वायुर् हिंकर्ताऽग्निः प्रस्तोता प्रजापतिः साम बृहस्पतिर् उद्गाता विश्वे देवा उपगातारो मरुतः प्रतिहर्तार इन्द्रो निधनं ते देवाः प्राणभृतः प्राणम् मयि दधतु । एतद् वै सर्वम् अध्वर्युर् उपाकुर्वन्न् उद्गातृभ्य उपाकरोति ते देवाः प्राणभृतः प्राणम् मयि दधत्व् इत्य् आहैतद् एव सर्वम् आत्मन् धत्ते । इडा देवहूर् मनुर् यज्ञनीः । बृहस्पतिर् उक्थामदानि शꣳसिषत् । विश्वे देवाः सूक्तवाचः । पृथिवि मातर् मा मा हिꣳसीः । मधु मनिष्ये मधु जनिष्ये मधु वक्ष्यामि मधु वदिष्यामि मधुमतीं देवेभ्यो वाचम् उद्यासꣳ शुश्रूषेण्याम् मनुष्येभ्यस् तम् मा देवा अवन्तु शोभायै पितरो ऽनु मदन्तु ॥
vāyur hiṃkartā'gniḥ prastotā prajāpatiḥ sāma bṛhaspatir udgātā viśve devā upagātāro marutaḥ pratihartāra indro nidhanaṃ te devāḥ prāṇabhṛtaḥ prāṇam mayi dadhatu | etad vai sarvam adhvaryur upākurvann udgātṛbhya upākaroti te devāḥ prāṇabhṛtaḥ prāṇam mayi dadhatv ity āhaitad eva sarvam ātman dhatte | iḍā devahūr manur yajñanīḥ | bṛhaspatir ukthāmadāni śam̐siṣat | viśve devāḥ sūktavācaḥ | pṛthivi mātar mā mā him̐sīḥ | madhu maniṣye madhu janiṣye madhu vakṣyāmi madhu vadiṣyāmi madhumatīṃ devebhyo vācam udyāsam̐ śuśrūṣeṇyām manuṣyebhyas tam mā devā avantu śobhāyai pitaro 'nu madantu ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.