अपेत वीत वि च सर्पतातो ये ऽत्र स्थ पुराणा ये च नूतनाः । अदाद् इदं यमो ऽवसानम् पृथिव्या अक्रन्न् इमम् पितरो लोकम् अस्मै ॥ अग्नेर् भस्मास्य् अग्नेः पुरीषम् असि संज्ञानम् असि कामधरणम् मयि ते कामधरणम् भूयात् सं या वः प्रियास् तनुवः सम् प्रिया हृदयानि वः । आत्मा वो अस्तु सम्प्रियः सम्प्रियास् तनुवो मम ॥ अयꣳ सो अग्निर् यस्मिन्त् सोमम् इन्द्रः सुतं दधे जठरे वावशानः । सहस्रियं वाजम् अत्यं न सप्तिꣳ ससवान्त् सन्त् स्तूयसे जातवेदः ॥ अग्ने दिवो अर्णम् अच्छा जिगास्य् अच्छा देवाꣳ ऊचिषे धिष्णिया ये । याः परस्ताद् रोचने सूर्यस्य याश् चावस्ताद् उपतिष्ठन्त आपः ॥ अग्ने यत् ते दिवि वर्चः पृथिव्यां यद् ओषधीषु अप्सु वा यजत्र । येनान्तरिक्षम् उर्व् आततन्थ त्वेषः स भानुर् अर्णवो नृचक्षाः ॥ पुरीष्यासो अग्नयः प्रावणेभिः सजोषसः । जुषन्ताꣳ हव्यम् आहुतम् अनमीवा इषो महीः ॥ इडाम् अग्ने पुरुदꣳसꣳ सनिं गोः शश्वत्तमꣳ हवमानाय साध । स्यान् नः सूनुस् तनयो विजावाग्ने सा ते सुमतिर् भूत्व् अस्मे ॥ अयं ते योनिर् ऋत्वियो यतो जातो अरोचथाः । तं जानन् अग्न आ रोहाथा नो वर्धया रयिम् ॥ चिद् असि तया देवतयाङ्गिरवद् ध्रुवा सीद परिचिद् असि तया देवतयाङ्गिरस्वद् ध्रुवा सीद लोकम् पृण छिद्रम् पृणाथो सीद शिवा त्वम् । इन्द्राग्नी त्वा बृहस्पतिर् अस्मिन् योनाव् असीषदन् ॥ ता अस्य सूददोहसः सोमꣳ श्रीणन्ति पृश्नयः । जन्मन् देवानां विशस् त्रिष्व् आ रोचने दिवः
apeta vīta vi ca sarpatāto ye 'tra stha purāṇā ye ca nūtanāḥ | adād idaṃ yamo 'vasānam pṛthivyā akrann imam pitaro lokam asmai || agner bhasmāsy agneḥ purīṣam asi saṃjñānam asi kāmadharaṇam mayi te kāmadharaṇam bhūyāt saṃ yā vaḥ priyās tanuvaḥ sam priyā hṛdayāni vaḥ | ātmā vo astu sampriyaḥ sampriyās tanuvo mama || ayam̐ so agnir yasmint somam indraḥ sutaṃ dadhe jaṭhare vāvaśānaḥ | sahasriyaṃ vājam atyaṃ na saptim̐ sasavānt sant stūyase jātavedaḥ || agne divo arṇam acchā jigāsy acchā devām̐ ūciṣe dhiṣṇiyā ye | yāḥ parastād rocane sūryasya yāś cāvastād upatiṣṭhanta āpaḥ || agne yat te divi varcaḥ pṛthivyāṃ yad oṣadhīṣu apsu vā yajatra | yenāntarikṣam urv ātatantha tveṣaḥ sa bhānur arṇavo nṛcakṣāḥ || purīṣyāso agnayaḥ prāvaṇebhiḥ sajoṣasaḥ | juṣantām̐ havyam āhutam anamīvā iṣo mahīḥ || iḍām agne purudam̐sam̐ saniṃ goḥ śaśvattamam̐ havamānāya sādha | syān naḥ sūnus tanayo vijāvāgne sā te sumatir bhūtv asme || ayaṃ te yonir ṛtviyo yato jāto arocathāḥ | taṃ jānan agna ā rohāthā no vardhayā rayim || cid asi tayā devatayāṅgiravad dhruvā sīda paricid asi tayā devatayāṅgirasvad dhruvā sīda lokam pṛṇa chidram pṛṇātho sīda śivā tvam | indrāgnī tvā bṛhaspatir asmin yonāv asīṣadan || tā asya sūdadohasaḥ somam̐ śrīṇanti pṛśnayaḥ | janman devānāṃ viśas triṣv ā rocane divaḥ
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.