आदित्येभ्यो भुवद्वद्भ्यश् चरुं निर् वपेद् भूतिकामः । आदित्या वा एतम् भूत्यै प्रति नुदन्ते यो ऽलम् भूत्यै सन् भूतिं न प्राप्नोति । आदित्यान् एव भुवद्वतः स्वेन भागधेयेनोप धावति त एवैनम् भूतिं गमयन्ति भवत्य् एव । आदित्येभ्यो धारयद्वद्भ्यश् चरुं निर् वपेद् अपरुद्धो वाऽपरुध्यमानो वा । आदित्या वा अपरोद्धार आदित्या अवगमयितारः । आदित्यान् एव धारयद्वतः स्वेन भागधेयेनोप धावति त एवैनं विशि दाध्रति । अनपरुध्यो भवति । अदिते ऽनु मन्यस्वेत्य् अपरुध्यमानो ऽस्य पदम् आ ददीत । इयं वा अदितिः । इयम् एवास्मै राज्यम् अनु मन्यते सत्याशीर् इत्य् आह सत्याम् एवाशिषं कुरुते । इह मन इत्य् आह प्रजा एवास्मै समनसः करोति । उप प्रेत मरुतः सुदानव एना विश्पतिनाऽभ्य् अमुꣳ राजानम् इत्य् आह मारुती वै विड् ज्येष्ठो विश्पतिः । विशैवैनꣳ राष्ट्रेन सम् अर्धयति यः परस्ताद् ग्राम्यवादी स्यात् तस्य गृहाद् व्रीहीन् आ हरेत् । शुक्लाꣳश् च कृष्णाꣳश् च वि चिनुयात् । ये शुक्लाः स्युस् तम् आदित्यं चरुं निर् वपेत् । आदित्या वै देवतया विड् विशम् एवाव गच्छति ॥ अवगताऽस्य विड् अनवगतꣳ राष्ट्रम् इत्य् आहुः । ये कृष्णाः स्युस् तम् वारुणं चरुं निर् वपेत् । वारुणं वै राष्ट्रम् उभे एव विशं च राष्ट्रं चाव गच्छति यदि नावगच्छेद् इमम् अहम् आदित्येभ्यो भागं निर् वपाम्य् ऽआमुष्माद् अमुष्यै विशो ऽवगन्तोर् इति निर् वपेत् । आदित्या एवैनम् भागधेयम् प्रेप्सन्तो विशम् अव गमयन्ति यदि नावगच्छेद् आश्वत्थान् मयूखान्त् सप्त मध्यमेषायाम् उप हन्यात् । इदम् अहम् आदित्यान् बध्नाम्य् आमुष्माद् अमुष्यै विशो ऽवगन्तोर् इति । आदित्या एवैनम् बद्धवीरा विशम् अव गमयन्ति यदि नावगच्छेद् एतम् एवादित्यं चरुं निर् वपेत् । इध्मे ऽपि मयूखान्त् सं नह्येत् । अनपरुध्यम् एवाव गच्छति । आश्वत्था भवन्ति मरुतां वा एतद् ओजो यद् अश्वत्थः । ओजसैव विशम् अव गच्छति सप्त भवन्ति सप्तगणा वै मरुतः । गणश एव विशम् अव गच्छति ॥
ādityebhyo bhuvadvadbhyaś caruṃ nir vaped bhūtikāmaḥ | ādityā vā etam bhūtyai prati nudante yo 'lam bhūtyai san bhūtiṃ na prāpnoti | ādityān eva bhuvadvataḥ svena bhāgadheyenopa dhāvati ta evainam bhūtiṃ gamayanti bhavaty eva | ādityebhyo dhārayadvadbhyaś caruṃ nir vaped aparuddho vā'parudhyamāno vā | ādityā vā aparoddhāra ādityā avagamayitāraḥ | ādityān eva dhārayadvataḥ svena bhāgadheyenopa dhāvati ta evainaṃ viśi dādhrati | anaparudhyo bhavati | adite 'nu manyasvety aparudhyamāno 'sya padam ā dadīta | iyaṃ vā aditiḥ | iyam evāsmai rājyam anu manyate satyāśīr ity āha satyām evāśiṣaṃ kurute | iha mana ity āha prajā evāsmai samanasaḥ karoti | upa preta marutaḥ sudānava enā viśpatinā'bhy amum̐ rājānam ity āha mārutī vai viḍ jyeṣṭho viśpatiḥ | viśaivainam̐ rāṣṭrena sam ardhayati yaḥ parastād grāmyavādī syāt tasya gṛhād vrīhīn ā haret | śuklām̐ś ca kṛṣṇām̐ś ca vi cinuyāt | ye śuklāḥ syus tam ādityaṃ caruṃ nir vapet | ādityā vai devatayā viḍ viśam evāva gacchati || avagatā'sya viḍ anavagatam̐ rāṣṭram ity āhuḥ | ye kṛṣṇāḥ syus tam vāruṇaṃ caruṃ nir vapet | vāruṇaṃ vai rāṣṭram ubhe eva viśaṃ ca rāṣṭraṃ cāva gacchati yadi nāvagacched imam aham ādityebhyo bhāgaṃ nir vapāmy 'āmuṣmād amuṣyai viśo 'vagantor iti nir vapet | ādityā evainam bhāgadheyam prepsanto viśam ava gamayanti yadi nāvagacched āśvatthān mayūkhānt sapta madhyameṣāyām upa hanyāt | idam aham ādityān badhnāmy āmuṣmād amuṣyai viśo 'vagantor iti | ādityā evainam baddhavīrā viśam ava gamayanti yadi nāvagacched etam evādityaṃ caruṃ nir vapet | idhme 'pi mayūkhānt saṃ nahyet | anaparudhyam evāva gacchati | āśvatthā bhavanti marutāṃ vā etad ojo yad aśvatthaḥ | ojasaiva viśam ava gacchati sapta bhavanti saptagaṇā vai marutaḥ | gaṇaśa eva viśam ava gacchati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.