेन भागधेयेनोप धावति स एवास्मिन्न् इन्द्रियं दधाति रेवती पुरोऽनुवाक्या भवति शान्त्या अप्रदाहाय 0 शक्वरी याज्या 1 वज्रो वै शक्वरी 2 स एनं वज्रो भूत्या इन्द्धे 3 भवत्य् एव ॥
indrāyānvṛjave puroḍāśam ekādaśakapālaṃ nir vaped grāmakāmaḥ | indram evānvṛjum̐ svena bhāgadheyenopa dhāvati sa evāsmai sajātān anukān karoti grāmy eva bhavati | indrāṇyai caruṃ nir vaped yasya senā'sam̐śiteva syāt | indrāṇī vai senāyai devatā | indrāṇīṃ eva svena bhāgadheyenopa dhāvati saivāsya senām̐ sam̐ śyati balbajān api idhme saṃ nahyet | gaur yatrādhiṣkannā nyamehat tato balbajā ud atiṣṭhan gavām evainaṃ nyāyam apinīya gā vedayati | indrāya manyumate manasvate puroḍāśam ekādaśakapālaṃ nir vapet saṃgrāme saṃyatte | indriyeṇa vai manyunā manasā saṃgrāmaṃ jayati | indram eva manyumantam manasvantam̐ svena bhāgadheyenopa dhāvati sa evāsminn indriyam manyum mano dadhāti jayati tam saṃgrāmam etām eva nir vaped yo hatamanāḥ svayampāpa iva syāt | etāni hi vā etasmād apakrāntāni | athaiṣa hatamanāḥ svayampāpa indram eva manyumantam manasvantam̐ svena bhāgadheyenopa dhāvati sa evāsminn indriyam manyum mano dadhāti na hatamanāḥ svayampāpo bhavati | indrāya dātre puroḍāśam ekādaśakapālaṃ nir vaped yaḥ kāmayeta dānakāmā me prajāḥ syuḥ iti | indram eva dātāram̐ svena bhāgadheyenopa dhāvati sa evāsmai dānakāmāḥ prajāḥ karoti dānakāmā asmai prajā bhavanti | indrāya pradātre puroḍāśam ekādaśakapālaṃ nir vaped yasmai prattam iva san na pradīyeta | indram eva pradātāram̐ svena bhāgadheyenopa dhāvati sa evāsmai pra dāpayati | indrāya sutrāmṇe puroḍāśam ekādaśakapālaṃ nir vaped aparuddho vā || aparudhyamāno vā | indram eva sutrāmāṇam̐ svena bhāgadheyenopa dhāvati sa evainaṃ trāyate | anaparudhyo bhavati | indro vai sadṛṅ devatābhir āsīt sa na vyāvṛtam agacchat sa prajāpatim upādhāvat tasmā etam aindram ekādaśakapālaṃ nir avapat tenaivāsminn indriyam adadhāt | śakvarī yājyānuvākye akarot | vajro vai śakvarī sa enaṃ vajro bhūtyā ainddha | so 'bhavat so 'bibhed bhūtaḥ pra mā dhakṣyatīti sa prajāpatim punar upādhāvat sa prajāpatiḥ śakvaryā adhi revatīṃ nir amimīta śāntyā apradāhāya yo 'lam̐ śriyai sant sadṛṅk samānaiḥ syāt tasmā etamaindram ekādaśakapālaṃ nir vapet | indram eva svena bhāgadheyenopa dhāvati sa evāsminn indriyaṃ dadhāti revatī puro'nuvākyā bhavati śāntyā apradāhāya 0 śakvarī yājyā 1 vajro vai śakvarī 2 sa enaṃ vajro bhūtyā inddhe 3 bhavaty eva ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.