यो वै पवमानानाम् अन्वारोहान् विद्वान् यजते ऽनु पवमानान् आ रोहति न पवमानेभ्यो ऽव छिद्यते श्येनो ऽसि गायत्रच्छन्दा अनु त्वाऽऽ रभे स्वस्ति मा सम् पारय सुपर्णो ऽसि त्रिष्टुप्छन्दा अनु त्वा रभे स्वस्ति मा सम् पारय सघाऽसि जगतीछन्दा अनु त्वाऽऽ रभे स्वस्ति मा सम् पारय । इत्य् आह । एते वै पवमानानाम् अन्वारोहास् तान् य एवं विद्वान् यजते ऽनु पवमानान् आ रोहति न पवमानेभ्यो ऽव च्छिद्यते यो वै पवमानस्य संततिं वेद सर्वम् आयुर् एति न पुरायुषः प्र मीयते पशुमान् भवति विन्दते प्रजाम् पवमानस्य ग्रहा गृह्यन्ते । अथ वा अस्यैते ऽगृहीता द्रोणकलश आधवनीयः पूतभृत् तान् यद् अगृहीत्वोपाकुर्यात् पवमानं वि ॥ च्छिन्द्यात् तं विच्छिद्यमानम् अध्वर्योः प्राणो ऽनु वि च्छिद्येत । उपयामगृहीतो ऽसि प्रजापतये त्वा । इति द्रोणकलशम् अभि मृशेत् । इन्द्राय त्वा । इत्य् आधवनीयम् । विश्वेभ्यस् त्वा देवेभ्यः । इति पूतभृतम् पवमानम् एव तत् सं तनोति सर्वम् आयुर् एति न पुरायुषः प्र मीयते पशुमान् भवति विन्दते प्रजाम् ॥
yo vai pavamānānām anvārohān vidvān yajate 'nu pavamānān ā rohati na pavamānebhyo 'va chidyate śyeno 'si gāyatracchandā anu tvā'' rabhe svasti mā sam pāraya suparṇo 'si triṣṭupchandā anu tvā rabhe svasti mā sam pāraya saghā'si jagatīchandā anu tvā'' rabhe svasti mā sam pāraya | ity āha | ete vai pavamānānām anvārohās tān ya evaṃ vidvān yajate 'nu pavamānān ā rohati na pavamānebhyo 'va cchidyate yo vai pavamānasya saṃtatiṃ veda sarvam āyur eti na purāyuṣaḥ pra mīyate paśumān bhavati vindate prajām pavamānasya grahā gṛhyante | atha vā asyaite 'gṛhītā droṇakalaśa ādhavanīyaḥ pūtabhṛt tān yad agṛhītvopākuryāt pavamānaṃ vi || cchindyāt taṃ vicchidyamānam adhvaryoḥ prāṇo 'nu vi cchidyeta | upayāmagṛhīto 'si prajāpataye tvā | iti droṇakalaśam abhi mṛśet | indrāya tvā | ity ādhavanīyam | viśvebhyas tvā devebhyaḥ | iti pūtabhṛtam pavamānam eva tat saṃ tanoti sarvam āyur eti na purāyuṣaḥ pra mīyate paśumān bhavati vindate prajām ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.