यो वा अयथादेवतम् अग्निं चिनुत आ देवताभ्यो वृश्च्यते पापीयान् भवति यो यथादेवतं न देवताभ्य आ वृश्च्यते वसीयान् भवति । आग्नेय्या गायत्रिया प्रथमां चितिम् अभि मृशेत् त्रिष्टुभा द्वितीयां जगत्या तृतीयाम् अनुष्टुभा चतुर्थीम् पङ्क्त्या पञ्चमीम् । यथादेवतम् एवाग्निं चिनुते न देवताभ्य आ वृश्च्यते वसीयान् भवति । इडायै वा एषा विभक्तिः पशव इडा पशुभिर् एनम् चिनुते यो वै प्रजापतये प्रतिप्रोच्याग्निं चिनोति नार्तिम् आर्छति । अश्वाव् अभितस् तिष्ठेतां कृष्ण उत्तरतः श्वेतो दक्षिणस् ताव् आलभ्येष्टका उप दध्यात् । एतद् वै प्रजापते रूपम् प्राजापत्यो ऽश्वः साक्षाद् एव प्रजापतये प्रतिप्रोच्याग्निं चिनोति नार्तिम् आर्छति । एतद् वा अह्नो रूपं यच् छ्वेतो ऽश्वो रात्रियै कृष्णः । एतद् अह्नः रूपं यद् इष्टका रात्रियै पुरीषम् इष्टका उपधास्यञ् छ्वेतम् अश्वम् अभि मृशेत् पुरीषम् उपधास्यन् कृष्णम् अहोरात्राभ्याम् एवैनं चिनुते हिरण्यपात्रम् मधोः पूर्णं ददाति मधव्यो ऽसानीति सौर्या चित्रवत्यावेक्षते चित्रम् एव भवति मध्यंदिने । अश्वम् अव घ्रापयति । असौ वा आदित्य इन्द्र एष प्रजापतिः प्राजापत्यो ऽश्वस् तम् एव साक्षाद् ऋध्नोति ॥
yo vā ayathādevatam agniṃ cinuta ā devatābhyo vṛścyate pāpīyān bhavati yo yathādevataṃ na devatābhya ā vṛścyate vasīyān bhavati | āgneyyā gāyatriyā prathamāṃ citim abhi mṛśet triṣṭubhā dvitīyāṃ jagatyā tṛtīyām anuṣṭubhā caturthīm paṅktyā pañcamīm | yathādevatam evāgniṃ cinute na devatābhya ā vṛścyate vasīyān bhavati | iḍāyai vā eṣā vibhaktiḥ paśava iḍā paśubhir enam cinute yo vai prajāpataye pratiprocyāgniṃ cinoti nārtim ārchati | aśvāv abhitas tiṣṭhetāṃ kṛṣṇa uttarataḥ śveto dakṣiṇas tāv ālabhyeṣṭakā upa dadhyāt | etad vai prajāpate rūpam prājāpatyo 'śvaḥ sākṣād eva prajāpataye pratiprocyāgniṃ cinoti nārtim ārchati | etad vā ahno rūpaṃ yac chveto 'śvo rātriyai kṛṣṇaḥ | etad ahnaḥ rūpaṃ yad iṣṭakā rātriyai purīṣam iṣṭakā upadhāsyañ chvetam aśvam abhi mṛśet purīṣam upadhāsyan kṛṣṇam ahorātrābhyām evainaṃ cinute hiraṇyapātram madhoḥ pūrṇaṃ dadāti madhavyo 'sānīti sauryā citravatyāvekṣate citram eva bhavati madhyaṃdine | aśvam ava ghrāpayati | asau vā āditya indra eṣa prajāpatiḥ prājāpatyo 'śvas tam eva sākṣād ṛdhnoti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.