प्रजापतिर् देवेभ्यो ऽन्नाद्यं व्यादिशत् सो ऽब्रवीत् । यद् इमाँल्लोकान् अभ्य् अतिरिच्यातै । तन् ममासद् इति तद् इमाँल्लोकान् अभ्य् अत्य् अरिच्यतेन्द्रꣳ राजानम् इन्द्रम् अभिराजम् इन्द्रꣳ स्वराजानम् । ततो वै स इमाँल्लोकाꣳस् त्रेधाऽदुहत् तत् त्रिधातोस् त्रिधातुत्वम् । यं कामयेत । अन्नादः स्याद् इति तस्मा एतं त्रिधातुं निर् वपेद् इन्द्राय राज्ञे पुरोडाशम् एकादशकपालम् इन्द्रायाधिराजायेन्द्राय स्वराज्ञे । अयं वा इन्द्रो राजाऽयम् इन्द्रो ऽधिराजो ऽसाव् इन्द्रः स्वराड् इमान् एव लोकान्त् स्वेन भागधेयेनोप धावति त एवास्मा अन्नम् प्र यच्छन्ति । अन्नाद एव भवति यथा वत्सेन प्रत्तां गां दुह एवं एवेमाँल्लोकान् प्रत्तान् कामम् अन्नाद्यं दुहे । उत्तानेषु कपालेष्व् अधि श्रयति । अयातयामत्वाय त्रयः पुरोडाशा भवन्ति त्रय इमे लोकाः । एषां लोकानाम् आप्त्यै । उत्तरौत्तरो ज्यायान् भवति । एवम् इव हीमे लोकाः समृद्ध्यै सर्वेषाम् अभिगमयन्न् अव द्यति । अच्छम्बट्कारम् । व्यत्यासं अन्व् आह । अनिर्दाहाय ॥
prajāpatir devebhyo 'nnādyaṃ vyādiśat so 'bravīt | yad imā~llokān abhy atiricyātai | tan mamāsad iti tad imā~llokān abhy aty aricyatendram̐ rājānam indram abhirājam indram̐ svarājānam | tato vai sa imā~llokām̐s tredhā'duhat tat tridhātos tridhātutvam | yaṃ kāmayeta | annādaḥ syād iti tasmā etaṃ tridhātuṃ nir vaped indrāya rājñe puroḍāśam ekādaśakapālam indrāyādhirājāyendrāya svarājñe | ayaṃ vā indro rājā'yam indro 'dhirājo 'sāv indraḥ svarāḍ imān eva lokānt svena bhāgadheyenopa dhāvati ta evāsmā annam pra yacchanti | annāda eva bhavati yathā vatsena prattāṃ gāṃ duha evaṃ evemā~llokān prattān kāmam annādyaṃ duhe | uttāneṣu kapāleṣv adhi śrayati | ayātayāmatvāya trayaḥ puroḍāśā bhavanti traya ime lokāḥ | eṣāṃ lokānām āptyai | uttarauttaro jyāyān bhavati | evam iva hīme lokāḥ samṛddhyai sarveṣām abhigamayann ava dyati | acchambaṭkāram | vyatyāsaṃ anv āha | anirdāhāya ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.