अग्ने तेजस्विन् तेजस्वी त्वं देवेषु भूयास् तेजस्वन्तम् माम् आयुष्मन्तं वर्चस्वन्तम् मनुष्येषु कुरु दीक्षायै च त्वा तपसश् च तेजसे जुहोमि तेजोविद् असि तेजो मा मा हासीन् माऽहं तेजो हासिषम् मा मां तेजो हासीत् । इन्द्रौजस्विन्न् ओजस्वी त्वं देवेषु भूया ओजस्वन्तम् माम् आयुष्मन्तं वर्चस्वन्तम् मनुष्येषु कुरु ब्रह्मणश् च त्वा क्षत्रस्य च ओजसे जुहोमि । ओजोविद् अस्य् ओजो मा मा हासीन् माऽहम् ओजो हासिषम् मा माम् ओजो हासीत् सूर्य भ्राजस्विन् भ्राजस्वी त्वं देवेषु भूया भ्राजस्वन्तम् माम् आयुष्मन्तं वर्चस्वन्तम् मनुष्येषु कुरु वायोश् च त्वापां च भ्राजसे जुहोमि सुवर्विद् असि सुवर् मा मा हासीन् माऽहꣳ सुवर् हासिषम् मा माꣳ सुवर् हासीत् । मयि मेधाम् मयि प्रजाम् मय्य् अग्निस् तेजो दधातु मयि मेधाम् मयि प्रजाम् मयीन्द्र इन्द्रियं दधातु मयि मेधाम् मयि प्रजाम् मयि सूर्यो भ्राजो दधातु ॥
agne tejasvin tejasvī tvaṃ deveṣu bhūyās tejasvantam mām āyuṣmantaṃ varcasvantam manuṣyeṣu kuru dīkṣāyai ca tvā tapasaś ca tejase juhomi tejovid asi tejo mā mā hāsīn mā'haṃ tejo hāsiṣam mā māṃ tejo hāsīt | indraujasvinn ojasvī tvaṃ deveṣu bhūyā ojasvantam mām āyuṣmantaṃ varcasvantam manuṣyeṣu kuru brahmaṇaś ca tvā kṣatrasya ca ojase juhomi | ojovid asy ojo mā mā hāsīn mā'ham ojo hāsiṣam mā mām ojo hāsīt sūrya bhrājasvin bhrājasvī tvaṃ deveṣu bhūyā bhrājasvantam mām āyuṣmantaṃ varcasvantam manuṣyeṣu kuru vāyoś ca tvāpāṃ ca bhrājase juhomi suvarvid asi suvar mā mā hāsīn mā'ham̐ suvar hāsiṣam mā mām̐ suvar hāsīt | mayi medhām mayi prajām mayy agnis tejo dadhātu mayi medhām mayi prajām mayīndra indriyaṃ dadhātu mayi medhām mayi prajām mayi sūryo bhrājo dadhātu ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.