सं ते वायुर् मातरिश्वा दधातूत्तानायै हृदयं यद् विलिष्टम् । देवानां यश् चरति प्राणथेन तस्मै च देवि वषड् अस्तु तुभ्यम् ॥ सुजातो ज्योतिषा सह शर्म वरूथम् आऽसदः सुवः । वासो अग्ने विश्वरूपꣳ सं व्ययस्व विभावसो ॥ उद् उ तिष्ठ स्वध्वरावा नो देव्या कृपा । दृशे च भासा बृहता सुशुक्वनिर् आऽग्ने याहि सुशस्तिभिः ॥ ऊर्ध्व ऊ षु ण ऊतये तिष्ठा देवो न सविता । ऊर्ध्वो वाजस्य सनिता यद् अञ्जिभिर् वाघद्भिर् विह्वयामहे ॥ स जातो गर्भो असि रोदस्योर् अग्ने चारुर् विभृत ओषधीषु । चित्रः शिशुः परि तमाꣳस्य् अक्तः प्र मातृभ्यो अधि कनिक्रदद् गाः ॥ स्थिरो भव वीड्वङ्ग आशुर् भव वाज्य् अर्वन् । पृथुर् भव सुषदस् त्वम् अग्नेः पुरीषवाहनः ॥ शिवो भव प्रजाभ्यो मानुषीभ्यस् त्वम् अङ्गिरः । मा द्यावापृथिवी अभि शूशुचो माऽन्तरिक्षम् मा वनस्पतीन् ॥ प्रैतु वाजी कनिक्रदन् नानदद् रासभः पत्वा । भरन्न् अग्निम् पुरीष्यम् मा पाद्य् आयुषः पुरा ॥ रासभो वां कनिक्रदत् सुयुक्तो वृषणा रथे । स वाम् अग्निम् पुरीष्यम् आशुर् दूतो वहाद् इतः ॥ वृषाग्निं वृषणम् भरन्न् अपां गर्भꣳ समुद्रियम् । अग्न आ याहि वीतय ऋतꣳ सत्यम् ॥ ओषधयः प्रति गृह्णीताग्निम् एतꣳ शिवम् आयन्तम् अभ्य् अत्र युष्मान् । व्यस्यन् विश्वा अमतीर् अरातीर् निषीदन् नो अप दुर्मतिꣳ हनत् ॥ ओषधयः प्रति मोदध्वम् एनम् पुष्पावतीः सुपिप्पलाः । अयं वो गर्भ ऋत्वियः प्रत्नꣳ सधस्थम् आऽसदत् ॥
saṃ te vāyur mātariśvā dadhātūttānāyai hṛdayaṃ yad viliṣṭam | devānāṃ yaś carati prāṇathena tasmai ca devi vaṣaḍ astu tubhyam || sujāto jyotiṣā saha śarma varūtham ā'sadaḥ suvaḥ | vāso agne viśvarūpam̐ saṃ vyayasva vibhāvaso || ud u tiṣṭha svadhvarāvā no devyā kṛpā | dṛśe ca bhāsā bṛhatā suśukvanir ā'gne yāhi suśastibhiḥ || ūrdhva ū ṣu ṇa ūtaye tiṣṭhā devo na savitā | ūrdhvo vājasya sanitā yad añjibhir vāghadbhir vihvayāmahe || sa jāto garbho asi rodasyor agne cārur vibhṛta oṣadhīṣu | citraḥ śiśuḥ pari tamām̐sy aktaḥ pra mātṛbhyo adhi kanikradad gāḥ || sthiro bhava vīḍvaṅga āśur bhava vājy arvan | pṛthur bhava suṣadas tvam agneḥ purīṣavāhanaḥ || śivo bhava prajābhyo mānuṣībhyas tvam aṅgiraḥ | mā dyāvāpṛthivī abhi śūśuco mā'ntarikṣam mā vanaspatīn || praitu vājī kanikradan nānadad rāsabhaḥ patvā | bharann agnim purīṣyam mā pādy āyuṣaḥ purā || rāsabho vāṃ kanikradat suyukto vṛṣaṇā rathe | sa vām agnim purīṣyam āśur dūto vahād itaḥ || vṛṣāgniṃ vṛṣaṇam bharann apāṃ garbham̐ samudriyam | agna ā yāhi vītaya ṛtam̐ satyam || oṣadhayaḥ prati gṛhṇītāgnim etam̐ śivam āyantam abhy atra yuṣmān | vyasyan viśvā amatīr arātīr niṣīdan no apa durmatim̐ hanat || oṣadhayaḥ prati modadhvam enam puṣpāvatīḥ supippalāḥ | ayaṃ vo garbha ṛtviyaḥ pratnam̐ sadhastham ā'sadat ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.