अग्नीध आ दधात्य् अग्निमुखान् एवर्तून् प्रीणाति समिधम् आ दधात्य् उत्तरासाम् आहुतीनाम् प्रतिष्ठित्या अथो समिद्वत्य् एव जुहोति परिधीन्त् सम् मार्ष्टि पुनात्य् एवैनान्त् सकृत्सकृत् सम् मार्ष्टि पराङ् इव ह्य् एतर्हि यज्ञः । चतुः सम् पद्यते चतुष्पादः पशवः पशून् एवाव रुन्द्धे ब्रह्मन् प्र स्थास्याम इत्य् आहात्र वा एतर्हि यज्ञः श्रितः यत्र ब्रह्मा यत्रैव यज्ञः श्रितस् तत एवैनम् आ रभते यद् धस्तेन प्रमीवेद् वेपनः स्याद् यच् छीर्ष्णा शीर्षक्तिवान्त् स्याद् यत् तूष्णीम् आसीतासम्प्रत्तो यज्ञः स्यात् प्र तिष्ठेत्य् एव ब्रूयाद् वाचि वै यज्ञः श्रितो यत्रैव यज्ञः श्रितस् तत एवैनꣳ सम् प्र यच्छति देव सवितर् एतत् ते प्र ॥ आहेत्य् आह प्रसूत्यै बृहस्पतिर् ब्रह्मेत्य् आह स हि ब्रह्मिष्ठः स यज्ञम् पाहि स यज्ञपतिम् पाहि स माम् पाहीत्य् आह यज्ञाय यजमानायात्मने तेभ्य एवाशिषम् आ शास्ते ऽनार्त्या आश्राव्याह देवान् यजेति ब्रह्मवादिनो वदन्तीष्टा देवता अथ कतम एते देवा इति छन्दाꣳसीति ब्रूयाद् गायत्रीं त्रिष्टुभम् जगतीम् इत्य् अथो खल्व् आहुर् ब्राह्मणा वै छन्दाꣳसीति तान् एव तद् यजति देवानां वा इष्टा देवता आसन्न् अथाग्निर् नोद् अज्वलत् तं देवा आहुतीभिर् अनूयाजेष्व् अन्व् अविन्दन् यद् अनूयाजान् यजति । अग्निम् एव तत् सम् इन्द्धे । एतदुर् वै नामासुर आसीत् स एतर्हि यज्ञस्याशिषम् अवृङ्क्त यद् ब्रूयाद् एतत् उ द्यावापृथिवी भद्रम् अभूद् इत्य् एतदुम् एवासुरं यज्ञस्याशिषं गमयेद् इदं द्यावापृथिवी भद्रम् अभूद् इ त्य् एव ब्रूयाद् यजमानम् एव यज्ञस्याशिषम् गमयत्य् आर्ध्म सूक्तवाकम् उत नमोवाकम् इत्य् आहेदम् अरात्स्मेति वावैतद् आह । उपश्रितो दिवः पृथिव्योर् इत्य् आह द्यावापृथिव्योर् हि यज्ञ उपश्रितः । ओमन्वती ते ऽस्मिन् यज्ञे यजमान द्यावापृथिवी स्ताम् इत्य् आहाऽऽशिषम् एवैताम् आ शास्ते यद् ब्रूयात् सूपावसाना च स्वध्यवसाना चेति प्रमायुको यजमानः स्याद् यदा हि प्रमीयते । अथेमाम् उपावस्यति सूपचरणा च स्वधिचरणा चेत्य् एव ब्रूयाद् वरीयसीम् एवास्मै गव्यूतिम् आ शास्ते न प्रमायुको भवति तयो आविद्य् अग्निर् इदꣳ हविर् अजुषतेत्य् आह या अयाक्ष्म देवतास् ता अरीरधामेति वावैतद् आह यन् न निर्दिशेत् प्रतिवेशं यज्ञस्याशीर् गच्छेद् आ शास्ते ऽयं यजमानो ऽसाव् इत्य् आह निर्दिश्यैवैनꣳ सुवर्गं लोकं गमयति । आयुर् आ शास्ते सुप्रजास्त्वम् आ शास्त इत्य् आहाशिषम् एवैताम् आ शास्ते सजातवनस्याम् आ शास्त इत्य् आह प्राणा वै सजाताः प्राणान् एव नान्तर् एति तद् अग्निर् देवो देवेभ्यो वनते वयम् अग्नेर् मानुषा इत्य् आहाग्निर् देवेभ्यो वनुते वयम् मनुष्येभ्य इति वावैतद् आह । इह गतिर् वामस्येदं च नमो देवेभ्य इत्य् आह याश् चैव देवता यजति याश् च न ताभ्य एवोभयीभ्यो नमस् करोत्य् आत्मनो ऽनार्त्यै ॥
