वृष्टिसनीर् उप दधाति वृष्टिम् एवाव रुन्द्धे यद् एकधोपदध्याद् एकम् ऋतुं वर्षेत् । अनुपरिहारꣳ सादयति तस्मात् सर्वान् ऋतून् वर्षति पुरोवातसनिर् असीत्य् आह । एतद् वै वृष्ट्यै रूपम् । रूपेणैव वृष्टिम् अव रुन्द्धे संयानीभिर् वै देवा इमाँल्लोकान्त् सम् अयुस् तत् संयानीनाꣳ संयानित्वम् । यत् संयानीर् उपदधाति यथाप्सु नावा संयात्य् एवम् एवैताभिर् यजमान इमाँल्लोकान्त् सं याति प्लवो वा एषो ऽग्नेर् यत् संयानीः । यत् संयानिर् उपदधाति प्लवम् एवैतम् अग्नय उप दधाति । उत यस्यैतासूपहितास्व् आपो ऽग्निꣳ हरन्त्य् अहृत एवास्याग्निः। आदित्येष्टका उप दधाति । आदित्या वा एतम् भूत्यै प्रति नुदन्ते यो ऽलम् भूत्यै सन् भूतिं न प्राप्नोति । आदित्याः एवैनम् भूतिं गमयन्ति । असौ वा एतस्यादित्यो रुचम् आ दत्ते यो ऽग्निं चित्वा न रोचते यद् आदित्येष्टका उपदधात्य् असाव् एवास्मिन्न् आदित्यो रुचं दधाति यथासौ देवानाꣳ रोचत एवम् एवैष मनुष्याणाꣳ रोचते ॥ घृतेष्टका उप दधाति । एतद् वा अग्नेः प्रियं धाम यद् घृतम् प्रियेणैवैनं धाम्ना सम् अर्धयति । अथो तेजसा अनुपरिहारꣳ सादयति । अपरिवर्गम् एवास्मिन् तेजो दधाति प्रजापतिर् अग्निम् अचिनुत स यशसा व्य् आर्ध्यत स एता यशोदा अपश्यत् ता उपाधत्त ताभिर् वै स यश आत्मन्न् अधत्त यद् यशोदा उपदधाति यश एव ताभिर् यजमान आत्मन् धत्ते पञ्चोप दधाति पाङ्क्तः पुरुषः । यावान् एव पुरुषस् तस्मिन् यशो दधाति ॥
vṛṣṭisanīr upa dadhāti vṛṣṭim evāva runddhe yad ekadhopadadhyād ekam ṛtuṃ varṣet | anuparihāram̐ sādayati tasmāt sarvān ṛtūn varṣati purovātasanir asīty āha | etad vai vṛṣṭyai rūpam | rūpeṇaiva vṛṣṭim ava runddhe saṃyānībhir vai devā imā~llokānt sam ayus tat saṃyānīnām̐ saṃyānitvam | yat saṃyānīr upadadhāti yathāpsu nāvā saṃyāty evam evaitābhir yajamāna imā~llokānt saṃ yāti plavo vā eṣo 'gner yat saṃyānīḥ | yat saṃyānir upadadhāti plavam evaitam agnaya upa dadhāti | uta yasyaitāsūpahitāsv āpo 'gnim̐ haranty ahṛta evāsyāgniḥ| ādityeṣṭakā upa dadhāti | ādityā vā etam bhūtyai prati nudante yo 'lam bhūtyai san bhūtiṃ na prāpnoti | ādityāḥ evainam bhūtiṃ gamayanti | asau vā etasyādityo rucam ā datte yo 'gniṃ citvā na rocate yad ādityeṣṭakā upadadhāty asāv evāsminn ādityo rucaṃ dadhāti yathāsau devānām̐ rocata evam evaiṣa manuṣyāṇām̐ rocate || ghṛteṣṭakā upa dadhāti | etad vā agneḥ priyaṃ dhāma yad ghṛtam priyeṇaivainaṃ dhāmnā sam ardhayati | atho tejasā anuparihāram̐ sādayati | aparivargam evāsmin tejo dadhāti prajāpatir agnim acinuta sa yaśasā vy ārdhyata sa etā yaśodā apaśyat tā upādhatta tābhir vai sa yaśa ātmann adhatta yad yaśodā upadadhāti yaśa eva tābhir yajamāna ātman dhatte pañcopa dadhāti pāṅktaḥ puruṣaḥ | yāvān eva puruṣas tasmin yaśo dadhāti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.