प्रान्यानि पात्राणि युज्यन्ते नान्यानि यानि पराचीनानि प्रयुज्यन्ते ऽमुम् एव तैर् लोकम् अभि जयति पराङ् इव ह्य् असौ लोकः । यानि पुनः प्रयुज्यन्त इमम् एव तैर् लोकम् अभि जयति पुनःपुनर् इव ह्य् अयं लोकः प्रान्यानि पात्राणि युज्यन्ते नान्यानि यानि पराचीनानि प्रयुज्यन्ते तान्य् अन्व् ओषधयः परा भवन्ति यानि पुनः प्रयुज्यन्ते तान्य् अन्व् ओषधयः पुनर् आ भवन्ति प्रान्यानि पात्राणि युज्यन्ते नान्यानि यानि पराचीनानि प्रयुज्यन्ते तान्य् अन्व् आरण्याः पशवो ऽरण्यम् अप यन्ति यानि पुनः प्रयुज्यन्ते तान्य् अन्व् ग्राम्याः पशवो ग्रामम् उपावयन्ति यो वै ग्रहाणां निदानं वेद निदानवान् भवति । आज्यम् इत्य् उक्थं तद् वै ग्रहाणां निदानम् । यद् उपाꣳशु शꣳसति तत् उपाꣳश्वन्तर्यामयोः । यद् उच्चैस् तद् इतरेषां ग्रहाणाम् एतद् वै ग्रहाणां निदानम् । य एवं वेद निदानवान् भवति यो वै ग्रहाणाम् मिथुनं वेद प्र प्रजया पशुभिर् मिथुनैर् जायते स्थालीभिर् अन्ये ग्रहा गृह्यन्ते वायव्यैर् अन्ये । एतद् वै ग्रहाणाम् मिथुनम् । य एवं वेद प्र प्रजया पशुभिर् मिथुनैर् जायते । इन्द्रस् त्वष्टुः सोमम् अभीषहाऽपिबत् स विष्वङ् व्य् आर्च्छत् स आत्मन्न् आरमणं नाविन्दत् स एतान् अनुसवनम् पुरोडाशान् अपश्यत् तान् निर् अवपत् तैर् वै स आत्मन्न् आरमणम् अकुरुत तस्माद् अनुसवनम् पुरोडाशा निर् उप्यन्ते तस्माद् अनुसवनम् पुरोडाशानाम् प्राश्नीयाद् आत्मन्न् एवारमणं कुरुते नैनꣳ सोमो ऽति पवते ब्रह्मवादिनो वदन्ति नर्चा न यजुषा पङ्क्तिर् आप्यते ऽथ किं यज्ञस्य पाङ्क्तत्वम् इति धानाः करम्भः परिवापः पुरोडाशः पयस्या तेन पङ्क्तिर् आप्यते तद् यज्ञस्य पाङ्क्तत्वम् ॥
prānyāni pātrāṇi yujyante nānyāni yāni parācīnāni prayujyante 'mum eva tair lokam abhi jayati parāṅ iva hy asau lokaḥ | yāni punaḥ prayujyanta imam eva tair lokam abhi jayati punaḥpunar iva hy ayaṃ lokaḥ prānyāni pātrāṇi yujyante nānyāni yāni parācīnāni prayujyante tāny anv oṣadhayaḥ parā bhavanti yāni punaḥ prayujyante tāny anv oṣadhayaḥ punar ā bhavanti prānyāni pātrāṇi yujyante nānyāni yāni parācīnāni prayujyante tāny anv āraṇyāḥ paśavo 'raṇyam apa yanti yāni punaḥ prayujyante tāny anv grāmyāḥ paśavo grāmam upāvayanti yo vai grahāṇāṃ nidānaṃ veda nidānavān bhavati | ājyam ity ukthaṃ tad vai grahāṇāṃ nidānam | yad upām̐śu śam̐sati tat upām̐śvantaryāmayoḥ | yad uccais tad itareṣāṃ grahāṇām etad vai grahāṇāṃ nidānam | ya evaṃ veda nidānavān bhavati yo vai grahāṇām mithunaṃ veda pra prajayā paśubhir mithunair jāyate sthālībhir anye grahā gṛhyante vāyavyair anye | etad vai grahāṇām mithunam | ya evaṃ veda pra prajayā paśubhir mithunair jāyate | indras tvaṣṭuḥ somam abhīṣahā'pibat sa viṣvaṅ vy ārcchat sa ātmann āramaṇaṃ nāvindat sa etān anusavanam puroḍāśān apaśyat tān nir avapat tair vai sa ātmann āramaṇam akuruta tasmād anusavanam puroḍāśā nir upyante tasmād anusavanam puroḍāśānām prāśnīyād ātmann evāramaṇaṃ kurute nainam̐ somo 'ti pavate brahmavādino vadanti narcā na yajuṣā paṅktir āpyate 'tha kiṃ yajñasya pāṅktatvam iti dhānāḥ karambhaḥ parivāpaḥ puroḍāśaḥ payasyā tena paṅktir āpyate tad yajñasya pāṅktatvam ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.