मा नो हिꣳसीज् जनिता यः पृथिव्या यो वा दिवꣳ सत्यधर्मा जजान । यश् चापश् चन्द्रा बृहतीर् जजान कस्मै देवाय हविषा विधेम ॥ अभ्यावर्तस्व पृथिवि यज्ञेन पयसा सह । वपां ते अग्निर् इषितो ऽव सर्पतु ॥ अग्ने यत् ते शुक्रं यच् चन्द्रं यत् पूतं यद् यज्ञियम् । तद् देवेभ्यो भरामसि ॥ इषमूर्जम् अहम् इत आ दद ऋतस्य धाम्नो अमृतस्य योनेः । आ नो गोषु विशत्व् औषधीषु जहामि सेदिम् अनिराम् अमीवाम् ॥ अग्ने तव श्रवो वयो महि भ्राजन्त्य् अर्चयो विभावसो । बृहद्भानो शवसा वाजम् उक्थ्यं दधासि दाशुषे कवे ॥ इरज्यन्न् अग्ने प्रथयस्व जन्तुभिर् अस्मे रायो अमर्त्य । स दर्शतस्य वपुषो वि राजसि पृणक्षि सानसिꣳ रयिम् ॥ ऊर्जो नपाज् जातवेदः सुशस्तिभिर् मन्दस्व धीतिभिर् हितः । त्वे इषः सं दधुर् भूरिरेतसश् चित्रोतयो वामजाताः ॥ पावकवर्चाः शुक्रवर्चा अनूनवर्चा उद् इयर्षि भानुना । पुत्रः पितरा विचरन्न् उपावस्य् उभे पृणक्षि रोदसी ॥ ऋतावानम् महिषं विश्वचर्षणिम् अग्निꣳ सुम्नाय दधिरे पुरो जनाः । श्रुत्कर्णꣳ सप्रथस्तमम् त्वा गिरा दैव्यम् मानुषा युगा ॥ निष्कर्तारम् अध्वरस्य प्रचेतसं क्षयन्तꣳ राधसे महे । रातिम् भृगूणाम् उशिजं कविक्रतुम् पृणक्षि सानसिम् रयिम् ॥ चित स्थ परिचित ऊर्ध्वचितः श्रयध्वं तया देवतयाऽङ्गिरस्वद् ध्रुवाः सीदत ॥ आ प्यायस्व सम् एतु ते विश्वतः सोम वृष्णियम् । भवा वाजस्य संगथे ॥ सं ते पयाꣳसि सम् उ यन्तु वाजाः सं वृष्णियान्य् अभिमातिषाहः । आप्यायमानो अमृताय सोम दिवि श्रवाꣳसि उत्तमानि धिष्व ॥
mā no him̐sīj janitā yaḥ pṛthivyā yo vā divam̐ satyadharmā jajāna | yaś cāpaś candrā bṛhatīr jajāna kasmai devāya haviṣā vidhema || abhyāvartasva pṛthivi yajñena payasā saha | vapāṃ te agnir iṣito 'va sarpatu || agne yat te śukraṃ yac candraṃ yat pūtaṃ yad yajñiyam | tad devebhyo bharāmasi || iṣamūrjam aham ita ā dada ṛtasya dhāmno amṛtasya yoneḥ | ā no goṣu viśatv auṣadhīṣu jahāmi sedim anirām amīvām || agne tava śravo vayo mahi bhrājanty arcayo vibhāvaso | bṛhadbhāno śavasā vājam ukthyaṃ dadhāsi dāśuṣe kave || irajyann agne prathayasva jantubhir asme rāyo amartya | sa darśatasya vapuṣo vi rājasi pṛṇakṣi sānasim̐ rayim || ūrjo napāj jātavedaḥ suśastibhir mandasva dhītibhir hitaḥ | tve iṣaḥ saṃ dadhur bhūriretasaś citrotayo vāmajātāḥ || pāvakavarcāḥ śukravarcā anūnavarcā ud iyarṣi bhānunā | putraḥ pitarā vicarann upāvasy ubhe pṛṇakṣi rodasī || ṛtāvānam mahiṣaṃ viśvacarṣaṇim agnim̐ sumnāya dadhire puro janāḥ | śrutkarṇam̐ saprathastamam tvā girā daivyam mānuṣā yugā || niṣkartāram adhvarasya pracetasaṃ kṣayantam̐ rādhase mahe | rātim bhṛgūṇām uśijaṃ kavikratum pṛṇakṣi sānasim rayim || cita stha paricita ūrdhvacitaḥ śrayadhvaṃ tayā devatayā'ṅgirasvad dhruvāḥ sīdata || ā pyāyasva sam etu te viśvataḥ soma vṛṣṇiyam | bhavā vājasya saṃgathe || saṃ te payām̐si sam u yantu vājāḥ saṃ vṛṣṇiyāny abhimātiṣāhaḥ | āpyāyamāno amṛtāya soma divi śravām̐si uttamāni dhiṣva ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.