अग्नेस् त्रयो ज्यायाꣳसो भ्रातर आसन् ते देवेभ्यो हव्यं वहन्तः प्रामीयन्त सो ऽग्निर् अबिभेद् इत्थं वाव स्य आर्तिमाऽरिष्यतीति स निलायत सो ऽपः प्राविशत् तं देवताः प्रैषम् ऐच्छन् तम् मत्स्यः प्राब्रवीत् तम् अशपद् धियाधिया त्वा वध्यासुर् यो मा प्रावोच इति तस्मान् मत्स्यं धियाधिया घ्नन्ति शप्तः हि तम् अन्व् अविन्दन् तम् अब्रुवन्न् उप न आ वर्तस्व हव्यं नो वहेति सो ऽब्रवीद् वरं वृणै यद् एव गृहीतस्याहुतस्य बहिःपरिधि स्कन्दात् तन् मे भ्रातृणाम् भागधेयम् असद् इति तस्माद् यद् गृहीतस्याहुतस्य बहिःपरिधि स्कन्दति तेषां तद् भागधेयं तान् एव तेन प्रीणाति परिधीन् परि दधाति रक्षसाम् अपहत्यै सꣳ स्पर्शयति रक्षसाम् अनन्ववचाराय न पुरस्तात् परि दधात्य् आदित्यो ह्य् एवोद्यन् पुरस्ताद् रक्षाꣳस्य् अपहन्ति । ऊर्ध्वे समिधाव् आ दधात्य् उपरिष्टाद् एव रक्षाꣳस्य् अप हन्ति यजुषान्यां तूष्णीम् अन्याम् मिथुनत्वाय द्वे आ दधाति द्विपाद् यजमानः प्रतिष्ठित्यै ब्रह्मवादिनो वदन्ति स त्वै यजेत यो यज्ञस्याऽऽर्त्या वसीयन्त् स्याद् इति भूपतये स्वाहा भुवनपतये स्वाहा भूतानाम् पतये स्वाहेति स्कन्नम् अनु मन्त्रयेत यज्ञस्यैव तद् आर्त्या यजमानो वसीयान् भवति भूयसीर् हि देवताः प्रीणाति जामि वा एतद् यज्ञस्य क्रियते यद् अन्वञ्चौ पुरोडाशौ । उपाꣳशुयाजम् अन्तरा यजत्य् अजामित्वायाथो मिथुनत्वाय । अग्निर् अमुष्मिम्̐ लोक आसीद् यमो ऽस्मिन् ते देवा अब्रुवन्न् एतेमौ वि पर्य् ऊहामेति । अन्नाद्येन देवा अग्निम् ॥ उपामन्त्रयन्त राज्येन पितरो यमं तस्माद् अग्निर् देवानाम् अन्नादो यमः पितृणाꣳ राजा य एवं वेद प्र राज्यम् अन्नाद्यम् आप्नोति तस्मा एतद् भागधेयम् प्रायच्छन् यद् अग्नये स्विष्टकृते ऽवद्यन्ति यद् अग्नये स्विष्टकृते ऽवद्यति भागधेयेनैव तद् रुद्रꣳ सम् अर्धयति सकृत्सकृद् अव द्यति सकृद् इव हि रुद्रः । उत्तरार्धाद् अव द्यत्य् एषा वै रुद्रस्य दिक् स्वायाम् एव दिशि रुद्रं निरवदयते द्विर् अभि घारयति चतुरवत्तस्याप्त्यै पशवो वै पूर्वा आहुतयः । एष रुद्रो यद् अग्निः । यत् पूर्वा आहुतीर् अभि जुहुयाद् रुद्राय पशून् अपि दध्यात् । अपशुर् यजमानः स्यात् । अतिहाय पूर्वा आहुतीर् जुहोति पशूनां गोपीथाय ॥
agnes trayo jyāyām̐so bhrātara āsan te devebhyo havyaṃ vahantaḥ prāmīyanta so 'gnir abibhed itthaṃ vāva sya ārtimā'riṣyatīti sa nilāyata so 'paḥ prāviśat taṃ devatāḥ praiṣam aicchan tam matsyaḥ prābravīt tam aśapad dhiyādhiyā tvā vadhyāsur yo mā prāvoca iti tasmān matsyaṃ dhiyādhiyā ghnanti śaptaḥ hi tam anv avindan tam abruvann upa na ā vartasva havyaṃ no vaheti so 'bravīd varaṃ vṛṇai yad eva gṛhītasyāhutasya bahiḥparidhi skandāt tan me bhrātṛṇām bhāgadheyam asad iti tasmād yad gṛhītasyāhutasya bahiḥparidhi skandati teṣāṃ tad bhāgadheyaṃ tān eva tena prīṇāti paridhīn pari dadhāti rakṣasām apahatyai sam̐ sparśayati rakṣasām ananvavacārāya na purastāt pari dadhāty ādityo hy evodyan purastād rakṣām̐sy apahanti | ūrdhve samidhāv ā dadhāty upariṣṭād eva rakṣām̐sy apa hanti yajuṣānyāṃ tūṣṇīm anyām mithunatvāya dve ā dadhāti dvipād yajamānaḥ pratiṣṭhityai brahmavādino vadanti sa tvai yajeta yo yajñasyā''rtyā vasīyant syād iti bhūpataye svāhā bhuvanapataye svāhā bhūtānām pataye svāheti skannam anu mantrayeta yajñasyaiva tad ārtyā yajamāno vasīyān bhavati bhūyasīr hi devatāḥ prīṇāti jāmi vā etad yajñasya kriyate yad anvañcau puroḍāśau | upām̐śuyājam antarā yajaty ajāmitvāyātho mithunatvāya | agnir amuṣmim̐ loka āsīd yamo 'smin te devā abruvann etemau vi pary ūhāmeti | annādyena devā agnim || upāmantrayanta rājyena pitaro yamaṃ tasmād agnir devānām annādo yamaḥ pitṛṇām̐ rājā ya evaṃ veda pra rājyam annādyam āpnoti tasmā etad bhāgadheyam prāyacchan yad agnaye sviṣṭakṛte 'vadyanti yad agnaye sviṣṭakṛte 'vadyati bhāgadheyenaiva tad rudram̐ sam ardhayati sakṛtsakṛd ava dyati sakṛd iva hi rudraḥ | uttarārdhād ava dyaty eṣā vai rudrasya dik svāyām eva diśi rudraṃ niravadayate dvir abhi ghārayati caturavattasyāptyai paśavo vai pūrvā āhutayaḥ | eṣa rudro yad agniḥ | yat pūrvā āhutīr abhi juhuyād rudrāya paśūn api dadhyāt | apaśur yajamānaḥ syāt | atihāya pūrvā āhutīr juhoti paśūnāṃ gopīthāya ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.