सर्वाणि छन्दाꣳस्य् एतस्याम् इष्ट्याम् अनूच्यानीत्य् आहुस् त्रिष्टुभो वा एतद् वीर्यं यत् ककुद् उष्णिहा जगत्यै यद् उष्णिहककुभाव् अन्वाह तेनैव सर्वाणि छन्दाꣳस्य् अव रुन्द्धे गायत्री वा एषा यद् उष्णिहा यानि चत्वार्य् अध्य् अक्षराणि चतुष्पाद एव ते पशवः । यथा पुरोडाशे पुरोडाशो ऽध्य् एवम् एव तद् यद् ऋच्य् अध्य् अक्षराणि यज् जगत्या परिदध्याद् अन्तं यज्ञं गमयेत् त्रिष्टुभा परि दधाति । इन्द्रियं वै वीर्यं त्रिष्टुग् इन्द्रिय एव वीर्ये यज्ञम् प्रति ष्ठापयति नान्तं गमयति । अग्ने त्री ते वाजिना त्री षधस्थेति त्रिवत्या परि दधाति सरूपत्वाय सर्वो वा एष यज्ञो यत् त्रैधातवीयम् । कामायकामाय प्र युज्यते सर्वेभ्यो हि कामेभ्यो यज्ञः प्रयुज्यते त्रैधातवीयेन यजेताभिचरन् । सर्वो वै एष यज्ञो यत् त्रैधातवीयम् । सर्वेणैवैनं यज्ञेनाभि चरति स्तृणुत एवैनम् एतयैव यजेताभिचर्यमाणः सर्वो वा एष यज्ञो यत् त्रैधातवीयम् । सर्वेणैव यज्ञेन यजते नैनम् अभिचरन्त् स्तृणुते । एतयैव यजेत सहस्रेण यक्ष्यमाणः प्रजातम् एवैनद् ददाति । एतयैव यजेत सहस्रेणेजानः । अन्तं वा एष पशूनां गच्छति यः सहस्रेण यजते प्रजापतिः खलु वै पशून् असृजत ताꣳस् त्रैधातवीयेनैवासृजत य एवं विद्वाꣳस् त्रैधातवीयेन पशुकामो यजते यस्माद् एव योनेः प्रजापतिः पशून् असृजत तस्माद् एवैनान्त् सृजत उपैनम् उत्तरꣳ सहस्रं नमति देवताभ्यो वा एष आ वृश्च्यते यो यक्ष्य इत्य् उक्त्वा न यजते त्रैधातवीयेन यजेत सर्वो वा एष यज्ञः यत् त्रैधातवीयम् । सर्वेणैव यज्ञेन यजते न देवताभ्य आ वृश्च्यते द्वादशकपालः पुरोडाशो भवति ते त्रयश् चतुष्कपालास् त्रिष्षमृद्धत्वाय त्रयः पुरोडाशा भवन्ति त्रय इमे लोकाः । एषां लोकानाम् आप्त्यै । उत्तरौत्तरो ज्यायान् भवति । एवम् इव हीमे लोकाः । यवमयो मध्यः । एतद् वा अन्तरिक्षस्य रूपम् । समृद्ध्यै सर्वेषाम् अभिगमयन्न् अव द्यति । अच्छम्बट्कारम् । हिरण्यं ददाति तेज एव अव रुन्द्धे तार्प्यं ददाति पशून् एवाव रुन्द्धे धेनुं ददाति । आशिष एवाव रुन्द्धे साम्नो वा एष वर्णो यद् धिरण्यम् । यजुषां तार्प्यम् उक्थामदानां धेनुः । एतान् एव सर्वान् वर्णान् अव रुन्द्धे ॥
sarvāṇi chandām̐sy etasyām iṣṭyām anūcyānīty āhus triṣṭubho vā etad vīryaṃ yat kakud uṣṇihā jagatyai yad uṣṇihakakubhāv anvāha tenaiva sarvāṇi chandām̐sy ava runddhe gāyatrī vā eṣā yad uṣṇihā yāni catvāry adhy akṣarāṇi catuṣpāda eva te paśavaḥ | yathā puroḍāśe puroḍāśo 'dhy evam eva tad yad ṛcy adhy akṣarāṇi yaj jagatyā paridadhyād antaṃ yajñaṃ gamayet triṣṭubhā pari dadhāti | indriyaṃ vai vīryaṃ triṣṭug indriya eva vīrye yajñam prati ṣṭhāpayati nāntaṃ gamayati | agne trī te vājinā trī ṣadhastheti trivatyā pari dadhāti sarūpatvāya sarvo vā eṣa yajño yat traidhātavīyam | kāmāyakāmāya pra yujyate sarvebhyo hi kāmebhyo yajñaḥ prayujyate traidhātavīyena yajetābhicaran | sarvo vai eṣa yajño yat traidhātavīyam | sarveṇaivainaṃ yajñenābhi carati stṛṇuta evainam etayaiva yajetābhicaryamāṇaḥ sarvo vā eṣa yajño yat traidhātavīyam | sarveṇaiva yajñena yajate nainam abhicarant stṛṇute | etayaiva yajeta sahasreṇa yakṣyamāṇaḥ prajātam evainad dadāti | etayaiva yajeta sahasreṇejānaḥ | antaṃ vā eṣa paśūnāṃ gacchati yaḥ sahasreṇa yajate prajāpatiḥ khalu vai paśūn asṛjata tām̐s traidhātavīyenaivāsṛjata ya evaṃ vidvām̐s traidhātavīyena paśukāmo yajate yasmād eva yoneḥ prajāpatiḥ paśūn asṛjata tasmād evainānt sṛjata upainam uttaram̐ sahasraṃ namati devatābhyo vā eṣa ā vṛścyate yo yakṣya ity uktvā na yajate traidhātavīyena yajeta sarvo vā eṣa yajñaḥ yat traidhātavīyam | sarveṇaiva yajñena yajate na devatābhya ā vṛścyate dvādaśakapālaḥ puroḍāśo bhavati te trayaś catuṣkapālās triṣṣamṛddhatvāya trayaḥ puroḍāśā bhavanti traya ime lokāḥ | eṣāṃ lokānām āptyai | uttarauttaro jyāyān bhavati | evam iva hīme lokāḥ | yavamayo madhyaḥ | etad vā antarikṣasya rūpam | samṛddhyai sarveṣām abhigamayann ava dyati | acchambaṭkāram | hiraṇyaṃ dadāti teja eva ava runddhe tārpyaṃ dadāti paśūn evāva runddhe dhenuṃ dadāti | āśiṣa evāva runddhe sāmno vā eṣa varṇo yad dhiraṇyam | yajuṣāṃ tārpyam ukthāmadānāṃ dhenuḥ | etān eva sarvān varṇān ava runddhe ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.