वाजो नः सप्त प्रदिशश् चतस्रो वा परावतः । वाजो नो विश्वैर् देवैर् धनसाताव् इहावतु ॥ विश्वे अद्य मरुतो विश्व ऊती विश्वे भवन्त्व् अग्नयः समिद्धाः । विश्वे नो देवा अवसा गमन्तु विश्वं अस्तु द्रविणं वाजो अस्मे ॥ वाजस्य प्रसवं देवा रथैर् याता हिरण्ययैः । अग्निर् इन्द्रो बृहस्पतिर् मरुतः सोमपीतये ॥ वाजेवाजे ऽवत वाजिनो नो धनेषु विप्रा अमृता ऋतज्ञाः । अस्य मध्वः पिबत मादयध्वं तृप्ता यात पथिभिर् देवयानैः ॥ वाजः पुरस्ताद् उत मध्यतो नो वाजो देवाꣳ ऋतुभिः कल्पयाति । वाजस्य हि प्रसवो नंनमीति विश्वा आशा वाजपतिर् भवेयम् ॥ पयः पृथिव्याम् पय ओषधीषु पयो दिव्यन्तरिक्षे पयो धाम् । पयस्वतीः प्रदिशः सन्तु मह्यम् ॥ सम् मा सृजामि पयसा घृतेन सम् मा सृजाम्य् अप ओषधीभिः । सो ऽहं वाजꣳ सनेयम् अग्ने ॥ नक्तोषासा समनसा विरूपे धापयेते शिशुम् एकꣳ समीची । द्यावा क्षामा रुक्मो अन्तर् वि भाति देवा अग्निं धारयन् द्रविणोदाः ॥ समुद्रो ऽसि नभस्वान् आर्द्रदानुः शम्भूर् मयोभूर् अभि मा वाहि स्वाहा मारुतो ऽसि मरुतां गणः शम्भूर् मयोभूर् अभि मा वाहि स्वाहावस्युर् असि दुवस्वाञ् छम्भूर् मयोभूर् अभि मा वाहि स्वाहा ॥
vājo naḥ sapta pradiśaś catasro vā parāvataḥ | vājo no viśvair devair dhanasātāv ihāvatu || viśve adya maruto viśva ūtī viśve bhavantv agnayaḥ samiddhāḥ | viśve no devā avasā gamantu viśvaṃ astu draviṇaṃ vājo asme || vājasya prasavaṃ devā rathair yātā hiraṇyayaiḥ | agnir indro bṛhaspatir marutaḥ somapītaye || vājevāje 'vata vājino no dhaneṣu viprā amṛtā ṛtajñāḥ | asya madhvaḥ pibata mādayadhvaṃ tṛptā yāta pathibhir devayānaiḥ || vājaḥ purastād uta madhyato no vājo devām̐ ṛtubhiḥ kalpayāti | vājasya hi prasavo naṃnamīti viśvā āśā vājapatir bhaveyam || payaḥ pṛthivyām paya oṣadhīṣu payo divyantarikṣe payo dhām | payasvatīḥ pradiśaḥ santu mahyam || sam mā sṛjāmi payasā ghṛtena sam mā sṛjāmy apa oṣadhībhiḥ | so 'haṃ vājam̐ saneyam agne || naktoṣāsā samanasā virūpe dhāpayete śiśum ekam̐ samīcī | dyāvā kṣāmā rukmo antar vi bhāti devā agniṃ dhārayan draviṇodāḥ || samudro 'si nabhasvān ārdradānuḥ śambhūr mayobhūr abhi mā vāhi svāhā māruto 'si marutāṃ gaṇaḥ śambhūr mayobhūr abhi mā vāhi svāhāvasyur asi duvasvāñ chambhūr mayobhūr abhi mā vāhi svāhā ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.