अग्निं वा एतस्य शरीरं गच्छति सोमꣳ रसो वरुण एनं वरुणपाशेन गृह्णाति सरस्वतीं वाग् अग्नाविष्णू आत्मा यस्य ज्योग् आमयति । यो ज्योगामयावी स्याद् यो वा कामयेत सर्वम् आयुर् इयाम् इति तस्मा एताम् इष्टिं निर् वपेद् आग्नेयम् अष्टाकपालꣳ सौम्यं चरुं वारुणं दशकपालꣳ सारस्वतं चरुम् आग्नावैष्णवम् एकादशकपालम् अग्नेर् एवास्य शरीरं निष्क्रीणाति सोमाद् रसम् । वरुणेनैवैनं वरुणपाशान् मुञ्चति सारस्वतेन वाचं दधाति । अग्निः सर्वा देवता विष्णुर् यज्ञो देवताभिश् चैवैनं यज्ञेन च भिषज्यत्य् उत यदीतासुर् भवति जीवत्य् एव । यन् नवमैत् तन् नवनीतम् अभवद् इत्य् आज्यम् अवेक्षते रूपम् एवास्यैतन् महिमानं व्याचष्टे । अश्विनोः प्राणो ऽसीत्य् आहाश्विनौ वै देवानाम् भिषजौ ताभ्याम् एवास्मै भेषजं करोति । इन्द्रस्य प्राणो ऽसीत्य् आह । इन्द्रियम् एवास्मिन्न् एतेन दधाति मित्रावरुणयोः प्राणो ऽसीत्य् आह प्राणापानाव् एवास्मिन्न् एतेन दधाति विश्वेषां देवानाम् प्राणो ऽसीत्य् आह वीर्यम् एवास्मिन्न् एतेन दधाति घृतस्य धाराम् अमृतस्य पन्थाम् इत्य् आह यथायजुर् एवैतत् पावमानेन त्वा स्तोमेनेति आह प्राणम् एवास्मिन्न् एतेन दधाति बृहद्रथन्तरयोस् त्वा स्तोमेनेत्य् आह । ओज एवास्मिन्न् एतेन दधात्य् अग्नेस् त्वा मात्रयेत्य् आहाऽऽत्मानम् एवास्मिन्न् एतेन दधाति । ऋत्विजः पर्य् आहुर् यावन्त एवर्त्विजस् त एनम् भिषज्यन्ति ब्रह्मणो हस्तम् अन्वारभ्य पर्य् आहुर् एकधैव यजमान आयुर् दधति यद् एव तस्य तत् । हिरण्याद् घृतं निष् पिबत्य् आयुर् वै घृतम् अमृतꣳ हिरण्यम् अमृताद् एवायुर् निष् पिबति शतमानम् भवति शतायुः पुरुषः शतेन्द्रिय आयुष्य् एवेन्द्रिये प्रति तिष्ठति । अथो खलु यावतीः समा एष्यन् मन्येत तावन्मानꣳ स्यात् समृद्ध्यै । इमम् अग्न आयुषे वर्चसे कृधीत्य् आहायुर् एवास्मिन् वर्चो दधाति । विश्वे देवा जरदष्टिर् यथासद् इत्य् आह जरदष्टिम् एवैनं करोति । अग्निर् आयुष्मान् इति हस्तं गृह्णाति । एते वै देवा आयुष्मन्तस् त एवास्मिन्न् आयुर् दधति सर्वम् आयुर् एति ॥
agniṃ vā etasya śarīraṃ gacchati somam̐ raso varuṇa enaṃ varuṇapāśena gṛhṇāti sarasvatīṃ vāg agnāviṣṇū ātmā yasya jyog āmayati | yo jyogāmayāvī syād yo vā kāmayeta sarvam āyur iyām iti tasmā etām iṣṭiṃ nir vaped āgneyam aṣṭākapālam̐ saumyaṃ caruṃ vāruṇaṃ daśakapālam̐ sārasvataṃ carum āgnāvaiṣṇavam ekādaśakapālam agner evāsya śarīraṃ niṣkrīṇāti somād rasam | varuṇenaivainaṃ varuṇapāśān muñcati sārasvatena vācaṃ dadhāti | agniḥ sarvā devatā viṣṇur yajño devatābhiś caivainaṃ yajñena ca bhiṣajyaty uta yadītāsur bhavati jīvaty eva | yan navamait tan navanītam abhavad ity ājyam avekṣate rūpam evāsyaitan mahimānaṃ vyācaṣṭe | aśvinoḥ prāṇo 'sīty āhāśvinau vai devānām bhiṣajau tābhyām evāsmai bheṣajaṃ karoti | indrasya prāṇo 'sīty āha | indriyam evāsminn etena dadhāti mitrāvaruṇayoḥ prāṇo 'sīty āha prāṇāpānāv evāsminn etena dadhāti viśveṣāṃ devānām prāṇo 'sīty āha vīryam evāsminn etena dadhāti ghṛtasya dhārām amṛtasya panthām ity āha yathāyajur evaitat pāvamānena tvā stomeneti āha prāṇam evāsminn etena dadhāti bṛhadrathantarayos tvā stomenety āha | oja evāsminn etena dadhāty agnes tvā mātrayety āhā''tmānam evāsminn etena dadhāti | ṛtvijaḥ pary āhur yāvanta evartvijas ta enam bhiṣajyanti brahmaṇo hastam anvārabhya pary āhur ekadhaiva yajamāna āyur dadhati yad eva tasya tat | hiraṇyād ghṛtaṃ niṣ pibaty āyur vai ghṛtam amṛtam̐ hiraṇyam amṛtād evāyur niṣ pibati śatamānam bhavati śatāyuḥ puruṣaḥ śatendriya āyuṣy evendriye prati tiṣṭhati | atho khalu yāvatīḥ samā eṣyan manyeta tāvanmānam̐ syāt samṛddhyai | imam agna āyuṣe varcase kṛdhīty āhāyur evāsmin varco dadhāti | viśve devā jaradaṣṭir yathāsad ity āha jaradaṣṭim evainaṃ karoti | agnir āyuṣmān iti hastaṃ gṛhṇāti | ete vai devā āyuṣmantas ta evāsminn āyur dadhati sarvam āyur eti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.