यास् ते अग्ने समिधो यानि धाम या जिह्वा जातवेदो यो अर्चिः । ये ते अग्ने मेडयो य इन्दवस् तेभिर् आत्मानं चिनुहि प्रजानन् ॥ उत्सन्नयज्ञो वा एष यद् अग्निः किं वाहैतस्य क्रियते किं वा न यद् वा अध्वर्युर् अग्नेश् चिन्वन्न् अन्तरेत्य् आत्मनो वै तद् अन्तर् एति यास् ते अग्ने समिधो यानि धामेत्य् आहैषा वा अग्नेः स्वयंचितिर् अग्निर् एव तद् अग्निं चिनोति नाध्वर्युर् आत्मनो ऽन्तर् एति चतस्र आशाः प्र चरन्त्व् अग्नय इमं नो यज्ञं नयतु प्रजानन् । घृतम् पिन्वन्न् अजरꣳ सुवीरम् ब्रह्म समिद् भवत्य् आहुतीनाम् ॥ सुवर्गाय वा एष लोकायोप धीयते यत् कूर्मश् चतस्र आशाः प्र चरन्त्व् अग्नय इत्य् आह । दिश एवैतेन प्र जानातीमं नो यज्ञं नयतु प्रजानन्न् इत्य् आह सुवर्गस्य लोकस्याभिनीत्यै ब्रह्म समिद् भवत्य् आहुतीनाम् इत्य् आह ब्रह्मणा वै देवाः सुवर्गं लोकम् आयन् यद् ब्रह्मण्वत्योपदधाति ब्रह्मणैव तद् यजमानः सुवर्गं लोकम् एति प्रजापतिर् वा एष यद् अग्निस् तस्य प्रजाः पशवश् छन्दाꣳसि रूपꣳ सर्वान् वर्णान् इष्टकानां कुर्याद् रूपेणैव प्रजाम् पशूञ् छन्दाꣳस्य् अव रुन्द्धे ऽथो प्रजाभ्य एवैनम् पशुभ्यश् छन्दोभ्यो ऽवरुद्ध्य चिनुते ॥
yās te agne samidho yāni dhāma yā jihvā jātavedo yo arciḥ | ye te agne meḍayo ya indavas tebhir ātmānaṃ cinuhi prajānan || utsannayajño vā eṣa yad agniḥ kiṃ vāhaitasya kriyate kiṃ vā na yad vā adhvaryur agneś cinvann antarety ātmano vai tad antar eti yās te agne samidho yāni dhāmety āhaiṣā vā agneḥ svayaṃcitir agnir eva tad agniṃ cinoti nādhvaryur ātmano 'ntar eti catasra āśāḥ pra carantv agnaya imaṃ no yajñaṃ nayatu prajānan | ghṛtam pinvann ajaram̐ suvīram brahma samid bhavaty āhutīnām || suvargāya vā eṣa lokāyopa dhīyate yat kūrmaś catasra āśāḥ pra carantv agnaya ity āha | diśa evaitena pra jānātīmaṃ no yajñaṃ nayatu prajānann ity āha suvargasya lokasyābhinītyai brahma samid bhavaty āhutīnām ity āha brahmaṇā vai devāḥ suvargaṃ lokam āyan yad brahmaṇvatyopadadhāti brahmaṇaiva tad yajamānaḥ suvargaṃ lokam eti prajāpatir vā eṣa yad agnis tasya prajāḥ paśavaś chandām̐si rūpam̐ sarvān varṇān iṣṭakānāṃ kuryād rūpeṇaiva prajām paśūñ chandām̐sy ava runddhe 'tho prajābhya evainam paśubhyaś chandobhyo 'varuddhya cinute ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.