ग्रहान् वा अनु प्रजाः पशवः प्र जायन्ते । उपाꣳश्वन्तर्यामाव् अजावयः शुक्रामन्थिनौ पुरुषाः । ऋतुग्रहान् एकशफाः । आदित्यग्रहं गावः । आदित्यग्रहो भूयिष्ठाभिर् ऋग्भिर् गृह्यते तस्माद् गावः पशूनाम् भूयिष्ठाः । यत् त्रिर् उपाꣳशुꣳ हस्तेन विगृह्णाति तस्माद् द्वौ त्रीन् अजा जनयत्य् अथावयो भूयसीः पिता वा एष यद् आग्रयणः पुत्रः कलशः । यद् आग्रयण उपदस्येत् कलशाद् गृह्णीयात् । यथा पिता पुत्रं क्षित उपधावति तादृग् एव तत् । यत् कलश उपदस्येद् आग्रयणाद् गृह्णीयात् । यथा पुत्रः पितरं क्षित उपधावति तादृग् एव तत् । आत्मा वा एष यज्ञस्य यद् आग्रयणः । यद् ग्रहो वा कलशो वोपदस्येद् आग्रयणाद् गृह्णीयात् । आत्मन एवाधि यज्ञं निष् करोति । अविज्ञातो वा एष गृह्यते यद् आग्रयणः । स्थाल्या गृह्णाति वायव्येन जुहोति तस्मात् गर्भैणाविज्ञातेन ब्रह्महा । अवभृथम् अव यन्ति परा स्थालीर् अस्यन्त्य् उद् वायव्यानि हरन्ति तस्मात् स्त्रियं जाताम् परास्यन्त्य् उत् पुमाꣳसꣳ हरन्ति यत्पुरोरुचम् आह यथा वस्यस आहरति तादृग् एव तत् । यद् ग्रहं गृह्णाति यथा वस्यस आहृत्य प्राह तादृग् एव तत् । यत् सादयति यथा वस्यस उपनिधायापक्रामति तादृग् एव तत् । यद् वै यज्ञस्य साम्ना यजुषा क्रियते शिथिलं तत् । यद् ऋचा तद् दृढम् पुरस्तादुपयामा यजुषा गृह्यन्त उपरिष्टादुपयामा ऋचा यज्ञस्य धृत्यै ॥
grahān vā anu prajāḥ paśavaḥ pra jāyante | upām̐śvantaryāmāv ajāvayaḥ śukrāmanthinau puruṣāḥ | ṛtugrahān ekaśaphāḥ | ādityagrahaṃ gāvaḥ | ādityagraho bhūyiṣṭhābhir ṛgbhir gṛhyate tasmād gāvaḥ paśūnām bhūyiṣṭhāḥ | yat trir upām̐śum̐ hastena vigṛhṇāti tasmād dvau trīn ajā janayaty athāvayo bhūyasīḥ pitā vā eṣa yad āgrayaṇaḥ putraḥ kalaśaḥ | yad āgrayaṇa upadasyet kalaśād gṛhṇīyāt | yathā pitā putraṃ kṣita upadhāvati tādṛg eva tat | yat kalaśa upadasyed āgrayaṇād gṛhṇīyāt | yathā putraḥ pitaraṃ kṣita upadhāvati tādṛg eva tat | ātmā vā eṣa yajñasya yad āgrayaṇaḥ | yad graho vā kalaśo vopadasyed āgrayaṇād gṛhṇīyāt | ātmana evādhi yajñaṃ niṣ karoti | avijñāto vā eṣa gṛhyate yad āgrayaṇaḥ | sthālyā gṛhṇāti vāyavyena juhoti tasmāt garbhaiṇāvijñātena brahmahā | avabhṛtham ava yanti parā sthālīr asyanty ud vāyavyāni haranti tasmāt striyaṃ jātām parāsyanty ut pumām̐sam̐ haranti yatpurorucam āha yathā vasyasa āharati tādṛg eva tat | yad grahaṃ gṛhṇāti yathā vasyasa āhṛtya prāha tādṛg eva tat | yat sādayati yathā vasyasa upanidhāyāpakrāmati tādṛg eva tat | yad vai yajñasya sāmnā yajuṣā kriyate śithilaṃ tat | yad ṛcā tad dṛḍham purastādupayāmā yajuṣā gṛhyanta upariṣṭādupayāmā ṛcā yajñasya dhṛtyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.