मयि गृह्णाम्य् अग्रे अग्निꣳ रायस् पोषाय सुप्रजास्त्वाय सुवीर्याय । मयि प्रजाम् मयि वर्चो दधाम्य् अरिष्टाः स्याम तनुवा सुवीराः ॥ यो नो अग्निः पितरो हृत्स्व् अन्तर् अमर्त्यो मर्त्याꣳ आविवेश । तम् आत्मन् परि गृह्णीमहे वयम् मा सो अस्माꣳ अवहाय परा गात् ॥ यद् अध्वर्युर् आत्मन्न् अग्निम् अगृहीत्वाग्निं चिनुयाद् यो ऽस्य स्वो ऽग्निस् तम् अपि यजमानाय चिनुयाद् अग्निं खलु वै पशवोऽनूप तिष्ठन्ते ऽपक्रामुका अस्मात् पशवः स्युर् मयि गृह्णाम्य् अग्रे अग्निम् इत्य् आहात्मन्न् एव स्वम् अग्निं दाधार नास्मात् पशवो ऽप क्रामन्ति ब्रह्मवादिनो वदन्ति यन् मृच् चापश् चाग्नेर् अनाद्यम् अथ कस्मान् मृदा चाद्भिश् चाग्निश् चीयत इति यद् अद्भिः संयौति ॥ आपो वै सर्वा देवता देवताभिर् एवैनꣳ सꣳ सृजति यन् मृदा चिनोतीयं वा अग्निर् वैश्वानरो ऽग्निनैव तद् अग्निं चिनोति ब्रह्मवादिनो वदन्ति यन् मृदा चाद्भिश् चाग्निश् चीयतेथ कस्माद् अग्निर् उच्यत इति यच् छन्दोभिश् चिनोत्य् अग्नयो वै छन्दाꣳसि तस्माद् अग्निर् उच्यते ऽथो इयं वा अग्निर् वैश्वानरो यत् मृदा चिनोति तस्माद् अग्निर् उच्यते हिरण्येष्टका उप दधाति ज्योतिर् वै हिरण्यं ज्योतिर् एवास्मिन् दधात्य् अथो तेजो वै हिरण्यं तेज एवात्मन् धत्ते यो वा अग्निꣳ सर्वतोमुखं चिनुते सर्वासु प्रजास्व् अन्नम् अत्ति सर्वा दिशो ऽभि जयति गायत्रीम् पुरस्ताद् उप दधाति त्रिष्टुभं दक्षिणतो जगतीम् पश्चाद् अनुष्टुभम् उत्तरतः पङ्क्तिम् मध्य एष वा अग्निः सर्वतोमुखस् तं य एवं विद्वाꣳश् चिनुते सर्वासु प्रजास्व् अन्नम् अत्ति सर्वा दिशो ऽभि जयत्य् अथो दिश्य् एव दिशम् प्र वयति तस्माद् दिशि दिक् प्रोता ॥
mayi gṛhṇāmy agre agnim̐ rāyas poṣāya suprajāstvāya suvīryāya | mayi prajām mayi varco dadhāmy ariṣṭāḥ syāma tanuvā suvīrāḥ || yo no agniḥ pitaro hṛtsv antar amartyo martyām̐ āviveśa | tam ātman pari gṛhṇīmahe vayam mā so asmām̐ avahāya parā gāt || yad adhvaryur ātmann agnim agṛhītvāgniṃ cinuyād yo 'sya svo 'gnis tam api yajamānāya cinuyād agniṃ khalu vai paśavo'nūpa tiṣṭhante 'pakrāmukā asmāt paśavaḥ syur mayi gṛhṇāmy agre agnim ity āhātmann eva svam agniṃ dādhāra nāsmāt paśavo 'pa krāmanti brahmavādino vadanti yan mṛc cāpaś cāgner anādyam atha kasmān mṛdā cādbhiś cāgniś cīyata iti yad adbhiḥ saṃyauti || āpo vai sarvā devatā devatābhir evainam̐ sam̐ sṛjati yan mṛdā cinotīyaṃ vā agnir vaiśvānaro 'gninaiva tad agniṃ cinoti brahmavādino vadanti yan mṛdā cādbhiś cāgniś cīyatetha kasmād agnir ucyata iti yac chandobhiś cinoty agnayo vai chandām̐si tasmād agnir ucyate 'tho iyaṃ vā agnir vaiśvānaro yat mṛdā cinoti tasmād agnir ucyate hiraṇyeṣṭakā upa dadhāti jyotir vai hiraṇyaṃ jyotir evāsmin dadhāty atho tejo vai hiraṇyaṃ teja evātman dhatte yo vā agnim̐ sarvatomukhaṃ cinute sarvāsu prajāsv annam atti sarvā diśo 'bhi jayati gāyatrīm purastād upa dadhāti triṣṭubhaṃ dakṣiṇato jagatīm paścād anuṣṭubham uttarataḥ paṅktim madhya eṣa vā agniḥ sarvatomukhas taṃ ya evaṃ vidvām̐ś cinute sarvāsu prajāsv annam atti sarvā diśo 'bhi jayaty atho diśy eva diśam pra vayati tasmād diśi dik protā ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.