वसोर् धारां जुहोति वसोर् मे धारासद् इति वा एषा हूयते घृतस्य वा एनम् एषा धारामुष्मिँल्लोके पिन्वमानोप तिष्ठते । आज्येन जुहोति तेजो वा आज्यं तेजो वसोर् धारा तेजसैवास्मै तेजो ऽव रुन्द्धे । अथो कामा वै वसोर् धारा कामान् एवाव रुन्द्धे यं कामयेत प्राणान् अस्यान्नाद्यं वि छिन्द्याम् इति विग्राहं तस्य जुहुयात् प्राणान् एवास्यान्नाद्यं वि च्छिनत्ति यं कामयेत प्राणान् अस्यान्नाद्यꣳ सं तनुयाम् इति संततां तस्य जुहुयात् प्राणान् एवास्यान्नाद्यꣳ सं तनोति द्वादश द्वादशानि जुहोति द्वादश मासाः संवत्सरः संवत्सरेणैवास्मा अन्नम् अव रुन्द्धे । अन्नं च मे ऽक्षुच् च म इत्य् आह । एतद् वै अन्नस्य रूपम् । रूपेणैवान्नम् अव रुन्द्धे । अग्निश् च म आपश् च म इत्य् आह । एषा वा अन्नस्य योनिः सयोन्य् एवान्नम् अव रुन्द्धे । अर्धेन्द्राणि जुहोति देवता एवाव रुन्द्धे यत् सर्वेषाम् अर्धम् इन्द्रः प्रति तस्माद् इन्द्रो देवतानाम् भूयिष्ठभाक्तमः । इन्द्रम् उत्तरम् आह । इन्द्रियम् एवास्मिन्न् उपरिष्टाद् दधाति यज्ञायुधानि जुहोति यज्ञः वै यज्ञायुधानि यज्ञम् एवाव रुन्द्धे । अथो एतद् वै यज्ञस्य रूपम् । रूपेणैव यज्ञम् अव रुन्द्धे । अवभृथश् च मे स्वगाकारश् च म इत्य् आह स्वगाकृत्यै । अग्निश् च मे घर्मश् च म इत्य् आह । एतद् वै ब्रह्मवर्चसस्य रूपम् । रूपेणैव ब्रह्मवर्चसम् अव रुन्द्धे । ऋक् च मे साम च म इत्य् आह । एतद् वै छन्दसाꣳ रूपम् । रूपेणैव छन्दाꣳस्य् अव रुन्द्धे गर्भाश् च मे वत्साश् च म इत्य् आह । एतद् वै पशूनाꣳ रूपम् । रूपेणैव पशून् अव रुन्द्धे कल्पाञ् जुहोति । अक्लृप्तस्य क्लृप्त्यै युग्मदयुजे जुहोति मिथुनत्वाय । उत्तरावती भवतः । अभिक्रान्त्यै । एका च मे तिस्रश् च म इत्य् आह देवछन्दसं वा एका च तिस्रश् च ॥ 6 मनुष्यछन्दसं चतस्रश् चाष्टौ च देवछन्दसं चैव मनुष्यछन्दसं चाव रुन्द्धे । आ त्रयस्त्रिꣳशतो जुहोति त्रयस्त्रिꣳशद् वै देवताः । देवता एवाव रुन्द्धे । आष्टाचत्वारिꣳशतो जुहोति । अष्टाचत्वारिꣳशदक्षरा जगती जागताः पशवः । जगत्यैवास्मै पशून् अव रुन्द्धे वाजश् च प्रसवश् चेति द्वादशं जुहोति द्वादश मासाः संवत्सरः संवत्सर एव प्रति तिष्ठति ॥
vasor dhārāṃ juhoti vasor me dhārāsad iti vā eṣā hūyate ghṛtasya vā enam eṣā dhārāmuṣmi~lloke pinvamānopa tiṣṭhate | ājyena juhoti tejo vā ājyaṃ tejo vasor dhārā tejasaivāsmai tejo 'va runddhe | atho kāmā vai vasor dhārā kāmān evāva runddhe yaṃ kāmayeta prāṇān asyānnādyaṃ vi chindyām iti vigrāhaṃ tasya juhuyāt prāṇān evāsyānnādyaṃ vi cchinatti yaṃ kāmayeta prāṇān asyānnādyam̐ saṃ tanuyām iti saṃtatāṃ tasya juhuyāt prāṇān evāsyānnādyam̐ saṃ tanoti dvādaśa dvādaśāni juhoti dvādaśa māsāḥ saṃvatsaraḥ saṃvatsareṇaivāsmā annam ava runddhe | annaṃ ca me 'kṣuc ca ma ity āha | etad vai annasya rūpam | rūpeṇaivānnam ava runddhe | agniś ca ma āpaś ca ma ity āha | eṣā vā annasya yoniḥ sayony evānnam ava runddhe | ardhendrāṇi juhoti devatā evāva runddhe yat sarveṣām ardham indraḥ prati tasmād indro devatānām bhūyiṣṭhabhāktamaḥ | indram uttaram āha | indriyam evāsminn upariṣṭād dadhāti yajñāyudhāni juhoti yajñaḥ vai yajñāyudhāni yajñam evāva runddhe | atho etad vai yajñasya rūpam | rūpeṇaiva yajñam ava runddhe | avabhṛthaś ca me svagākāraś ca ma ity āha svagākṛtyai | agniś ca me gharmaś ca ma ity āha | etad vai brahmavarcasasya rūpam | rūpeṇaiva brahmavarcasam ava runddhe | ṛk ca me sāma ca ma ity āha | etad vai chandasām̐ rūpam | rūpeṇaiva chandām̐sy ava runddhe garbhāś ca me vatsāś ca ma ity āha | etad vai paśūnām̐ rūpam | rūpeṇaiva paśūn ava runddhe kalpāñ juhoti | aklṛptasya klṛptyai yugmadayuje juhoti mithunatvāya | uttarāvatī bhavataḥ | abhikrāntyai | ekā ca me tisraś ca ma ity āha devachandasaṃ vā ekā ca tisraś ca || 6 manuṣyachandasaṃ catasraś cāṣṭau ca devachandasaṃ caiva manuṣyachandasaṃ cāva runddhe | ā trayastrim̐śato juhoti trayastrim̐śad vai devatāḥ | devatā evāva runddhe | āṣṭācatvārim̐śato juhoti | aṣṭācatvārim̐śadakṣarā jagatī jāgatāḥ paśavaḥ | jagatyaivāsmai paśūn ava runddhe vājaś ca prasavaś ceti dvādaśaṃ juhoti dvādaśa māsāḥ saṃvatsaraḥ saṃvatsara eva prati tiṣṭhati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.