प्रजापतेस् त्रयस्त्रिꣳशद् दुहितर आसन् ताः सोमाय राज्ञे ऽददात् तासाꣳ रोहिणीम् उपैत् ता ईर्ष्यन्तीः पुनर् अगच्छन् ता अन्व् ऐत् ताः पुनर् अयाचत ता अस्मै न पुनर् अददात् सो ऽब्रवीत् । ऋतम् अमीष्व यथा समावच्छ उपैष्याम्य् अथ ते पुनर् दास्यामीति स ऋतम् आमीत् ता अस्मै पुनर् अददात् तासाꣳ रोहिणीम् एवोपै त् तं यक्ष्म आर्छत् । राजानं यक्ष्म आरद् इति तद् राजयक्ष्मस्य जन्म यत् पापीयान् अभवत् तत् पापयक्ष्मस्य यज् जायाभ्यो ऽविन्दत् तज् जायेन्यस्य य एवम् एतेषां यक्ष्माणां जन्म वेद नैनम् एते यक्ष्मा विन्दन्ति स एता एव नमस्यन्न् उपाधावत् ता अब्रुवन् वरं वृणामहै समावच्छ एव न उपाय इति तस्मा एतम् आदित्यं चरुं निर् अवपन् तेनैवैनम् पापात् स्रामाद् अमुञ्चन् यः पापयक्ष्मगृहीतः स्यात् तस्मा एतम् आदित्यं चरुं निर् वपेत् । अमुम् एवैनम् आप्यायमानम् अन्व् आ प्याययति नवोनवो भवति जायमान इति पुरोऽनुवाक्या भवत्य् आयुर् एवास्मिन् तया दधाति यम् आदित्या अꣳशुम् आप्याययन्तीति याज्यैवैनम् एतया प्याययति ॥
prajāpates trayastrim̐śad duhitara āsan tāḥ somāya rājñe 'dadāt tāsām̐ rohiṇīm upait tā īrṣyantīḥ punar agacchan tā anv ait tāḥ punar ayācata tā asmai na punar adadāt so 'bravīt | ṛtam amīṣva yathā samāvaccha upaiṣyāmy atha te punar dāsyāmīti sa ṛtam āmīt tā asmai punar adadāt tāsām̐ rohiṇīm evopai t taṃ yakṣma ārchat | rājānaṃ yakṣma ārad iti tad rājayakṣmasya janma yat pāpīyān abhavat tat pāpayakṣmasya yaj jāyābhyo 'vindat taj jāyenyasya ya evam eteṣāṃ yakṣmāṇāṃ janma veda nainam ete yakṣmā vindanti sa etā eva namasyann upādhāvat tā abruvan varaṃ vṛṇāmahai samāvaccha eva na upāya iti tasmā etam ādityaṃ caruṃ nir avapan tenaivainam pāpāt srāmād amuñcan yaḥ pāpayakṣmagṛhītaḥ syāt tasmā etam ādityaṃ caruṃ nir vapet | amum evainam āpyāyamānam anv ā pyāyayati navonavo bhavati jāyamāna iti puro'nuvākyā bhavaty āyur evāsmin tayā dadhāti yam ādityā am̐śum āpyāyayantīti yājyaivainam etayā pyāyayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.