संवत्सरम् उख्यम् भृत्वा द्वितीये संवत्सर आग्नेयम् अष्टाकपालं निर् वपेद् ऐन्द्रम् एकादशकपालं वैश्वदेवं द्वादशकपालम् बार्हस्पत्यं चरुं वैष्णवं त्रिकपालम् । तृतीये संवत्सरे ऽभिजिता यजेत यद् अष्टाकपालो भवत्य् अष्टाक्षरा गायत्र्य् आग्नेयं गायत्रम् प्रातःसवनम् प्रातःसवनम् एव तेन दाधार गायत्रीं छन्दः । यद् एकादशकपालो भवत्य् एकादशाक्षरा त्रिष्टुग् ऐन्द्रं त्रैष्टुभम् माध्यंदिनꣳ सवनम् माध्यंदिनम् एव सवनं तेन दाधार त्रिष्टुभम् छन्दः । यद् द्वादशकपालो भवति द्वादशाक्षरा जगती वैश्वदेवं जागतं तृतीयसवनम् । तृतीयसवनम् एव तेन दाधार जगतीं छन्दः । यद् बार्हस्पत्यश् चरुर् भवति ब्रह्म वै देवानाम् बृहस्पतिः । ब्रह्मैव तेन दाधार यद् वैष्णवस् त्रिकपालो भवति यज्ञो वै विष्णुः । यज्ञम् एव तेन दाधार यत् तृतीये संवत्सरे ऽभिजिता यजते ऽभिजित्यै यत् संवत्सरम् उख्यम् बिभर्तीमम् एव तेन लोकꣳ स्पृणोति यद् द्वितीये संवत्सरे ऽग्निं चिनुते ऽन्तरिक्षम् एव तेन स्पृणोति यत् तृतीये संवत्सरे यजते ऽमुम् एव तेन लोकꣳ स्पृणोति । एतं वै पर आट्णारः कक्षीवाꣳ औशिजो वीतहव्यः श्रायसस् त्रसदस्युः पौरुकुत्स्यः प्रजाकामा अचिन्वत ततो वै ते सहस्रꣳ सहस्रम् पुत्रान् अविन्दन्त प्रथते प्रजया पशुभिस् ताम् मात्राम् आप्नोति यां ते ऽगच्छन् य एवं विद्वान् अग्निं चिनुते ॥
saṃvatsaram ukhyam bhṛtvā dvitīye saṃvatsara āgneyam aṣṭākapālaṃ nir vaped aindram ekādaśakapālaṃ vaiśvadevaṃ dvādaśakapālam bārhaspatyaṃ caruṃ vaiṣṇavaṃ trikapālam | tṛtīye saṃvatsare 'bhijitā yajeta yad aṣṭākapālo bhavaty aṣṭākṣarā gāyatry āgneyaṃ gāyatram prātaḥsavanam prātaḥsavanam eva tena dādhāra gāyatrīṃ chandaḥ | yad ekādaśakapālo bhavaty ekādaśākṣarā triṣṭug aindraṃ traiṣṭubham mādhyaṃdinam̐ savanam mādhyaṃdinam eva savanaṃ tena dādhāra triṣṭubham chandaḥ | yad dvādaśakapālo bhavati dvādaśākṣarā jagatī vaiśvadevaṃ jāgataṃ tṛtīyasavanam | tṛtīyasavanam eva tena dādhāra jagatīṃ chandaḥ | yad bārhaspatyaś carur bhavati brahma vai devānām bṛhaspatiḥ | brahmaiva tena dādhāra yad vaiṣṇavas trikapālo bhavati yajño vai viṣṇuḥ | yajñam eva tena dādhāra yat tṛtīye saṃvatsare 'bhijitā yajate 'bhijityai yat saṃvatsaram ukhyam bibhartīmam eva tena lokam̐ spṛṇoti yad dvitīye saṃvatsare 'gniṃ cinute 'ntarikṣam eva tena spṛṇoti yat tṛtīye saṃvatsare yajate 'mum eva tena lokam̐ spṛṇoti | etaṃ vai para āṭṇāraḥ kakṣīvām̐ auśijo vītahavyaḥ śrāyasas trasadasyuḥ paurukutsyaḥ prajākāmā acinvata tato vai te sahasram̐ sahasram putrān avindanta prathate prajayā paśubhis tām mātrām āpnoti yāṃ te 'gacchan ya evaṃ vidvān agniṃ cinute ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.