agnīdha ā dadhāty agnimukhān evartūn prīṇāti samidham ā dadhāty uttarāsām āhutīnām pratiṣṭhityā atho samidvaty eva juhoti paridhīnt sam mārṣṭi punāty evainānt sakṛtsakṛt sam mārṣṭi parāṅ iva hy etarhi yajñaḥ | catuḥ sam padyate catuṣpādaḥ paśavaḥ paśūn evāva runddhe brahman pra sthāsyāma ity āhātra vā etarhi yajñaḥ śritaḥ yatra brahmā yatraiva yajñaḥ śritas tata evainam ā rabhate yad dhastena pramīved vepanaḥ syād yac chīrṣṇā śīrṣaktivānt syād yat tūṣṇīm āsītāsampratto yajñaḥ syāt pra tiṣṭhety eva brūyād vāci vai yajñaḥ śrito yatraiva yajñaḥ śritas tata evainam̐ sam pra yacchati deva savitar etat te pra || āhety āha prasūtyai bṛhaspatir brahmety āha sa hi brahmiṣṭhaḥ sa yajñam pāhi sa yajñapatim pāhi sa mām pāhīty āha yajñāya yajamānāyātmane tebhya evāśiṣam ā śāste 'nārtyā āśrāvyāha devān yajeti brahmavādino vadantīṣṭā devatā atha katama ete devā iti chandām̐sīti brūyād gāyatrīṃ triṣṭubham jagatīm ity atho khalv āhur brāhmaṇā vai chandām̐sīti tān eva tad yajati devānāṃ vā iṣṭā devatā āsann athāgnir nod ajvalat taṃ devā āhutībhir anūyājeṣv anv avindan yad anūyājān yajati | agnim eva tat sam inddhe | etadur vai nāmāsura āsīt sa etarhi yajñasyāśiṣam avṛṅkta yad brūyād etat u dyāvāpṛthivī bhadram abhūd ity etadum evāsuraṃ yajñasyāśiṣaṃ gamayed idaṃ dyāvāpṛthivī bhadram abhūd i ty eva brūyād yajamānam eva yajñasyāśiṣam gamayaty ārdhma sūktavākam uta namovākam ity āhedam arātsmeti vāvaitad āha | upaśrito divaḥ pṛthivyor ity āha dyāvāpṛthivyor hi yajña upaśritaḥ | omanvatī te 'smin yajñe yajamāna dyāvāpṛthivī stām ity āhā''śiṣam evaitām ā śāste yad brūyāt sūpāvasānā ca svadhyavasānā ceti pramāyuko yajamānaḥ syād yadā hi pramīyate | athemām upāvasyati sūpacaraṇā ca svadhicaraṇā cety eva brūyād varīyasīm evāsmai gavyūtim ā śāste na pramāyuko bhavati tayo āvidy agnir idam̐ havir ajuṣatety āha yā ayākṣma devatās tā arīradhāmeti vāvaitad āha yan na nirdiśet prativeśaṃ yajñasyāśīr gacched ā śāste 'yaṃ yajamāno 'sāv ity āha nirdiśyaivainam̐ suvargaṃ lokaṃ gamayati | āyur ā śāste suprajāstvam ā śāsta ity āhāśiṣam evaitām ā śāste sajātavanasyām ā śāsta ity āha prāṇā vai sajātāḥ prāṇān eva nāntar eti tad agnir devo devebhyo vanate vayam agner mānuṣā ity āhāgnir devebhyo vanute vayam manuṣyebhya iti vāvaitad āha | iha gatir vāmasyedaṃ ca namo devebhya ity āha yāś caiva devatā yajati yāś ca na tābhya evobhayībhyo namas karoty ātmano 'nārtyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.