सुवर्गं वा एते लोकं यन्ति य उपसद उपयन्ति तेषां य उन्नयते हीयत एव स नोद् अनेषीति सून्नीयम् इव यो वै स्वार्थेतां यताꣳ श्रान्तो हीयत उत स निष्ट्याय सह वसति तस्मात् सकृद् उन्नीय नापरम् उन्नयेत दध्नोन्नयेत । एतद् वै पशूनाꣳ रूपम् । रूपेणैव पशून् अव रुन्द्धे ॥ यज्ञो देवेभ्यो निलायत विष्णू रूपं कृत्वा स पृथिवीम् प्राविशत् तं देवा हस्तान्त् सꣳरभ्यैच्छन् तम् इन्द्र उपर्युपर्य् अत्य् अक्रामत् सो ऽब्रवीत् को मायम् उपर्युपर्य् अत्य् अक्रमीद् इति । अहं दुर्गे हन्तेत्य् अथ कस् त्वम् इति । अहं दुर्गाद् आहर्तेति सो ऽब्रवीत् । दुर्गे वै हन्ताऽवोचथा वराहो ऽयं वाममोषः सप्तानां गिरीणाम् परस्ताद् वित्तं वेद्यम् असुराणाम् बिभर्ति तं जहि यदि दुर्गे हन्तासीति स दर्भपुञ्जीलम् उद्वृह्य सप्तगिरीन् भित्त्वा तम् अहन् । सो ऽब्रवीत् । दुर्गाद् वा आहर्तावोचथा एतम् आ हरेति तम् एभ्यो यज्ञ एव यज्ञम् आहरत् । यत् तद् वित्तं वेद्यम् असुराणाम् अविन्दन्त तद् एकं वेद्यै वेदित्वम् असुराणाम् वा इयम् अग्र आसीत् । यावद् आसीनः परापश्यति तावद् देवानाम् । ते देवा अब्रुवन् । अस्त्व् एव नो ऽस्याम् अपीति कियद् वो दास्याम इति यावद् इयꣳ सलावृकी त्रिः परिक्रामति तावन् नो दत्तेति स इन्द्रः सलावृकी रूपं कृत्वेमां त्रिः सर्वतः पर्य् अक्रामत् तद् इमाम् अविन्दन्त यद् इमाम् अविन्दन्त तद् वेद्यै वेदित्वम् ॥ सा वा इयꣳ सर्वैव वेदिः । इयति शक्ष्यामीति त्वा अवमाय यजन्ते त्रिꣳशत् पदानि पश्चात् तिरश्ची भवति षट्त्रिꣳशत् प्राची चतुर्विꣳशतिः पुरस्तात् तिरश्ची दशदश सम् पद्यन्ते दशाक्षरा विराड् अन्नं विराड् विराजैवान्नाद्यम् अव रुन्द्धे । उद् धन्ति यद् एवास्या अमेध्यं तद् अप हन्ति । उद् धन्ति तस्माद् ओषधयः परा भवन्ति बर्हि स्तृणाति तस्माद् ओषधयः पुनर् आ भवन्ति । उत्तरम् बर्हिष उत्तरबर्हि स्तृणाति प्रजा वै बर्हिर् यजमान उत्तरबर्हिः । यजमानम् एवायजमानाद् उत्तरं करोति तस्माद् यजमानो ऽयजमानाद् उत्तरः ॥
suvargaṃ vā ete lokaṃ yanti ya upasada upayanti teṣāṃ ya unnayate hīyata eva sa nod aneṣīti sūnnīyam iva yo vai svārthetāṃ yatām̐ śrānto hīyata uta sa niṣṭyāya saha vasati tasmāt sakṛd unnīya nāparam unnayeta dadhnonnayeta | etad vai paśūnām̐ rūpam | rūpeṇaiva paśūn ava runddhe || yajño devebhyo nilāyata viṣṇū rūpaṃ kṛtvā sa pṛthivīm prāviśat taṃ devā hastānt sam̐rabhyaicchan tam indra uparyupary aty akrāmat so 'bravīt ko māyam uparyupary aty akramīd iti | ahaṃ durge hantety atha kas tvam iti | ahaṃ durgād āharteti so 'bravīt | durge vai hantā'vocathā varāho 'yaṃ vāmamoṣaḥ saptānāṃ girīṇām parastād vittaṃ vedyam asurāṇām bibharti taṃ jahi yadi durge hantāsīti sa darbhapuñjīlam udvṛhya saptagirīn bhittvā tam ahan | so 'bravīt | durgād vā āhartāvocathā etam ā hareti tam ebhyo yajña eva yajñam āharat | yat tad vittaṃ vedyam asurāṇām avindanta tad ekaṃ vedyai veditvam asurāṇām vā iyam agra āsīt | yāvad āsīnaḥ parāpaśyati tāvad devānām | te devā abruvan | astv eva no 'syām apīti kiyad vo dāsyāma iti yāvad iyam̐ salāvṛkī triḥ parikrāmati tāvan no datteti sa indraḥ salāvṛkī rūpaṃ kṛtvemāṃ triḥ sarvataḥ pary akrāmat tad imām avindanta yad imām avindanta tad vedyai veditvam || sā vā iyam̐ sarvaiva vediḥ | iyati śakṣyāmīti tvā avamāya yajante trim̐śat padāni paścāt tiraścī bhavati ṣaṭtrim̐śat prācī caturvim̐śatiḥ purastāt tiraścī daśadaśa sam padyante daśākṣarā virāḍ annaṃ virāḍ virājaivānnādyam ava runddhe | ud dhanti yad evāsyā amedhyaṃ tad apa hanti | ud dhanti tasmād oṣadhayaḥ parā bhavanti barhi stṛṇāti tasmād oṣadhayaḥ punar ā bhavanti | uttaram barhiṣa uttarabarhi stṛṇāti prajā vai barhir yajamāna uttarabarhiḥ | yajamānam evāyajamānād uttaraṃ karoti tasmād yajamāno 'yajamānād uttaraḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.