ध्रुवक्षितिर् ध्रुवयोनिर् ध्रुवाऽसि ध्रुवां योनिम् आ सीद साध्या । उख्यस्य केतुम् प्रथमम् पुरस्ताद् अश्विनाध्वर्यू सादयताम् इह त्वा ॥ स्वे दक्षे दक्षपितेह सीद देवत्रा पृथिवी बृहती रराणा । स्वासस्था तनुवा सं विशस्व पितेवैधि सूनव आ सुशेवाश्विनाध्वर्यू सादयताम् इह त्वा ॥ कुलायिनी वसुमती वयोधा रयिं नो वर्ध बहुलꣳ सुवीरम् ॥ अपामतिं दुर्मतिम् बाधमाना रायस् पोषे यज्ञपतिम् आभजन्ती सुवर् धेहि यजमानाय पोषम् अश्विनाध्वर्यू सादयताम् इह त्वा ॥ अग्नेः पुरीषम् असि देवयानी तां त्वा विश्वे अभि गृणन्तु देवाः । स्तोमपृष्ठा घृतवतीह सीद प्रजावद् अस्मे द्रविणाऽऽ यजस्वाश्विनाऽऽध्वर्यू सादयताम् इह त्वा ॥ दिवो मूर्धाऽऽसि पृथिव्या नाभिर् विष्टम्भनी दिशाम् अधिपत्नी भुवनानाम् ॥ ऊर्मिर् द्रप्सो अपाम् असि विश्वकर्मा त ऋषिर् अश्विनाऽध्वर्यू सादयताम् इह त्वा ॥ सजूर् ऋतुभिः सजूर् विधाभिः सजूर् वसुभिः सजू रुद्रैः सजूर् आदित्यैः सजूर् विश्वैर् देवैः सजूर् देवैः सजूर् देवैर् वयोनाधैर् अग्नये त्वा वैश्वानरायाश्विनाऽध्वर्यू सादयताम् इह त्वा प्राणम् मे पाह्य् अपानम् मे पाहि व्यानम् मे पाहि चक्षुर् म उर्व्या वि भाहि श्रोत्रम् मे श्लोकय । अपस् पिन्वौषधीर् जिन्व द्विपात् पाहि चतुष्पाद् अव दिवो वृष्टिम् एरय ॥
dhruvakṣitir dhruvayonir dhruvā'si dhruvāṃ yonim ā sīda sādhyā | ukhyasya ketum prathamam purastād aśvinādhvaryū sādayatām iha tvā || sve dakṣe dakṣapiteha sīda devatrā pṛthivī bṛhatī rarāṇā | svāsasthā tanuvā saṃ viśasva pitevaidhi sūnava ā suśevāśvinādhvaryū sādayatām iha tvā || kulāyinī vasumatī vayodhā rayiṃ no vardha bahulam̐ suvīram || apāmatiṃ durmatim bādhamānā rāyas poṣe yajñapatim ābhajantī suvar dhehi yajamānāya poṣam aśvinādhvaryū sādayatām iha tvā || agneḥ purīṣam asi devayānī tāṃ tvā viśve abhi gṛṇantu devāḥ | stomapṛṣṭhā ghṛtavatīha sīda prajāvad asme draviṇā'' yajasvāśvinā''dhvaryū sādayatām iha tvā || divo mūrdhā''si pṛthivyā nābhir viṣṭambhanī diśām adhipatnī bhuvanānām || ūrmir drapso apām asi viśvakarmā ta ṛṣir aśvinā'dhvaryū sādayatām iha tvā || sajūr ṛtubhiḥ sajūr vidhābhiḥ sajūr vasubhiḥ sajū rudraiḥ sajūr ādityaiḥ sajūr viśvair devaiḥ sajūr devaiḥ sajūr devair vayonādhair agnaye tvā vaiśvānarāyāśvinā'dhvaryū sādayatām iha tvā prāṇam me pāhy apānam me pāhi vyānam me pāhi cakṣur ma urvyā vi bhāhi śrotram me ślokaya | apas pinvauṣadhīr jinva dvipāt pāhi catuṣpād ava divo vṛṣṭim eraya ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.