देवासुराः संयत्ता आसन् कनीयाꣳसो देवा आसन् भूयाꣳसो ऽसुरास् ते देवा एता इष्टका अपश्यन् ता उपादधत भूयस्कृद् असीत्य् एव भूयाꣳसो ऽभवन् वनस्पतिभिर् ओषधीभिः । वरिवस्कृद् असीतीमाम् अजयन् प्राच्य् असीति प्राचीं दिशम् अजयन् । ऊर्ध्वासीत्य् अमूम् अजयन् । अन्तरिक्षसद् अस्य् अन्तरिक्षे सीदेत्य् अन्तरिक्षम् अजयन् ततो देवा अभवन् पराऽसुराः । यस्यैता उपधीयन्ते भूयान् एव भवति । अभीमाँल्लोकाञ् जयति भवत्य् आत्मना परास्य भ्रातृव्यो भवति । अप्सुषद् असि श्येनसद् असीत्य् आह । एतद् वा अग्ने रूपम् । रूपेणैवाग्निम् अव रुन्द्धे पृथिव्यास् त्वा द्रविणे सादयामीत्य् आह । इमान् एवैताभिर् लोकान् द्रविणावतः कुरुते ॥ आयुष्या उप दधाति । आयुर् एव अस्मिन् दधाति । अग्ने यत् ते परꣳ हृन् नामेत्य् आह । एतद् वा अग्नेः प्रियं धाम प्रियम् एवास्य धामोपाप्नोति ताव् एहि सꣳ रभावहा इत्य् आह व्य् एवैनेन परि धत्ते पाञ्चजन्येष्व् अप्य् एध्य् अग्न इत्य् आह । एष वा अग्निः पाञ्चजन्यो यः पञ्चचितीकस् तस्माद् एवम् आह ॥ ऋतव्या उप दधाति । एतद् वा ऋतूनाम् प्रियं धाम यद् ऋतव्याः । ऋतूनाम् एव प्रियं धामाव रुन्द्धे सुमेक इत्य् आह संवत्सरो वै सुमेकः संवत्सरस्यैव प्रियं धामोपाप्नोति ॥
devāsurāḥ saṃyattā āsan kanīyām̐so devā āsan bhūyām̐so 'surās te devā etā iṣṭakā apaśyan tā upādadhata bhūyaskṛd asīty eva bhūyām̐so 'bhavan vanaspatibhir oṣadhībhiḥ | varivaskṛd asītīmām ajayan prācy asīti prācīṃ diśam ajayan | ūrdhvāsīty amūm ajayan | antarikṣasad asy antarikṣe sīdety antarikṣam ajayan tato devā abhavan parā'surāḥ | yasyaitā upadhīyante bhūyān eva bhavati | abhīmā~llokāñ jayati bhavaty ātmanā parāsya bhrātṛvyo bhavati | apsuṣad asi śyenasad asīty āha | etad vā agne rūpam | rūpeṇaivāgnim ava runddhe pṛthivyās tvā draviṇe sādayāmīty āha | imān evaitābhir lokān draviṇāvataḥ kurute || āyuṣyā upa dadhāti | āyur eva asmin dadhāti | agne yat te param̐ hṛn nāmety āha | etad vā agneḥ priyaṃ dhāma priyam evāsya dhāmopāpnoti tāv ehi sam̐ rabhāvahā ity āha vy evainena pari dhatte pāñcajanyeṣv apy edhy agna ity āha | eṣa vā agniḥ pāñcajanyo yaḥ pañcacitīkas tasmād evam āha || ṛtavyā upa dadhāti | etad vā ṛtūnām priyaṃ dhāma yad ṛtavyāḥ | ṛtūnām eva priyaṃ dhāmāva runddhe sumeka ity āha saṃvatsaro vai sumekaḥ saṃvatsarasyaiva priyaṃ dhāmopāpnoti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.