यद् वा अनीशानो भारम् आदत्ते वि वै स लिशते यद् द्वादश साह्नस्योपसदः स्युस् तिस्रो ऽहीनस्य यज्ञस्य विलोम क्रियेत तिस्र एव साह्नस्योपसदो द्वादशाहीनस्य यज्ञस्य सवीर्यत्वायाथो सलोम क्रियते वत्सस्यैकः स्तनो भागी हि सो ऽथैकꣳ स्तनं व्रतम् उपैत्य् अथ द्वाव् अथ त्रीन् अथ चतुर एतद् वै क्षुरपवि नाम व्रतं येन प्र जातान् भ्रातृव्यान् नुदते प्रति जनिष्यमाणान् अथो कनीयसैव भूय उपैति चतुरो ऽग्रे स्तनान् व्रतम् उपैत्य् अथ त्रीन् अथ द्वाव् अथैकम् एतद् वै सुजघनं नाम व्रतं तपस्यꣳ सुवर्ग्यम् अथो प्रैव जायते प्रजया पशुभिः । यवागू राजन्यस्य व्रतं क्रूरेव वै यवागूः क्रूर इव राजन्यो वज्रस्य रूपꣳ समृद्ध्यै । आमिक्षा वैश्यस्य पाकयज्ञस्य रूपम् पुष्ट्यै पयो ब्राह्मणस्य तेजो वै ब्राह्मणस् तेजः पयस् तेजसैव तेजः पय आत्मन् धत्ते । अथो पयसा वै गर्भा वर्धन्ते गर्भ इव खलु वा एष यद् दीक्षितो यद् अस्य पयो व्रतम् भवत्य् आत्मानम् एव तद् वर्धयति त्रिव्रतो वै मनुर् आसीद् द्विव्रता असुरा एकव्रताः देवाः । प्रातर् मध्यंदिने सायं तन् मनोर् व्रतम् आसीत् पाकयज्ञस्य रूपम् पुष्ट्यै प्रातश् च सायं चासुराणां निर्मध्यं क्षुधो रूपं ततस् ते पराभवन् मध्यंदिने मध्यरात्रे देवानां ततस् ते ऽभवन्त् सुवर्गं लोकम् आयन् यद् अस्य मध्यंदिने मध्यरात्रे व्रतम् भवति मध्यतो वा अन्नेन भुञ्जते मध्यत एव तद् ऊर्जं धत्ते भ्रातृव्याभिभूत्यै भवत्य् आत्मना परास्य भ्रातृव्यो भवति गर्भो वा एष यद् दीक्षितो योनिर् दीक्षितविमितं यद् दीक्षितो दीक्षितविमितात् प्रवसेद् यथा योनेर् गर्भ स्कन्दति तादृग् एव तन् न प्रवस्तव्यम् आत्मनो गोपीथाय । एष वै व्याघ्रः कुलगोपो यद् अग्निस् तस्माद् यद् दीक्षितः प्रवसेत् स एनम् ईश्वरो ऽनूत्थाय हन्तोर् न प्रवस्तव्यम् आत्मनो गुप्त्यै दक्षिणतः शय एतद् वै यजमानस्यायतनꣳ स्व एवायतने शये । अग्निम् अभ्यावृत्य शये देवता एव यज्ञम् अभ्यावृत्य शये ॥
yad vā anīśāno bhāram ādatte vi vai sa liśate yad dvādaśa sāhnasyopasadaḥ syus tisro 'hīnasya yajñasya viloma kriyeta tisra eva sāhnasyopasado dvādaśāhīnasya yajñasya savīryatvāyātho saloma kriyate vatsasyaikaḥ stano bhāgī hi so 'thaikam̐ stanaṃ vratam upaity atha dvāv atha trīn atha catura etad vai kṣurapavi nāma vrataṃ yena pra jātān bhrātṛvyān nudate prati janiṣyamāṇān atho kanīyasaiva bhūya upaiti caturo 'gre stanān vratam upaity atha trīn atha dvāv athaikam etad vai sujaghanaṃ nāma vrataṃ tapasyam̐ suvargyam atho praiva jāyate prajayā paśubhiḥ | yavāgū rājanyasya vrataṃ krūreva vai yavāgūḥ krūra iva rājanyo vajrasya rūpam̐ samṛddhyai | āmikṣā vaiśyasya pākayajñasya rūpam puṣṭyai payo brāhmaṇasya tejo vai brāhmaṇas tejaḥ payas tejasaiva tejaḥ paya ātman dhatte | atho payasā vai garbhā vardhante garbha iva khalu vā eṣa yad dīkṣito yad asya payo vratam bhavaty ātmānam eva tad vardhayati trivrato vai manur āsīd dvivratā asurā ekavratāḥ devāḥ | prātar madhyaṃdine sāyaṃ tan manor vratam āsīt pākayajñasya rūpam puṣṭyai prātaś ca sāyaṃ cāsurāṇāṃ nirmadhyaṃ kṣudho rūpaṃ tatas te parābhavan madhyaṃdine madhyarātre devānāṃ tatas te 'bhavant suvargaṃ lokam āyan yad asya madhyaṃdine madhyarātre vratam bhavati madhyato vā annena bhuñjate madhyata eva tad ūrjaṃ dhatte bhrātṛvyābhibhūtyai bhavaty ātmanā parāsya bhrātṛvyo bhavati garbho vā eṣa yad dīkṣito yonir dīkṣitavimitaṃ yad dīkṣito dīkṣitavimitāt pravased yathā yoner garbha skandati tādṛg eva tan na pravastavyam ātmano gopīthāya | eṣa vai vyāghraḥ kulagopo yad agnis tasmād yad dīkṣitaḥ pravaset sa enam īśvaro 'nūtthāya hantor na pravastavyam ātmano guptyai dakṣiṇataḥ śaya etad vai yajamānasyāyatanam̐ sva evāyatane śaye | agnim abhyāvṛtya śaye devatā eva yajñam abhyāvṛtya śaye ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.