अन्नपते ऽन्नस्य नो देह्य् अनमीवस्य शुष्मिणः । प्र प्रदातारं तारिष ऊर्जं नो धेहि द्विपदे चतुष्पदे ॥ उद् उ त्वा विश्वे देवा अग्ने भरन्तु चित्तिभिः । स नो भव शिवतमः सुप्रतीको विभावसुः ॥ प्रेद् अग्ने ज्योतिष्मान् याहि शिवेभिर् अर्चिभिस् त्वम् । बृहद्भिर् भानुभिर् भासन् मा हिꣳसीस् तनुवा प्रजाः ॥ समिधाग्निं दुवस्यत घृतैर् बोधयतातिथिम् । आ ॥ अस्मिन् हव्या जुहोतन ॥ प्रप्रायम् अग्निर् भरतस्य शृण्वे वि यत् सूर्यो न रोचते बृहद् भाः । अभि यः पूरुम् पृतनासु तस्थौ दीदाय दैव्यो अतिथिः शिवो नः ॥ आपो देवीः प्रति गृह्णीत भस्मैतत् स्योने कृणुध्वꣳ सुरभाव् उ लोके । तस्मै नमन्तां जनयः सुपत्नीर् मातेव पुत्रम् बिभृता स्व् एनम् ॥ अप्स्व् अग्ने सधिष्टव सौषधीर् अनु रुध्यसे । गर्भै सञ् जायसे पुनः ॥ गर्भो अस्य् ओषधीनां गर्भो वनस्पतीनां । गर्भो विश्वस्य भूतस्याग्ने गर्भो अपाम् असि ॥ प्रसद्य भस्मना योनिम् अपश् च पृथिवीम् अग्ने । सꣳसृज्य मातृभिस् त्वं ज्योतिष्मान् पुनर् आसदः ॥ पुनर् आसद्य सदनम् अपश् च पृथिवीम् अग्ने । शेषे मातुर् यथोपस्थे ऽन्तर् अस्याꣳ शिवतमः ॥ पुनर् ऊर्जा नि वर्तस्व पुनर् अग्न इषायुषा । पुनर् नः पाहि विश्वतः ॥ सह रय्या नि वर्तस्वाग्ने पिन्वस्व धारया । विश्वप्स्निया विश्वतस् परि ॥ पुनस् त्वाऽऽदित्या रुद्रा वसवः सम् इन्धताम् पुनर् ब्रह्माणो वसुनीथ यज्ञैः । घृतेन त्वं तनुवो वर्धयस्व सत्याः सन्तु यजमानस्य कामाः ॥ बोधा नो अस्य वचसो यविष्ठ मꣳहिष्ठस्य प्रभृतस्य स्वधावः । पीयति त्वो अनु त्वो गृणाति वन्दारुस् ते तनुवं वन्दे अग्ने ॥ स बोधि सूरिर् मघवा वसुदावा वसुपतिः । युयोध्य् अस्मद् द्वेषाꣳसि ॥
annapate 'nnasya no dehy anamīvasya śuṣmiṇaḥ | pra pradātāraṃ tāriṣa ūrjaṃ no dhehi dvipade catuṣpade || ud u tvā viśve devā agne bharantu cittibhiḥ | sa no bhava śivatamaḥ supratīko vibhāvasuḥ || pred agne jyotiṣmān yāhi śivebhir arcibhis tvam | bṛhadbhir bhānubhir bhāsan mā him̐sīs tanuvā prajāḥ || samidhāgniṃ duvasyata ghṛtair bodhayatātithim | ā || asmin havyā juhotana || praprāyam agnir bharatasya śṛṇve vi yat sūryo na rocate bṛhad bhāḥ | abhi yaḥ pūrum pṛtanāsu tasthau dīdāya daivyo atithiḥ śivo naḥ || āpo devīḥ prati gṛhṇīta bhasmaitat syone kṛṇudhvam̐ surabhāv u loke | tasmai namantāṃ janayaḥ supatnīr māteva putram bibhṛtā sv enam || apsv agne sadhiṣṭava sauṣadhīr anu rudhyase | garbhai sañ jāyase punaḥ || garbho asy oṣadhīnāṃ garbho vanaspatīnāṃ | garbho viśvasya bhūtasyāgne garbho apām asi || prasadya bhasmanā yonim apaś ca pṛthivīm agne | sam̐sṛjya mātṛbhis tvaṃ jyotiṣmān punar āsadaḥ || punar āsadya sadanam apaś ca pṛthivīm agne | śeṣe mātur yathopasthe 'ntar asyām̐ śivatamaḥ || punar ūrjā ni vartasva punar agna iṣāyuṣā | punar naḥ pāhi viśvataḥ || saha rayyā ni vartasvāgne pinvasva dhārayā | viśvapsniyā viśvatas pari || punas tvā''dityā rudrā vasavaḥ sam indhatām punar brahmāṇo vasunītha yajñaiḥ | ghṛtena tvaṃ tanuvo vardhayasva satyāḥ santu yajamānasya kāmāḥ || bodhā no asya vacaso yaviṣṭha mam̐hiṣṭhasya prabhṛtasya svadhāvaḥ | pīyati tvo anu tvo gṛṇāti vandārus te tanuvaṃ vande agne || sa bodhi sūrir maghavā vasudāvā vasupatiḥ | yuyodhy asmad dveṣām̐si ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.