समास् त्वाग्न ऋतवो वर्धयन्तु संवत्सरा ऋषयो यानि सत्या । सं दिव्येन दीदिहि रोचनेन विश्वा आ भाहि प्रदिशः पृथिव्याः ॥ सं चेध्यस्वाग्ने प्र च बोधयैनम् उच् च तिष्ठ महते सौभगाय । मा च ऋषद् उपसत्ता ते अग्ने ब्रह्माणस् ते यशसः सन्तु माऽन्ये ॥ त्वाम् अग्ने वृणते ब्राह्मणा इमे शिवो अग्ने संवरणे भवा नः । सपत्नहा नो अभिमातिजिच् च स्वे गये जागृह्य् अप्रयुच्छन् ॥ इहैवाग्ने अधि धारया रयिम् मा त्वा नि क्रन् पूर्वचितो निकारिणः । क्षत्रम् अग्ने सुयमम् अस्तु तुभ्यम् उपसत्ता वर्धतां ते अनिष्टृतः ॥ क्षत्रेणाग्ने स्वायुः सꣳ रभस्व मित्रेणाग्ने मित्रधेये यतस्व । सजातानाम् मध्यमस्था एधि राज्ञाम् अग्ने विहव्यो दीदिहीह ॥ अति निहो अति स्रिधो ऽत्य् अचित्तिम् अत्य् अरातिम् अग्ने । विश्वा ह्य् अग्ने दुरिता सहस्वाथास्मभ्यꣳ सहवीराꣳ रयिं दाः ॥ अनाधृष्यो जातवेदा अनिष्टृतो विराड् अग्ने क्षत्रभृद् दीदिहीह । विश्वा आशाः प्रमुञ्चन् मानुषीर् भियः शिवाभिर् अद्य परि पाहि नो वृधे ॥ बृहस्पते सवितर् बोधयैनꣳ सꣳशितं चित् संतराꣳ सꣳ शिशाधि । वर्धयैनम् महते सौभगाय । विश्व एनम् अनु मदन्तु देवाः ॥ अमुत्रभूयाद् अध यद् यमस्य बृहस्पते अभिशस्तेर् अमुञ्चः । प्रत्य् औहताम् अश्विना मृत्युम् अस्माद् देवानाम् अग्ने भिषजा शचीभिः ॥ उद् वयं तमसस् परि पश्यन्तो ज्योतिर् उत्तरम् । देवं देवत्रा सूर्यम् अगन्म ज्योतिर् उत्तमम् ॥
samās tvāgna ṛtavo vardhayantu saṃvatsarā ṛṣayo yāni satyā | saṃ divyena dīdihi rocanena viśvā ā bhāhi pradiśaḥ pṛthivyāḥ || saṃ cedhyasvāgne pra ca bodhayainam uc ca tiṣṭha mahate saubhagāya | mā ca ṛṣad upasattā te agne brahmāṇas te yaśasaḥ santu mā'nye || tvām agne vṛṇate brāhmaṇā ime śivo agne saṃvaraṇe bhavā naḥ | sapatnahā no abhimātijic ca sve gaye jāgṛhy aprayucchan || ihaivāgne adhi dhārayā rayim mā tvā ni kran pūrvacito nikāriṇaḥ | kṣatram agne suyamam astu tubhyam upasattā vardhatāṃ te aniṣṭṛtaḥ || kṣatreṇāgne svāyuḥ sam̐ rabhasva mitreṇāgne mitradheye yatasva | sajātānām madhyamasthā edhi rājñām agne vihavyo dīdihīha || ati niho ati sridho 'ty acittim aty arātim agne | viśvā hy agne duritā sahasvāthāsmabhyam̐ sahavīrām̐ rayiṃ dāḥ || anādhṛṣyo jātavedā aniṣṭṛto virāḍ agne kṣatrabhṛd dīdihīha | viśvā āśāḥ pramuñcan mānuṣīr bhiyaḥ śivābhir adya pari pāhi no vṛdhe || bṛhaspate savitar bodhayainam̐ sam̐śitaṃ cit saṃtarām̐ sam̐ śiśādhi | vardhayainam mahate saubhagāya | viśva enam anu madantu devāḥ || amutrabhūyād adha yad yamasya bṛhaspate abhiśaster amuñcaḥ | praty auhatām aśvinā mṛtyum asmād devānām agne bhiṣajā śacībhiḥ || ud vayaṃ tamasas pari paśyanto jyotir uttaram | devaṃ devatrā sūryam aganma jyotir uttamam ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.